香港大部份人既工作同消遣模式，可能都會係一星期工作、周末就和另一半輕鬆渡過，睇戲、行街、食飯、買野、仲有時間嘛，可能報個course進修，找自己興趣，去做個運動。而我因為女朋友忙，性生活不算密，那麼一年中安排去既旅行，就會使我份外期待。
我?我係邊個?我係Dragon，非常貪玩，愛挑戰，有點壞，只係………而家既我仲未清楚另一個自己。係旅行後，和女友鬧得不愉快，因為性生活上，我地非常之不咬弦，當時既我，會責怪自己，為什麼令唔到她更愛我，我係唔係真係太大食，我係唔係唔吸引唔夠魅力，性方面我應該點做先好?好多好多問題，我都搵唔到答案，直到上網睇左篇文章後，我發現，原來網上可以有好多野都會搵到我想知我需要既答案，分別在於…….有無答錯。
同女朋友有唔開心，唔出奇，慢慢磨合嘛。她始終是我將來打算一起既人，其實，結左婚會係點既呢?關係同感情應該會更好嗎?如果唔係，咁點算呢?一個人時，特別鐘意問埋d白痴問題，而家唔夾既性生活，日後先解決，定而家就要諗定呢?
某天……係網上看了一份討論，大概傾既就係講緊2個感情好好既人，結左婚，先發現性生活好唔協調，慢慢更影響感情，同日後相處。文中樓主並不活躍，反而當中討論既人就相當啜核抵死，真係咩野都講得出。做咩埋單前唔試清楚件貨、功能不符，QC把關不力、樓主唔係7天，係幾年試用期都未搞清，怪不得人等等。講真，當中有些講中我的要害，令我份外留意各人的意見，其中有部份，提出既更開始令我懷疑自己，所以，開始左我留言既第一步。
我:
耐左，真係會淡而唔想行埋嗎?
點樣知道對方無興趣?
如果我想，對方唔想，可以點做?
其實點為之……. 有技巧?真係可以令到對方想同自己搞野呢?
咁家陣究竟太快唔好，定太耐唔好啊?
太多太多白痴既問題，由於網上唔見樣，大家又唔識，反而令我更肆無忌憚地發問，直到問:
如果感情係好，但性方面真係唔夾，好想一齊應該點做，唔好講咩戒口或分手，有無實際意見呢? 當問題提出後，大家都無點玩野，都會提出意見，而Cherry，更會反問好多野，令我去反省同埋檢討。Cherry，後生人妻，有一個小朋友，大型連鎖店度做Sales，我所知佢既事不多，只知感情上佢比我見多識廣，好後生就結婚。及後我發現佢字裡行間，原來同老公亦鬧不和。我點知?因為係佢身上，我發現我仲有好多唔了解既兩性問題可以問到，所以決定同佢email來往，係，係email，Oh…….sorry，呢件回憶，係發生係……..智能電話還未發達的年代、亦即遠古之時…………… 當年，溝通其實係勁唔方便，但係無比較下，感覺又OK喎。
由於大家會PM同email，一開始既對話，好多時一來一往成粒鐘先果幾句，大致開場白都係:
您好，哦?妳已結婚多年?我?我未結啊……
其實結婚耐左，係會咁樣? ( 講緊既係，Cherry同佢老公耐左，咩都變得例行公事，而家更慘既係，佢老公原來有左第2個。 )
我地既網上傾談，維持左一段頗長時間，直到一個問題，
我: 妳成日講我無問題，但有咩方法，可以令我更有吸引力，令我女朋友有釘一聲既新鮮感呢?
Cherry: 都唔係無方法既，如果你真係想知，就要睇你肯唔肯。
我: 唔好賣關子啦，妳知我一定肯架?定你想講，要去健身變大隻先?
Cherry: 無聊，我意思係，如果你真係想知，我地約出黎見啊。
我: 哦?妳OK?
Cherry: Why not?
以下呢段，係我等左好耐想打，但一直都無機會打既對白。我同Cherry，最初只係朋友傾，無諗其他野，無諗住有機會，完全只係朋友為出發點，試問又點會知，係佢身上，令我學到咁多野呢………. ( 通常打得呢段野，最終都係會講食到曉飛，食唔停口呢。 )
女下屬
同Cherry傾計，其實每日只係佔我好少時間，因為當年我地仲係用pm或email而已。而當時好老實講句，工作可以帶俾我好大滿足感，所以我算是非常投入工作，時間上也頗緊張同忙的人，由於公司唔夠人用情況下，我要求多一位幫手。
好快，公司就請到了一位新人俾我，好記得新人黎報到時，男同事都在討論，到我助手入我房來介紹時，
Amanda: Dragon，佢係Bella。
Bella: 你好，早晨………. ( Bella有點戰戰兢兢。 )
我: 妳唔使太緊張喎，輕鬆D，Amanda同妳講左妳要做既野未?
Amanda: 仲未，介紹埋Bella俾其他同事識之後，就開始。
我: OK，黎緊有個展覽，跟住落黎因為要趕份Catalogue，同時個新design要放埋落去但又未完成，都幾多野整，醒目D，唔明就問Amanda啦……
Bella: 係，知道，我會努力既。 ( 講完，Amanda示意Bella係門外等她，Bella就行返出去，Amanda就關好門坐下。 )
我: 妳覺得新人點?
Amanda: 我覺得OK既，講野爽朗，人都好快反應同細心。 ( Amanda係我好幫手，佢有種能力就係，可以好短時間摸清對方個性8,9既能力，而且仲幾準。 )
我: 哦?咁高評價?
Amanda: 你覺得呢?
我: 我只睇到佢靚喳，希望真係幫到手啦，妳知啦，佢要頂到妳返黎喎，預產期係2個月後? ( Amanda同我拍住上已2年，佢有左BB，2個月後放產假，令工作量百上加斤既情況下，我不得不請人。 )
Amanda: 係啊，放心啦，我會係請假前教晒Bella野，再唔係叫埋另一部門Mani黎幫手跟都仲得。
我: 都OK既，仲有時間，我都唔係太緊張。
Amanda: HAHA…….時間既野從來都係我幫你緊張左你唔知遮。 ( Amanda說完笑笑口就走了，她再帶Bella介紹俾其他人識，而我都忙工作了。 )
工作是繁忙的，黎緊因為公司有展覽，設計部的同事要忙為公司產品影相作新Catalogue用之餘，同時亦要盡快完成新產品，好讓展覽期間作主打招徠。設計部門連埋我都是男性為主，我不在時，過往都是靠Amanda的老練食住班同事，雖然設計的人不是有點宅，就是有點脾氣，但對手是Amanda，他們都會客客氣氣。那麼換來的是Bella，又會如何呢?講真，我沒有太理會，始終這是辦公室最基本的生存技巧，要懂求存更要懂自發。
做我地呢行，晚飯後還要OT，對設計部的人來說早已見怪不怪，以往都是Amanda留下做一些執漏工作的，而我就把守最後一關。今晚我從自己房行出來，望住Catalogue上做核對同時，頭沒抬起望人就叫。
我: Amanda，妳俾我呢幾份都OK了，無錯，其他呢? ( 此時有人遞上接下來的頁數給我。 )
Bella: Dragon，收住多5張先得嗎?其他既我仲check緊。 ( 哦?係Bella?我心想。 )
我: 點解妳係度既?啊，係喎，呢個星期開始，Amanda OT唔到喎。咁夜仲未收工既妳?
Bella: 其實我OT左成個星期架啦，係你無留意我之嘛。 ( Bella在笑住說，我卻尷尬地心想倒沒發現。 )
做我地呢行，零食係唔少得既，我會私下俾錢Amanda，買返多少軍糧以備OT之用。設計部的同事，都會俾腦袋放空，抖抖氣，就去茶水房度飲下野，食少少當take個break。今晚我都走左去搵野食，係走廊時，就聽到有講有笑既聲音，再入到門口前之際，聽見既係，我設計部2大Cool Man係度笑，要呢兩條友笑，可謂非常之難相處，唔係佢地要求高，而係佢地好騎呢。
柒男: 妳都學得幾快，唔係人人聽得明我地呢行D術語。 ( 柒男，宅男設計師，非常騎呢，唔鐘意人掂佢D野，更討厭外行人聽唔明佢講野。邊個咁醒俾佢讚呢? )
Lawman: 啱，跟Da姐好，全公司我係服佢同Dragon。 ( Lawman，唔係真係叫Lawman，而係轉數快既設計師，串咀，但做事有要求，超~攞命。Da姐係Amanda，咁邊個同佢咁好傾呢?我好奇。 )
我: 哦，唔怪之得個位唔見你地兩個，原來係晒度。 ( 此時我入到房，見Bella正正遞上零食俾佢地。原來兩大怪人讚既係Bella。)
Bella: Dragon，咁夜真係仲飲咖啡? ( 此時Bella邊問邊取去我手上既杯。 )
我: 係，夜晚我飲咖啡唔會瞓唔著架，放心。 ( Bella見我入黎，識問呢樣，足證佢做過下功夫，Amanda教得好。而Bella可以駕馭到兩大傻佬，亦真係唔錯。 )
當我返自己房時，此時傳來收email既信息，係Cherry send來。大意就係，後天中環某地鐵站出口見。
我的回覆係: OK。
和Cherry見面前知道對方咩樣嗎?唔知，今次係我第一次會約人見面，緊張嗎說不上，但心情是興奮的，因為第一次咁樣既型式見人嘛。我比原先的約會時間早到，這是否禮貌不重要，重點是……我在想，要是我太樣衰，佢見到唔對路，都可以走頭，再事後email我講忽然有事太忙黎唔到。希望唔會咁啦，點知，約會過了約10分鐘後，我真係電話響，是Cherry。
[
本帖最後由 dragonbone 於 2020-10-9 16:34 編輯 ]
