紅勇士

注意: 而家開始, 只可在此post 枚o既玩法, 之前 & 之後出現o既其他留言, 一律del, 包括我自己之前o既留言!

請大家提供一些送酒劈人又好玩o既"枚"
可以o既話盡量詳細少少, 方便巴打們更容易理解.
經小弟整理後會集合一齊. 格式如下:

名稱:

可參與人數:

玩法 & 規則:

心得:

其實小弟都識玩大約十種枚, 先舉例俾大家參考.

遊戲一

名稱: 7 8 9, 飲到嘔

可參與人數: 3 ~ 無限

玩法 & 規則: 2粒骰, 在"米剛"內輪住來打"打", 先落少少酒做柏屎. 每打到總數為7, 就要加酒, 份量幾多都得, 但加酒後要再打多一次. 如打到總數為8, 就要飲所有酒o既一半, 飲完亦要再加酒, 之後再打. 如打到總數為9, 就要飲哂全部, 飲完亦要再加酒, 之後再打. 如打到7 8 9 以外其他數字, 就輪到下家打骰, 如打到孖 1, 可指定任何一位參與者飲哂全部, 如打到孖 2 3 5 6 任何一組數字, 就調轉返轉頭, 例如本來順時針, 打到孖 3之後, 下家就到逆時針接, 如打到孖 4, 則一樣調頭, 但下家要飲所有酒o既一半, 打骰者唔使飲. 另外, 如將骰打出"米剛"外, 要罰飲所有酒! 此遊戲係唔會停, 直到有人飲到嘔退出為止!

心得: 細力少少, 唔好跌骰... 其他就睇你造化啦! :cool:


[ Last edited by 紅勇士 on 2005-6-11 at 01:54 AM ]

[ 本帖最後由 紅勇士 於 2005-6-16 07:48 PM 編輯 ]

紅勇士

遊戲五

名稱: 骰仔麻雀

可參與人數: 2 ~ 4人

玩法 & 心得: 先加酒, 幾多都得, 睇你玩得幾大. 一人起莊, 打5粒骰, 其他人同一時間打4粒骰. 只要5粒骰組合有一台牌 + 一對眼, 為之食糊! 舉個例, 如果我同你玩, 我起莊打到 2 3 3 3 4, 呢度有 2 3 4 一台牌 + 3 3 一對眼, 咁我就自摸食糊, 你就輸啦. 如果我打到係 1 2 3 4 5, 由於食唔到糊, 我要打一粒骰出去, 例如我打出粒 1, 咁我而家就叫糊 2 5 兩飛! 如果咁O岩我打出O個粒骰係你叫糊O個粒骰, 例如你4粒骰係 1 4 5 6, 咁就為之出沖, 我就輸啦. 如果你入邊係 1 1 3 4, 即係叫緊 2 5 兩飛, 我打出O個粒 1 你食唔到, 咁你就要將出邊O個粒 1 拎入盎, 加埋本身4粒骰再打過. 直到有人食糊為止! 如果多人玩, 自摸就位位有份瓜分派彩. 如果出沖, 就出沖者飲, 而且仲有雙嚮同三嚮!

心得: 盡量出熟章骰, 例如上家出2, 你入邊有2就出2, 除非叫緊3飛, 例如你本身 1 3 3 3 4, 咁就梗係博啦! 是關之後有人打出 2 4 5都有糊食! :cool:

[ 本帖最後由 紅勇士 於 2005-6-14 12:30 AM 編輯 ]

紅勇士

遊戲七

名稱: 話事骰

可參與人數: 2 ~ 無限

玩法 & 規則: 先準備一個大杯, 有咁大就得咁大! 基本上同話事啤一樣, 只有少少唔同. 每人一個盎, 5粒骰! 先落柏屎做底! 大家同時間打骰, 每次打一粒骰, 打完之後將粒骰放出來, 最大者話事加酒, 1為最大, 之後 6 5 4 3 2 為最細. 加酒之後遊戲繼續, 大家再打骰, 又係最大者話事, 加酒, 抽粒骰出來... 重複以上動作, 打哂5粒骰最後鬥大, 最細者為輸家, 要飲哂所有酒! 最後大至細排列同話事啤有少少唔同, 話事骰最大排列為 1 2 3 4 5 > 2 3 4 5 6> 5條 > 4條> FULL HOUSE > 3條 > TWO PAIRS >  單骰. 遊戲中途無得退出, 開笫5粒骰之前問有無人投降, 投降輸一半論 (全部酒O既一半), 另外, 如果你睇唔順眼某人, 你可以O係未開到笫5粒骰O既時侯同佢SIDE BET, 其他人可以置身事外. 但如果要求SIDE BET者同人地O既骰係一樣, 咁係無打和, 當要求SIDE BET者為輸家!

心得: 唔好亂咁爆尻人 (SIDE BET), 除非你同佢好大仇口, 如果唔係俾人儲一鋪勁多酒爆返轉頭就無謂. 中途見D骰唔靚, 拿拿聲飲一半算, 留得青山在, 那怕無人飲? :cool:

[ 本帖最後由 紅勇士 於 2005-6-14 01:01 AM 編輯 ]

紅勇士

遊戲二十三

名稱: 射龍門

可參與人數: 2 ~ 無限

玩法 & 規則: 一個做龍門 (即係庄), 其他人做射手 (即係閒). 每人都有機會輪住來做龍門. 做龍門者要用3粒骰, 1個盎, 做射手者則要2粒骰, 1個盎. 做射手者首先押酒, 幾多隨意, 買大賠大, 買小賠小. 押好酒注之後, 龍門開始打骰. 先打一粒骰做一邊柱, 再打2粒骰相加數做另一邊柱, 共打2次骰. 如笫一次骰係4, 笫2次骰係 3 5, 即一邊柱係4, 号一邊係8. 咁就開始到射手打骰啦! 2粒骰只可一次過打, 如果打中相加數為 2 3 9 10 11 12, 咁就射出界, 射手就要飲所押o既酒, 如果打中 4 8, 咁就係中柱, 要飲double! 如果打中5 6 7, 就係入波! 龍門要飲射手所押o既酒, 另外如果係打中 2邊柱之間o既中位數, 即係 6, 咁就係射穿網, 咁龍門要飲射手所押o既酒o既 double! 有某d情況, 比賽係唔成立! 首先, 如果2邊柱o既數字係連住, 好似一邊係6, 另一邊係 2 3 (5), 或者1 6 (7), 2柱之間無入波機會, 龍門要重新再打笫2邊柱o既骰, 1粒骰o個邊可以保留. 另外, 如果2柱之間只有一個入波機會, 例如一邊係3,另一邊係5, 咁比賽仍然生效! 出界, 中柱一樣照飲, 但如果有入波 + 射穿網  (4), 咁龍門就要飲3倍射手所押o既酒!!

心得: 計算過概率後, 表面係龍門著數d, 所以每人最多只可打3個庄,但黑起上來, 隨時係咁俾人射穿網! :cool:

[ 本帖最後由 紅勇士 於 2005-6-14 06:50 PM 編輯 ]

紅勇士

如再有新枚而呢度無o既, 請再提供. 每個可加5分!
但請唔好再o係呢度留言, 直接打上去就得! 否則會直接刪回帖而不獲補分.

多謝咁多位提出有用資料! 感激