引用:
原帖由 一夜狂歡 於 2023-8-20 18:25 發表
我心諗我係咪病,聽日你咪知囉,好嘞,搞掂張太,早餐食埋,時間尚早,攰攰地不如打道回府,瞓番個早覺唞足精神,再決定妟畫有咩搞作,琴晚飽受刺激,再俾老友搞亂檔,加埋張太講數,仲攰過返工,好快瞓着咗,朦朦鬆鬆之間聽到手機響起,邊個咁唔識 ...
當住我面係咁讃秋仔仲得了嘅,幾大都搞亂檔啦,我話:妳真係大方,啱啱上次背住你,喺我面前猛鬧你係八婆,唔通妳唔記得嗱。Amy似乎俾我觸動咗痛處,沉默咗一陣間,我以為成功搞散,點知答案係:呢啲已經係過去咗嘅事,純屬大家誤會,而且秋仔已經再三向我道歉,做人要有番啲容人之量先得嘅 。喂咩事呀?阿崩養狗轉性呀!正想再加鹽加醋,Amy搶先話:警告你呀!唔好再係度挑動朋友之間嘅仇恨呀!再係咁friend 都冇得做呀。咁我唯有收聲囉,死女包唔通鍾意咗秋仔?睇落唔似喎,秋仔除咗得把死人口之外,冇樣及得上Amy,搞乜東東呢?Amy接住話:一切到此為止,Ok! 跟住轉入正式話題話:林仔有啲嘢想搵你幫手,唔好托我手踭呀。哦原來有求於我,咁我唔客氣咯,我話:好呀!咁出嚟傾啦。Amy話:唔得呀!呢排好忙冇時間呀!好小事電話傾算啦。我堅持話:唔得,出嚟見面先傾啦。Amy動氣話:你好L煩呀!知唔知人地好L忙呀?我保持沉默,Amy終於抵唔住頸問:咁你想幾時吖Pk? 我答話:最好就今日啦,橫掂我放緊假。Amy諗咗一陣話:今晚九點過後喺我公司大廈門口,你等得就等啦。講完隨即收線。