第17集
對阿穎嚟講,雙方確認關係之後,首先要做的就係在各個社交媒體放張拖手仔的相嚟公告天下,然後迎接四方八面的親友查問、探聽,雖然同一個答案講咁多次好煩,但阿穎又覺得好開心。
其次就係無聊時,可以搵阿楓出街拍拖,或者傾電話。但一個月後,阿穎就發覺出現問題了,首先係屋企人話佢間房太亂,仲擺到全個廳都係雜物。所以佢被迫取消星期六日同阿楓的約會,喺屋企大掃除,執拾的過程就發覺平時放學就傾電話,或者做下功課,放假就一早拉咗阿楓出街玩,其實有時出到街都唔知做乜,只係喺商場行嚟行去吹冷氣,或者坐喺cafe各自㩒電話,有時阿楓會帶埋notebook出嚟做功課。其實搞到自己咁「忙」係為咩呢?仲忙過之前返女僕餐廳。
於是阿穎快手執返好哂屋企的雜物,就約阿楓出嚟傾:「楓楓⋯⋯你覺唔覺得我哋咁樣發展唔係幾好?」阿穎隨即解釋近日的煩惱。
「咁不如我哋星期六日其中一日唔出街,等穎穎休息下好唔好?」阿楓提議。
阿穎都覺得咁樣唔錯,但都要搵機會撒嬌:「咁人哋掛住你點算?」
「我一CALL即到。」
解決咗一個困擾,更大的困擾在阿穎面前—就係佢的升學問題。問心,佢唔想讀書了,讀咗咁多年,真係好攰,但人人都話讀大學好重要,點可以唔讀呢?但佢真係完全唔知道自己將來想點樣,就好似之前揀ECON嚟讀,就係個個都話有用,但讀咗先知道自己冇興趣又讀唔掂,而家中學階段都話補習完勉強合格,但冇可能大學仲要搵補習嘛。如果讀完Year 1 先知道唔適合,到時轉科又係嘥錢嘥時間,最怕轉完又發現唔鍾意。
不如出嚟做嘢啦,試過咪知道自己鍾意d咩囉,就算唔知自己的喜好,至少知道自己唔接受邊D丫…好似之前做女僕餐廳,又要掃地又要做其他清潔,仲要同人爭客,太辛苦了。
或者出嚟打工兩三年,搵到自己興趣,先再讀書…而家可以打工儲錢去旅行。於是阿穎將呢個打算同阿楓講,希望佢會認同自己。
點知換來係阿楓的強烈反對,最後阿穎話:「你係咪嫌棄女朋友冇讀大學丫?!」
聽到阿穎講呢句,阿楓即時龜縮,繼續縱容阿穎的決定:「我點會嫌棄,只係唔想穎穎將來後悔…不過無論穎穎點樣決定,我都會支持的。」
成功得到阿楓的「支持」,阿穎就將呢個決定同家人講,家人當然係強烈反對啦,最後屋企人的決定係:如果而家讀大學,屋企會繼續比零用錢,但如果唔讀大學,即係出嚟社會工作的成年人,咁就要開始比家用,畢業後第4個月開始,每個月比$2000,畢業一年後,每月$5000,比唔到就自己搬走。
阿穎的家人都知道佢有點懶散的性格,所以認為要比D經濟壓力,阿穎先會認真搵工。而阿穎就覺得一開始比$2000唔算多,但之後要比$5000就可能有D問題…好彩仲有成年時間,都可以慢慢嚟。
各方面得到共識後,阿穎都有認真考DSE,仲幸運地夠分讀大學,但佢經過老師、家人同阿楓的勸導,依然堅持唔讀大學。
(待續)