十大惡言撩㷫女人
東方日報 2006-02-23
十大惡言撩㷫女人
男人成日話「女人心，海底針」，唔知啲女人諗乜？相反，女人又經常投訴，話啲男人唔了解佢哋，唔用心諗吓佢哋想點。結果搞到男又呻、女又怨！既然係咁，小記今日就替啲姊妹出頭，講吓佢哋最憎男人講啲乜，唔想開口及着脷嘅老友，就好快啲睇吓女人嘅心聲，咪再衰多口喇！
女人代言人
女人好多時都係口不對心嘅動物，要佢哋講出自己嘅心底話，真係難過登天，好多時甚至畀隻佬激親，都只會「鞋口鞋面」唔出聲，不過，對於男人嚟講，咁仲弊，皆因唔知自己衰乜，真係想氹都唔得。
小記最近睇到網上有一眾女士投票，選出十大最憎男友講嘅說話，仲表明點解會咁憎，要知道女人諗乜，兄弟們就梗要睇吓啦！各位姊妹都唔可以錯過，有人代你出頭喎，仲唔快啲叫埋隻佬一齊睇，咁唔使你開口，都可以畀佢知道你嘅心聲啦！
犯女憎說話
第1 位：想唔想做（愛）呀？
因乜咁憎：乜嘢想唔想做？女人想唔想，你哋男人唔知嘅咩？咁都要問！咁問法，點答你喎，人哋怕醜㗎嘛，唔通我話好想同你曳曳咩？都唔知係咪畀個陷阱我踩，我一話想，你就話我發姣，咁點算呀？
點做至啱：女人同唔同你做係講mood 嘅，唔使講出口㗎，傻佬！既然佢都畀你摸緊囉，仲問嚟做乜？
第2 位：我勁唔勁呀？你high 唔high 呀？
因乜咁憎：做緊嗰陣已經要畀啲假嘅反應嚟滿足你，做完仲要人掩住良心講大話，真係冇你修呀！呢個問題真係無聊到嘔，即係焗我讚你勁啫！咁你過癮晒得啦，有冇理我感受？
點做至啱：完事之後攬吓、錫吓，女人就至冧喇，做乜鬼要衰多口問嘢？經你一問，反而提醒咗佢，你真係幾唔掂喎，分分鐘飛埋你添！
第3 位：你咪咁小器啦！
因乜咁憎：呢句嘢簡直係死罪啦！如果男人講呢句說話時仲要笑口噬噬扮講笑，咁就仲乞人憎添！乜你哋唔知小器係女人嘅特質嚟咩？你做男人嘅應該要有啲風度，我嬲緊你仲要話我小器，咁即係撩交嗌啫！
點做至啱：女人小器就梗嘅，你做男人就要硬食，無論係唔係你錯，都認句錯先，咁就包冇衰嘞！如果條女仲係鼓埋泡腮，咁就索性攬攬佢，包佢即刻冧晒。
第4 位：我唔啱囉！對唔住囉！
因乜咁憎：道歉就道歉啦，囉乜鬼？咁即係唔順氣啫，咁晦氣，咪道歉好過。你愈係咁「囉、囉」聲，就搞到我愈火滾，明明唔係好嬲，都畀你搞到扯晒火啦！唔該你哋檢討吓講嘢嘅語氣啦！
點做至啱：做錯嘢係要道歉，不過如果你唔係心悅誠服嘅，就咪出聲好過。
其實要道歉唔一定要靠把口，不如以一個內疚嘅表情望實佢，咁佢條氣或者會仲易順番。
第5 位：不如搵日同你去……
因乜咁憎：乜嘢搵日呀？今日就今日，搵日喎？唔使睇《通勝》擇日呀？擺明係信口開河，女人就最憎男人講嘢冇句真，一味齋噏當秘笈，講過嘅嘢唔兌現。
點做至啱：唔好睇小女人嘅記性，考試佢可能包尾，但係你講過乜佢一定記得，所以呢啲唔兌現嘅承諾就係日後吵大鑊嘅導火線。如果啲女人冇要求嘅話，男人千祈咪自動獻身應承佢任何嘢，費事自己捉蟲。
第6 位：你鍾意呀？我送畀你吖！
因乜咁憎：你都見到我雙眼發晒光啦，仲使問嘅，係有心送嘅就付諸行動，咪吓吓要人講到出口咁無癮，我開口要你送，咪搞到我好貪心咁，而且送禮係心意，我叫你送就失晒意義啦！
點做至啱：見到條女睇中啲乜，一係喺佢未開聲之前你就自動畀錢買咗佢，一係就唔好出聲扮懵，最棹忌就係口爽荷包「立」，咁唔該你收聲好過。
第7 位：我幫你吖！
因乜咁憎：廢話！要出手就嚟啦，問我把鬼咩？都唔知你係咪真係有心幫我嘅，等我答得嚟你都做咗啦！齋噏認真乞人憎，唔出聲自動自覺識做先係真男人。
點做至啱：問乜鬼吖？女人最鍾意男人少說話、多做事（喺適當時候），應該係你表現男性風度嘅時候就講少句啦！用行動嚟代替，女人仲冧呀！
第8 位：得㗎喇！得㗎喇!
因乜咁憎：成日一味話「得、得、得」，結果又係錯漏百出冇樣得，永遠講就天下無敵，做就無能為力。真係唔得，就唔好拍晒心口、認屎認屁啦！
點做至啱：一個人永遠係有希望至會有失望，你係冇信心搞得掂嘅嘢，就唔好畀期望佢，索性認句衰仔，擺明話自己唔識好過，唔好自己攞嚟衰，畀佢有位插你。
第9 位：明喇、明喇！
因乜咁憎：咁鬼唔耐煩做咩喎，既然你咁明，不如你噏一次畀我聽嘞！你無非都係想我收聲啫，家陣我好煩咩？
點做至啱：女人天生長氣，佢鍾意噏，你就畀佢噏啦，如果你意圖或企圖打斷佢，恐怕你要畀佢疲勞轟炸嘅時間會倍數咁遞增。
第10 位：是但啦，你話事啦！
因乜咁憎：好聽啲就叫遷就我，唔好聽就叫冇性格囉！答得咁敷衍，即係唔想為我花心思啫，虧你仲話愛我！
點做至啱：男人咪咁犯賤，有得畀你揸fit 嗰陣就要珍惜，唔係第日畀條女話晒事嗰陣，你就喊都無謂呀！
