親密關係
和Bella開展了關係，我沒有多想將來會點。反而咸濕的我有點回味當晚，還在想如果和Bella再有機會，下次就可以試不同的東啊西呀，很多很多幻想似的。我相信師兄們如果識到一個內外都吸引非常的女生都會一樣吧。
但有一點我是份外留意的，是我當晚有無整親Cherry般弄痛Bella，但看來又沒有，那麼即那晚我的斯文是有用的啦，當時的我，是這樣的調整自己技巧，是有點白痴，當時卻是唯一途徑，但原來…….. 日後俾Bella笑我太溫柔。
而當我回港時，Margaux第一時間問起我的情況，我則平常心說出和Bella的發展，講真，Margaux不單知道Cherry和Bella的事，就是我和表弟Stephen見面時酒吧遇上的女生，還有拳會的小師妹，她都清楚，和她說話，有時就是開心抵死。
Margaux: 死咸濕仔，都估你會咁。 ( 講緊既係同Bella有了關係一事。 )
我: 吓，但我出發前，妳唔係鼓勵我去馬架咩?
Margaux: 點知你，我見你成個旅行都搞唔成嘛，點知你突然咸濕仔上腦又搞得掂喎。
我: 喂喂，明明次次搞唔成都俾妳睇死，而家成左妳D語氣又唔同晒架。
Margaux: 咁我諗住如果你又搞唔成時，如果要去做運動可以call我嘛。
我: 咁我同Bella行埋左遮，我要做運動時都可以搵妳架嘛?
Margaux: 唔知喎，可能我唔得閑呢?
我: 我都未約，妳就唔得閒?
Margaux: 可能架，我好忙架，唔係得你一個人約我架。 ( Margaux忽然擺起姿態來，我莫名其妙。 )
我: 係係係，咁打機呢? ( 我知Margaux鐘意打機，講陪我做運動，都係吹水既多。 )
Margaux: 打機……. 可以諗下。
我: 唓，打機又得閑既。
Margaux: 咁即係幾時打先?
我: 下，近排我好忙喎，我呢幾個星期都要返國內跟野啊。
Margaux: 死仔包撩完又縮，忙你個頭啦，你9成掛住點扑Bella好過啦。
我: 頂妳啦，真係忙架。
Margaux: 咪俾我估中，你9成諗緊黎緊呢幾星期過夜時可以玩D咩。 ( 居然俾Margaux估中……. 我唯有死撐。 )
我: 我邊有，咪當我係妳果D男朋友先得架，我同佢地唔同level架。
Margaux: 乜男人會有例外架咩? ( 男人……. 都真係好少例外，我認。 )
我: 都……都有既。
Margaux: 喂，Bella係唔係好正架? ( Margaux忽然深入起話題來。 )
我: 吓…….. 點答啊………. ( 我腦裡不禁泛起和Bella Make Love時她的表情，身材，叫聲，還有她整晚細心溫柔的種種。 )
Margaux: 有咩點答遮，咁你爽唔爽，想唔想有下一次先?
我: 點止，想有下10次添。
Margaux: 10次?分10晚呀?
我: 頂妳…….. 1晚呀好無?
Margaux: 你得唔得呀?
我: 睇對象既遮，Bella一定得，對住妳可能難D。
Margaux: 你又未見過我，你又知?我D bf不知幾得啊。
我: 對住妳，我有信心同妳1晚打十舖機多D，Haha……..
Margaux: 吊，你家陣當我係男人呀?
我: 剩係成日講粗口，就已經唔可能當妳係女人啦。 ( Margaux知道我唔鐘意女人講粗口，但佢唔係我女人，大家只係朋友，我當然唔會有咩要求，而互窒，係我地閑談中不少的。 )
Margaux: 唓，家陣你眼中得Bella係女人既遮。
我: 都唔係既，Cherry啦，我女友啦，係妳…………..
Margaux: 係我唔似女人嘛，下嘛?死仔包!!!!
我: Haha….. 咩遮，家陣妳bf當妳係女人，仲好索既，咪得囉，我當唔當妳係女人，有咩所謂遮……… 我當妳係我機友咪夠囉。
Margaux: 哼，機咩先?你一次都仲未叫我上黎打機。
我: 係係係，喂，妳上次提果隻喪屍game，我去買，買左叫妳黎打，OK?
Margaux: 哼，買左先講啦，男人喎，講就天下無敵，做就…..
我: 有心有力，放心放心，我一忙完即刻去買，再誠意邀請妳呀下。
Margaux: 睇下點。
同Margaux傾下嘈下，我無太擔心，事源我地不嬲都鐘意串下窒下對方，唔會真係會傷感情，我是珍惜Margaux這位身份特殊的朋友，因為她是唯一知道我鮮為人知、內心和現在情況另一面的人。而且她也沒有說錯，黎緊再上國內工作，我內心是有一種期待，期待再和Bella在宿舍相處，過那有趣又特別的同居生活。當然當然，和Margaux的打機約定，我是記得的，所以我打算操完拳後就去旺角買Game。那我對Margaux的感覺，和Margaux的關係現在是什麼嘛?她就是一個什麼都知道我的，卻大家未見過對方，但又是好夾的親密關係呢。
而剛才提及拳會的小師妹，佢其實同我都幾投契，可能因為我地算同期入門，但我其實有少少怕怕地佢，唔係因為小師妹有咩問題，反而係因為師兄們就是喜歡教她，無他，正所謂充軍三年，豬乸都變貂蟬，係男人世界為主既拳館，姐手姐腳的小師妹就是受歡迎。而當我和其他師兄對打完，take break時，我同一位師兄講起打機，正講到有咩喪屍Game正時，小師妹就突入發言。
小師妹: Dragon師兄，聽你頭先同師兄講一陣你會落旺角買Game喎。
我: 係啊，咩事?
小師妹: 我想跟埋你一齊去。
我: 買Game妳又有興趣? ( 會打機的女生，如果加埋外表討好，真係會份外加分架，我認係打機世界既我，係宅宅地。 )
小師妹: 有架，我頭先聽你講買喪屍Game嘛，我想買俾我男朋友。 ( 啊，原來已有男友，但都正常，小師妹樣子甜美，係得人喜歡類型。 )
我: 妳唔叫妳男友買?
小師妹: 我想送俾佢嘛。
我: 好女友喎，咁好啦，一陣操完門口等。
而當我操完沖埋涼準備走時，小師妹已企係門口。沒了運動裝，換回便服的她整體更不錯，現在認真看，她也算是青春可人，怪不得那麼多師兄會埋她身。我倆乘地鐵後便往旺角信和，夜晚的信和人流非常之多，現在回想，當年旺角真係好好行好多野睇，信和、兆萬、好景、先達夠我行一晚，當然，而家同小師妹一齊，太多人既地方我今晚就唔會行了，但當小師妹與我同行時，其實我發現一樣野，只係我又無講太多，直到買埋隻Margaux喜歡的Game後。
我: 師妹，其實妳唔係想跟我黎一齊買Game既，係嘛?
小師妹: 吓，點解咁講?
我: 我見妳對呢度都完全唔熟，好似未黎過咁，而且頭先買Game時，妳問都無問就買左，妳知玩咩架咩隻Game?
小師妹: 其實我想黎睇下呢D地方。 ( 我地邊走邊傾，最後去了朗豪坊飲野。 )
我: 呢D地方?咩地方?
小師妹: 其實我未黎過呢D咁雜既地方，我男友都唔會帶我黎。 ( 及後我知，小師妹原來係有錢女，太平民既地方佢極之少去，所以佢十分之好奇。即旺角中心，信和對佢黎講，係好有神秘色彩又引人入勝既地方。 )
我: 噢，我成日黎呢D地方架，我又……唔覺咩野雜喎。
小師妹: 頭先D舖頭，我聽得多，真係未見過。
我: 哦?妳唔慣，定係咩?妳今次去過，下次可以叫妳男友帶妳去嘛。
小師妹: 其實……. 我問過，佢唔肯，所以我先想黎，但一個人又唔敢。
我: 吓，即佢就會自己黎呢度，但又唔肯同妳一齊，所以妳好奇? ( 小師妹點頭，最後我明白，原來小師妹男友都會黎呢D地方，每每都好似我咁講，講睇Game買Game，但就偏偏唔會同佢黎，而佢男友理由係呢D地方好雜，咩人都有，叫佢唔好一個女仔黎。 )
小師妹: 其實平常我都無機會黎，如果唔係每星期黎拳館練習，可以一個人返屋企，我根本唔可能靜靜雞黎呢D地方。
我: Haha…… 明白明白，估唔到我覺得好平常既地方，今時今日仲會有女仔純情到好似去左紅燈區咁。
小師妹: 你無講錯啊，我有D估到點解我男友唔帶我黎了，因為頭先有D舖頭賣咸濕野…………. ( 哦，係，當年(現時都係)有好幾個舖仲有4仔同埋成人玩具賣。 )
我: Haha…… 咁唔係既，其實果度太多人，妳個樣又唔錯，可能佢怕妳被人抽水呢?果度真係好多閑雜人架嘛。
小師妹: 哦?真架?
我: 真架，我每次上親去，都係自己一個啦。
小師妹: 我意思係……..師兄原來你覺得我唔錯架? ( 小師妹露出笑瞼。 )
我: Haha…… 妳錯重點呢~~~~ 但其實旺角仲有好多啱妳女仔行既地方架喎。 ( 就係咁，小師妹約了我下次可要帶她去旺角別的地方行。其實我在這描寫小師妹，是因為她原來很多東西都未見未玩過未試過，但她就已經應承左男友的求婚了，在我而言這有點可惜，因為太快了吧…….. Haha……. 她在我身邊出現的時間不多，卻是有點提醒的作用，日後再和大家慢慢詳談。 )
https://www.youtube.com/watch?v=Ua3jXzpeh7E
