人妻講嘢
out of syllabus
發唔發覺越靚嘅女越麻煩,越靚嘅仔越低能? 每次見到啲癲婆同條人夫發爛而同歸於盡,大部份都係靚女。相反,啲普通樣嘅好似卡米拉呀,就有好下場喎(我諗我算係好下場嗰類,哈。),點解呢? 從心理學角度睇(又扮乜撚嘢呀。),由細到大都有好多人錫,樣靚又可愛,當然有多啲機會同著數啦,可惜就係咁,令到佢地啲靚仔靚女唔係好駛用腦,又唔係好駛控制自己嘅情緒就可以得到佢地想要嘅嘢,包括愛情(其實我冇讀過心理學。)。我見唔少有錢女,靚女,一唔鍾意就發爛,大把大把打條仔,我真係唔明佢地除咗個樣好啲之外有乜過人之處。有好多女仔嘅心態係希望溝個有錢佬,做少奶奶又或者二奶都好,但係就唔明其實要做好呢份工一啲都唔易,唔係話靚就夠,仲有大把人interview 緊你份工你唔知啫。啲低能女以為搵到件好嘢,叫佢買車買樓養埋下半世,如果佢唔肯嘅話就影佢相,爆佢大鑊,呃返佢十億八億先(小心,呢啲女大把。)。事實係你估呢啲佬冇背景,冇律師,冇保鏢,冇老婆咩。你估你做得啲咩呢? 講真,爆得佢啲嘢出嚟,你估你傷啲定佢傷啲呢? 到時全世界都識你,知你係癲婆一個,冇仔要你之餘仲有十萬人話你係貪錢嘅姣婆。有可能會有啲二世祖見你出名,烈女一名,扮關心,照食可也! 倒不如勤力惡補男人心,襯自己有能力溝過第一件有錢佬,copy and paste 溝過第二件好過啦,最好重要係佢之前啲對你眼甘甘嘅friend 添呀,佢啲friend 都想睇吓你有幾勁㗎嘛。仲記唔記得LP700 嗰條女呀? 到今時今日佢都仲問我LP700 有冇搵我,咪傻啦,我緊係答佢冇啦! 哈哈。施主,放下啦!
我成日都覺得如果未識控制自己嘅情緒同感情,千祈唔好加入婚外情呢個遊戲,就好似你完全唔識游水,你又走去學人游出浮台一樣,死梗啦! 你自己係有錢佬都叫做好啲,同條女玩完要回復心情,出去叫吓雞,落吓club,插吓女,好快就乜都唔記得晒,又再覓食去也。女? 慘囉,日掛夜掛,想溝第二件又冇心機,諗諗吓又好似好唔抵,俾人食完又冇層樓揸吓手,叫鴨又嫌貴,唯有諗吓有冇條仔嘅淫照,可以嚇返條仔返嚟啦。其實完完全全係無聊。
講啲嘢你地聽吖,之前有條大學女生返返吓工,俾某上市公司老闆睇中,以為自己俾人點燈啦,老闆於是送花送介子,又送靚手袋,諗住今次仲唔係中頭獎。於是女生返工嘅時候開始又串又大牌,以為自己上咗上流社會咁。當然冇人知個老闆應承咗條女啲咩啦,總之就打得火熱。過咗冇半年,老闆悶悶地又溝過第二件,條女唔順氣,俾人食完冇嘢賺,嬲嬲地走去老闆屋企扮做保安員,堂堂廿幾歲大學生去做保安,勁! 諗住可以見返老闆之後鬧佢一餐又好,呃返一筆都好。點知,有人spot 到佢咁奇怪點解有個大學生會嚟做保安呢? 一傳開之後,老闆日日喺後門出入,佢都廢事理你。當然有一日俾佢撞到啦,老闆啲保鏢衝埋去㩒住條女,好在冇打佢咋,如果唔係就連自己塊面都冇埋呀。咁你話你發爛又有咩用呢? 其實你連中學嘅physics 都未讀過,點學人讀quantum physics呀? 男人賤格你可以避,女人貪錢又未夠班嘅,咪唯有交吓學費先囉。當然呢啲事件無論咩階層嘅人都會出現。
嗰條女其實係咪我? 我冇咁勁,暫時未食過上市公司老闆,係都叫佢俾幾球股份我先啦!