引用:
原帖由 一夜狂歡 於 2024-2-3 18:50 發表
以為從此可以風平浪靜,原來唔係,過冇幾耐條靚妹又再嘈過,佢大聲話:林仔你有冇搞錯呀,幫我買啲乜嘢呀?cappucino嚟嘅,我要Mocha 呀!cappucino我唔飲呀。吊麻L煩,我話:你正話冇明確指示買邊樣喎,咁我咪買Cappucino囉,是但啦。死靚妹 ...
算自己當黑喺啦,再一次死死地氣落星記買咖啡,已經過咗午餐時間,所以人少咗好多,排得嗰兩三個,咦!前面條西裝友個背影熟口熟面喎,再望真啲,頂你原來係秋仔條pk ,我大力拍落佢膊頭度話:喂死仔!你點會喺度㗎。秋仔俾我失驚無神嚇咗一跳,即刻省我話:頂你俾你嚇L死,學人吞pok 呀,唔使返工呀?我回話:唉你唔知咁多㗎喇,哈你條死仔,學人着西裝呀!着起龍袍都唔似太子啦你。秋仔反寸我話:頂你冇句好嘢,家陣好失禮你呀pk, 係咪唔抵得Amy對我好先,羨慕定妒忌呀?我都反寸話:駛羨蒙你!行L 開啦。大家開場白互寸完一輪之後,回復正常對話,秋仔講:今日我上Amy公司度簽份僱員合約同入職紙,下星期正式返工。我問:你舊公司唔係話要一個月通知咩,咁快可以上工?秋仔答話:哦!我早個幾星期前已經遞咗信,扣減埋我未放兩個星期年假,咁下星期就夠一個月喇,嘩諗起下個禮拜就可以同Amy一齊做嘢,日日都可以見到佢面,真係爽死,呢兩晩開心到唔係點瞓得着。得戚得佢咁嘅樣,我寸佢話:小心啲呀細佬,因住食唔落哽死你呀。秋仔好定當話:你同我定啦,我啱啱先至同Amy喺下面餐廳食完晏嚟,都唔知幾好傾,相處一啲问题都冇,我話要請佢飲咖啡,陣間就欏上去俾佢,今晚仲約咗佢食晚飯,佢要同我傾啲工作細節,之後或者會同佢落吧飲嘢都未定,算啦!你唔恨得咁多㗎喇。