聖誕節快樂，聖誕，當然要慶祝，星星同學會更新～
那些年，星星同學會 第58話
「你好無聊呀！」Joyce嘅聲音有啲萌。
「哦，終於有人肯開聲喇。」
「………………」
大家又開始沉默。算啦，等佢靜下心先，有咩等陣先講。
「你搏我懵！」
「冇！係你打阿星阿星先扶住你啫。」
「…………你攬咁實做咩呀？」
噢，係喎，都係放手好啲。阿星鬆開手輕輕將Joyce推開，半夜三點幾，俾人拳打腳踢一輪，仲要氹返，除咗阿星之外應該都冇第二個。
Joyce雙眼紅腫，但係眼中有微微嘅笑意，似乎並唔討厭阿星咁多嘢講。阿星見佢唔多反抗，即刻同Joyce講：「你記得欠阿星一餐茶，打到阿星咁痛呢餐你好快啲還添呀！」一路講一路摸下自己塊面，頭先果巴認真熱辣辣，啲相書話手指似薑嘅女人打人巴掌通常都熱辣辣嘅，唔知係咪就係咁。
Joyce用左手拉開阿星摸住面嘅左手，然後伸出右手撫摸阿星啱啱俾佢冚咗一巴嘅面，Joyce嘅手指軟滑而冰冷，輕輕喺阿星嘅面上撫摸，好似想呵返阿星咁款。然後再次聽到啪一聲！
阿星再次眼前金星亂舞，好多個阿星喺阿星眼前飛嚟飛去。「賤格！」呢句係Joyce最後一句同阿星講嘅說話，然後阿星咀唇上有人飛快咁留低咗一下唇印，跟住阿星耳聽到“呯呯呯”聲有人好快上咗樓梯，到阿星眼前啲星星散哂之後，個廳只係剩返阿星一個。
究竟發生咗咩事？
待續😬
