愛我別走
回港後，我在準備手信，有給家人的亦有給女友的，有給自己的當然亦有買俾Margaux的，想一想，早前在英國買給Cherry的禮物，買時在英國寄出，數數日子應該這幾天她會收到的了，唔知佢開唔開心呢?唔知大家試過送禮物係以寄既方式給對方未呢?那心情真的很難耐，一來好想對方快點收到，二來自己要裝作若無其事的和對方閑聊時又忍住唔開口問，那真的要很懂掩飾心情才可以。還記得回港後真的很忙，很多事情要整理之外，香港亦有很多公私事要處理，Bella嘛，她家有急事，所以請假回台灣了，走時我送她往機場，她攬了又攬的不捨之情很有趣，
我還說: 做咩咁唔捨得既??唔捨得唔好走囉。
Bella: 衰人，仲玩。 ( 淚水汪汪的Bella叫人由憐生愛，我也不想。 )
我: 又唔係唔見，記住到埗報平安呢。 ( Bella沒有多言，感性地微笑拭淚，平時睇愛情片稍有感動位都會喊既佢我都不感出奇，直到她和我深深一吻後，就回頭登機了。 )
那麼Margaux呢，早已知她人在外地，原因是什麼當然唔知，一切都有待回港才清楚。至於Cherry，我一回港已和她電話短信，一切都很正常，我在期待她收禮物那一刻。直到回港第3日，Cherry的短信，方便打給你嗎?我回:可以喔。
Cherry: 喂喂，做咩返黎都唔打電話俾我架? ( 咦，Cherry沒有我預期的驚喜語氣，唔通未收到………..??)
我: 有少少忙啊，公司好多野積存左要處理呢。其實我都好想搵妳架啦。
Cherry: 係咩?去左歐洲咁耐，好多事發生咩??見客果度點啊?
我: 都叫順利，今次去左幾個地方嘛，都叫有唔錯既收穫添。我有買手信俾妳架，妳要唔要先? ( 手信我一早係英國時寄左，而家咁講，係因為要俾Cherry知我有準備手信但扮見面先俾佢。 )
Cherry: 一切順利就好啦，其實我有野想同你講架。 ( Cherry沒有預期的興奮，那種距離感，叫人很不自然。 )
我: 哦?妳發生咩事啊?無事嘛?
Cherry: 無事無事，放心，只係想報告最新情況你知。
我: 好啊，妳講啦。 ( 我仍是喜悅的語氣，當然大致已估到是什麼一回事了。 )
Cherry: 我同PC係番埋一齊啦。 ( PC，Cherry的老公，如前言，佢老公因有第3者，所以Cherry同佢冷戰，更搬了出來一個人住一排。 )
我: 係?好事啊，佢有無對妳好好先? ( 我在善意的問。 )
Cherry: 有，佢應承左會對我同小朋友都做番好老公好爸爸。
我: 有無我咁好架? ( 我大約已估到Cherry的下三句，所以我在緩和氣氛，令她放鬆。 )
Cherry: 呢個世界，唔會有人好似你對我咁好架。
我: HAHA，傻妹，但現實係PC對妳好先係最重要呢，咁妳幾時搬番去?
Cherry: 其實我已搬左番去同佢一齊住了。
我: 咁咪好囉，俾時間PC好好表現，俾個機會自己同佢好好磨合啦。
Cherry: 哦……. 知道。
我: 仲有咩心事? ( Cherry在欲言又止，好明顯仲有野想講。 )
Cherry: 不如我地以後唔好見囉。 ( 雖然估到，但仍有點shake。 )
我: 傻妹，妳想以後一條心，係嘛?我當然無問題。
Cherry: 係，我想試下只對佢一個，如果我仲同你見，我怕我真係會忍唔住呢樣比果樣比較。
我: Haha…… 放心，我明喎，其實我都贊成架。
Cherry: 喂喂，你可唔可以唔好咁明事理遮……….
我: 吓，即係點啊?
Cherry: 你咁樣，我好似好衰咁囉。 ( 飛我?HAHA….. 我真係無咁諗呢。 )
我: Haha….. 咁愛我就唔好走啦。
Cherry: 喂呀，唔准一黎就呢句架。 ( Cherry嫌我太重火力，HAHA。 )
我: 妳係唔係想我講唔好唔見，我唔捨得啊?
Cherry: 唔…….又唔係，雖然我知你想我同PC係番埋一齊，但你咁樣，我又好似唔知點咁樣……….. ( 女人就是矛盾，自己放低，卻好像不想太易放低。 )
我: 傻妹，妳係唔係諗多左呢?其實我地唔見，但妳有咩都仍然可以搵我架嘛，我係度，唔會走左去，亦唔會唔覆妳架喎。
Cherry: 咁…….都好D。
我: Haha…… 妳仲想點呢?
Cherry: 其實我都唔知，只係……. ( Cherry在模稜兩可，好搞笑。 )
我: 傻妹，放心啦，我仍然會好關心妳架，OK?
Cherry: 唔……..
我: 妳有咩都隨時搵我啦，開心唔開心都得，我OK架。 ( 我知男人無興趣聽女人講佢同第2個男人好，但事實我無咩所謂，唔係我唔再重視呢個女人，而係正正因為我緊張佢，所以佢好定唔好，我都樂意知道。 )
Cherry: Dragon，其實你真係好好……. ( Cherry靜了片刻 ) 你份手信，不如….. 你送俾其他人啦。 ( Cherry不想分開了還討便宜。 )
我: 傻啦，買俾妳架嘛，放心啦，其實…… 我寄左俾妳，但妳今日既反應，應該仲未收到。 ( 我意思係Cherry隻字不提，佢應該未收到才會咁樣反應。 )
Cherry: 係啊，原來你寄俾我?我未收到呢，好貴重架?我俾返妳好無?
我: 唔緊要啦，小禮物黎喳，就當係我祝福妳同PC好番一齊既禮物啦。
Cherry: Dragon，真係多謝你。 ( 這句多謝，包含無限意思，多重意義。 )
我: 傻妹，黎緊有我同PC都關心妳，妳會好開心既，放心放心。 ( 我聽得出Cherry在靜靜飲泣，事實大家都明這段關係係時候要畫上句號，再不捨，都要走，都要放手。 )
接下來的一兩天仍是返工放工，唔知大家係唔係呢?你既朋友如果和你年齡同心態相近，真係好多野都會前前後後陸續發生，講緊既係我其中一位好友結婚了，地點係尖沙咀的洲際，我將會幾個月後被要求做伴郎和MC，今次好像……已是第2次了，Haha……. 新郎新娘都係我在加拿大識的好友，說真的我非常開心和期待。
在接連幾位好友都說會準備在這幾年內結婚，我當然也有被問起，事實我也有一定打算，也在靜靜地起革命的計劃。
在心情愉快的一天同時，返工中途的中午，我又收到Cherry短信:找你啊衰人。我: OKOK……. ( 咩事我係衰人呢?我無做咩喎。 )
Cherry: 衰人。 ( Cherry傳來開心語調的在罵我衰人，不是責怪呢。 )
我: 係係，係度咩事?
Cherry: 點解既? ( Cherry有點開心不過來。 )
我: 咩…..咩野點解? ( 我猜到一二，戲當然要交足繼續玩野。 )
Cherry: 吓，唔係你送架咩??唔會嘞?
我: Haha…… 如果個盒既啡色包裝紙，老老土土，就係我寄架啦。
Cherry: 唓，係囉，玩野，個名明明寫住你架嘛。
我: Haha….. Sorry，鐘意嗎?
Cherry: 鐘意啊，超超超鐘意添啊，但點解既…… 我明明講左你仲送…..明明睇一次你都記得 ( Cherry意思係上次食飯佢只係望一眼我就記得，講左少少我已上心識搵呢個系列。 )
我: Haha…. 我記得妳鐘意嘛，我係英國時，一見到就買左同寄喇。 ( 講完，靜了半晌，我又聽到Cherry的默默飲泣聲。 )
Cherry: 點解你要對我咁好既? ( Cherry意思係講左大家日後做不見面的朋友。 )
我: 咁上次同妳食飯，我見妳望住果個牌子既袋，好似好鐘意架嘛，咁刻意，就黎盲既都見到喇。
Cherry: 人地邊有特登刻意喎，同埋望下之嘛，都估唔到你真係會有機會見到果個series既新款同買，仲係果度寄黎添。 ( Cherry已任由自己邊哭邊和我談。 )
我: 傻妹，妳望一眼，我就會記係心裡面架啦，但買到又送到都係好彩喳。
Cherry: 好彩咩啊?
我: 妳咁耐未收到，我以為好似上次送花咁，又寫錯地址送唔到俾妳啊。 ( 上次Cherry生日，我係agnes b買左花，卻因誤會寫錯左地址，搞到送花果個人逐間店搵先見到Cherry，勁唔好意思。 )
Cherry: 今次你無寄錯，只係…….勁誇張同尷尬囉。
我: 咩意思? ( 此時Cherry邊回復心情邊講。 )
Cherry: 今早收件時，好大盒喎，我D同事起哄走晒埋黎睇問咩野，咁我邊拆佢地邊估係鞋定衫，佢地又問我邊個送，又問係唔係老公俾既驚喜。
我: 妳答情人囉，過氣被人飛左果隻。
Cherry: 衰人…… 玩野呀嘛。
我: Sor sor，妳繼續。
Cherry: 連平時好串果個同事都行埋黎睇咩事，點知一拆個包裝紙見大大個牌子已嘩嘩聲，到見埋個手袋時，呢個款香港仲未有架，佢地成班仲驚喜過我，即時搶左拎黎自拍，而家仲未俾番我。
我: Haha…… 咁搞笑。咁串串貢同事點先? ( 果個人平時會蝦下串下Cherry，又鐘意曬命，自認全公司最靚女。 )
Cherry: 佢都問我點買到，係唔係水貨，邊個送點寄黎，佢好勁，即睇寄件人係Dragon啊，就問我係邊個。
我: 佢真係與別不同，人人睇袋，佢就睇名睇邊個送邊度寄。
Cherry: 係架，佢唔係一般女人，佢睇唔起我地全公司既女人架，HAHA…… 但今次我睇出佢好鬼羨慕。 ( Cherry說時很搞笑感覺是眉飛色舞，我喜歡心情愉快的她的語氣。 )
我: 傻妹，最緊要妳鐘意。
