呢個故仔，係一個節奏極緩慢，似水流年嘅版本。
甜嘅部份，可能會好少，而且可能要build up好耐先至出現。
心急想即刻睇甜嘢嘅話，可以睇其它故仔。
亦都請唔好問個女幾時出場、幾時攪埋個女呢啲。
呢個係之前嘅
女朋友個女嘅現實嘅殘酷版，係近乎95%真實。
亦因為寫嘅時候，會有好多情緒，我可能會更新得好慢，亦可能會寫寫吓唔想寫落去。
故仔嘅重點，係初期嘅美好，同後期嘅唏噓，之間嘅反差。
正如故仔中嘅女主角後期所講，我連自己嘅聽日都唔知道，只能夠有一日活一日。即使故仔寫到最後，都冇人可以講到係咪真正嘅結局。
呢樣，就係人生。
* * *
一
2017年1月19日，假如時間可以停住，我可能想停喺呢段日子。
呢日，我如常喺尖沙咀揾地方食晏。
我，51歲，係一間好大嘅跨國工程顧問嘅一個部門主管。有錢講唔上，但我同家人一齊做嘢嘅收入，加上佢正職之外有啲生意，做得還可以，足夠兩個人舒適地過日子。
我做開嘅行業已經轉型，而家喺我呢個行頭裏面，已經好少好少公司會請我呢種位，所以我抱住做得幾耐得幾耐嘅心態。
安逸、舒適，但極度沉悶。
唔想人生就咁樣，想有啲真正值得追求嘅嘢。
大概早十年前已經讀咗另一啲嘢，諗住攞返啲認可嘅資歷去做啲想做嘅嘢，但試咗好幾年，依然搵唔到門路做到。
嗰日食晏，我經過金湖茶餐廳。
一間好典型嘅香港地道茶餐廳，我有時嚟嘅，貪佢快，食完可以行吓至返工。
入到去，見到一個衣著、打扮幾優雅，但一睇就知係內哋嚟嘅女人。
唔知點解，有一種好想同佢搭訕嘅感覺。見佢坐嘅卡位對面有位，就搭檯。
留意吓佢啲衣著，喺冬天嘅厚衫之下，依然感覺到佢心口相當有料。
佢食緊碟嘢，突然嗌，好辣。
跟住，佢望吓我嗰碟，問，你呢碟係咩嚟？
餐蛋飯，我話。
我試吓用我啲爛普通話撩佢，妳係嚟香港做嘢定係嚟玩㗎？
佢話係喺附近一間大嘅金融機構做嘢，佢喺深圳嗰邊住，每個星期嚟三日。
佢做嘢間機構，同我公司，屬於同一物業，只係唔同大樓，但係樓下係俾商場連住嘅。
我話，或者我哋可以約一齊食飯、飲嘢，有時間我帶妳去吓香港唔同地方？
都好，反正喺香港冇乜朋友，當識多個朋友。
於是佢俾佢電話我加佢whatsapp，同埋俾佢微信我。話，我叫做小予。
對於從來冇試過喺街識女仔嘅我，能夠咁樣喺街抄到個唔識嘅女仔嘅牌，已經好滿足㗎喇，唔期望會有啲咩。
返到公司，就試吓加佢微信，但係加唔到，於是whatsapp佢我話加唔到佢。
佢一路冇覆。
心諗，唔通流嘅？失望之餘，就諗住只好由得佢。
5:07，忽然收到佢whatsapp。
唔好意思，一路上training，所以覆遲。你俾你微信我，我加你，唔該。
仲以為電話號碼攪錯咗添，咁妳加XxxxXxXxxx啦。
好。稍後我哋微信，我先返深圳，祝妳順利。
佢整咗個開心笑公仔。
跟住第日，我撩佢傾偈。
佢問我職業、興趣，我話我鍾意音樂，佢問一定係西方音樂喇，我話爵士音樂。佢話，好時尚，佢以前學傳統聲學。
小予話我有藝術氣質，問我係咪做我呢都有特殊氣質？
我問妳係咪想話我古怪。
跟住連續幾日都撩佢傾偈，呢幾日佢唔嚟香港，因為25號，下個星期三，佢要去灣仔考個試。
我問，假如嗰日考完試唔介意等我一陣，我同公司食完年飯之後我帶佢喺香港逛吓。佢話佢安排考完試之後探吓佢香港嘅叔叔之後嚟搵我。
* * *
2017年1月25日，嗰日佢要去灣仔考個試，我約佢放工食飯，同喺附近行吓。
下午1:58，我whatsapp佢，話，希望今晚7:30左右可以過嚟。假如妳考完試唔嫌太夜的話，我帶妳喺九龍呢邊睇吓啲地方，方便就話我聽啦。
佢一直冇覆。
18:11覆，話啱啱先考完試，啱啱至開機。
考試順利嘛？
順利過關。
咁就好，一陣去邊度搵妳呢？
稍為等我一陣，仲喺路上，唔好意思。
唔緊要。妳搭咩嚟，一係我過嚟等妳？
我仲喺灣仔，我哋邊度見？
我而家喺尖沙咀，公司食年飯，我7點半離開，可以喺海港城見。
好，咁我去尖沙咀。我今日狀態唔好，好憔悴，會唔會唔禮貌？
唔緊要，我有啲想再見到妳。
過咗陣，佢覆，已經到咗尖沙咀，只係肚有啲唔舒服，喺洗手間，你稍為等我一吓，唔好意思。
我而家已經出咗嚟，可能妳太緊張所以肚唔舒服。
我喺新港城嘅洗手間。
我去揾妳。
去到新港城，我訊息佢，我已經喺新港城嘅地面，妳慢慢。
我落嚟喇。
終於，再見到佢面。
佢着得好得體，一副行政樣子，有啲富有人咁嘅樣子。
佢話唔食嘢住，我就同佢喺尖沙咀海邊行吓，睇吓維多利亞港嘅夜景。
喺文化中心外面，佢大概講咗佢嘅背景俾我知。佢前夫係香港人，佢哋個女好細個嘅時候跟爸爸嚟咗香港，之後喺香港大。前夫死嘅時候，小予帶個女返大陸照顧，早兩年送咗去外國讀書。
佢俾佢同個女合照我睇。我之前喺小予微信見過呢個女仔啲相，係個廿歲出頭嘅姑娘。早幾年仲有啲土，去咗外國之後時尚起嚟。
我有諗過，去外國讀書都幾貴，唔知道佢搵幾錢，定抑或一路有人照顧。
佢拍吓視頻放上微信朋友圈。
逛吓逛吓，嚟到太空館呢邊，見到一座雕塑上面俾人寫啲說話掛上去。我同小予寫嘅時候，有兩個菲律賓人向我問路，我回答佢哋。
我自問以冇喺外國讀過書嚟講，英文幾ok嘅。小予似乎對我呢樣嘢幾impressed。
我哋本來想去星光大道行吓，去到發現嗰度封咗。於是就從星光大道外圍行到漆咸道嗰邊再過返嚟星光花園。
同佢睇明星手印，佢對港星有多少認識。
然後就喺中間道花園兜番落中間道，就喺呢度轉番出彌敦道嘅時候，我膽粗粗喺街拖小予。
佢俾我拖幾拖之後甩開我。
我再拖。
再接再勵之下，佢索性住我手臂。
於是我手臂feel到佢波波邊，果然好有份量，而且軟熟，係真嘢。
我話，都冇食晚飯，食啲嘢啦。
於是喺加拿芬道一間要落地下嘅銀龍坐低，小予食菜、飲湯。
為咗趕口岸閂之前過關，佢唔可以逗留太夜。
佢送咗一盒喉糖俾我，同埋俾5百蚊我叫我幫佢香港張電話卡充值，我就送佢去搭地鐵。
分手冇耐，係夜晚11點零3分，我發個訊息俾佢。
希望妳順利過關，返到去講聲我聽得嘛？
4分鐘後，佢覆，必需嘅，多謝你，朋友。
我唔好意思再打擾佢。
1月26日凌晨26分，佢覆，安全到達處住，勿念。
（未完待續）
[
本帖最後由 dcat20 於 2020-8-14 07:19 編輯 ]
