第十七集
不到一刻鐘，哥太醫就嚟到，佢年約三十，英俊的臉上帶有一條長長的疤痕，本來有明顯傷疤或者太醜樣，係唔可以再喺皇帝面前出現，但因為佢呢條疤痕係貴妃當年發脾氣而整傷的，皇帝就覺得哥太醫會因此憎惡後宮，所以唔會搞後宮女人，因此留低佢繼續幫後宮嬪位以下的女人睇病。但皇帝無諗過，哥太醫其實係恨皇帝…恨佢縱容貴妃草菅人命。
哥太醫仔細檢查香露後，恭敬道：「皇上，此香露以鮮花提煉，只係靠花香吸引男人，對身體無害，如果皇上喜歡，可以叫貴人或其他主子使用，但此香氣會留喺身上，皇上只要以熱毛巾加上薄荷水抹身或者浸浴，就會除去身上的香氣。」
「好! 既然有此妙品，賞!」
一直喺外面隨時侯命，等住被人拉入去拷問的，聽到「賞」字，終於放心。佢的第一步成功了。
-------------------------------------------
近三個月，李貴人的侍寢次數急升，好自然就中獎了。皇上認為李貴人「高齡」懷孕，代表住自己的勇猛，大喜過後將李貴人晉升為嬪，並賜封號為「喜」。
「恭喜喜嬪娘娘、賀喜喜嬪娘娘」滿宮的宮女太監們收到消息後，立即走到喜嬪面前道賀（討賞）
「既然你哋嚟道賀，我就唔可以孤寒喇，所有一等宮女太監賞銀二兩，其他每人一兩，待我腹中的皇子或公主出生，再賞。」
春桃帶頭道謝，「謝娘娘賞賜。奴婢就厚顏等待皇子降生帶來的賞賜了。」
「好喇，春桃、夏荷、小安子留低，其他人退下。」
待房中只剩低主僕四人，喜嬪道：「雖然本宮懷有龍裔，但呢段時間唔可以侍寢，本宮怕而家的恩寵唔可以維持⋯⋯」
小安子忙道：「娘娘可以考慮搵人固寵，亦可以用其他方法為皇上帶來不同滿足感而唔會影響龍裔的。」
「我都係諗住固寵，所以先叫你兩個過嚟。」喜嬪望向春桃同夏荷。春桃隨即滿臉通紅，但難掩眼底的興奮雀躍。而夏荷竟然跪下哀求：「娘娘⋯⋯奴婢只想服侍娘娘，待奴婢年邁時出宮回鄉。奴婢愚笨，實在唔懂得服侍皇上，求娘娘明鑑。」
「你呢個傻丫頭，服侍皇上係好難得的機會，你竟然唔要! 唉! 算啦…唔好講咩年邁時出宮，本宮幫你做主，只要你到二十五歲，就放你回鄉啦。」
「謝娘娘。」夏荷開心得不能自已，連番磕頭道謝。
「好喇好喇，起身啦。」
(待續)
明天(11/4)事忙,提早更新
