爛賭鬼好少買報紙睇, 多數上網睇波料.
尋日買左報紙, 睇到馬會近排波仔生意同收入好左, 真係令爛賭鬼諗返以前傷心事.
依家同以前一樣咁爛賭, 睇怕直到兩腳伸直都改唔到.
以前輸錢, 借錢, 追數, 還錢呢種生活過左成年, 真係好慘, 好辛苦.
賭得痛苦, 生活更苦.
想講比大家聽爛賭得以前條路點錯, 如果你依家同我以前差唔多, 就好快啲收手, 唔係就返唔到轉頭.
月頭出糧, 一半還債, 留一半黎賭追數, 無留返足夠生活費, 更加唔駛講比家用.
賭之前就淨係諗點贏至夠清晒幾萬蚊數, 拎起份波經刨賽績,
一日幾十場由下晝賭到凌晨,
下晝幾場日職, 先落一注三串一$500,
九點十點歐洲大聯賽開波, 又揀幾場買兩三條三串一每注$500,
凌晨二輪歐洲波, 再買一條三串一$500
天光巴甲又買一條三串一$500.
爛賭鬼驚輸, 唔敢全晚劈一注, 五百買單場中左無用, 過三關有三四千至睇得上眼.
心諗咁多條過關, 中一條就唔駛輸, 中兩三條都執幾千.
結果梗係同爛賭鬼作對, 成日中兩場過唔到關, 一晚白果輸兩三千, 黑仔期周末兩日已經輸五六千. 之後就無錢賭, 買一二百蚊注, 過夠四關, 搏贏返兩三千至買返大.
月中月尾再輸就循環借錢, 攪到還極都還唔完, 銀行個個月收息同手續費勁金.
最後攪到十幾萬數開始愈還愈多, 出糧還晒比銀行無錢再賭.
有晚同位前輩飲野, 佢點醒爛賭鬼, 第二日即係跑去銀行申請月供貸款清卡數.
每個月一樣要還半份糧, 不過無得循環借, 迫自己咪賭咁大.
前輩贈爛賭鬼千祈咪駛旨意靠賭發達, 賭你唔死算你叻.
佢話賭場最驚細注長命客, 同佢鬥長命仲要蝕埋燈油火臘, 唯有靠抽水佔啲甜頭.
前輩叫爛賭鬼千祈唔好賭馬仔, 狗會十蚊抽兩蚊, 賭仔夾錢比狗會, 明知每買十蚊都要比人拎走兩蚊, 仲賭咪係傻仔, 遲早比狗會吸乾.
之後爛賭鬼每個月得返半份糧去生活同賭, 唔駛再比人追數, 聽前輩講同狗會鬥長命, 平注單場一百蚊玩, 結果真係每個月都唔駛輸, 半份糧駛到月尾都仲有錢淨, 仲夠請老母飲幾次茶.
兩年後還晒筆數, 慣左平注賭, 啲錢鬆動晒, 開始儲到錢, 人生有返希望.
