引用:
原帖由 dragonbone 於 10/2/2023 17:34 發表 
其實而家國內既女士，已經唔係等男人出手，佢地都有要求亦會眼角高，同樣地，佢地睇啱，亦會主動出手。
有時我會諗，如果男人enjoy沉浸係呢D情慾關係，都真係天堂黎架，相反男人好專心咁揀一個，呢D先難得呀喂，因為只揀一個，你會揀做老 ...
龍師兄睇得好透徹，當年阿星仲喺榴槤之國嘅時候，間唔時都要去青島飲下啤酒同耍下嶗山昇龍霸，啲後生女同事就算唔係同阿星有過任何接觸（唏，講緊工作上嘅接觸呀，唔好諗埋一邊先得㗎），都會跟同阿星有接觸過嘅同事走埋嚟同阿星一齊食晏。
龍師兄都應該知啲工廠飯堂郁下都坐到1000幾百人，個個都走埋嚟同阿星食午飯，就真係會食到阿星變肥佬喇，成個飯堂咁鬼死闊落，啲女仔就走埋嚟凑熱鬧。佢哋飯堂真係大得緊要，又乒乓波枱又羽毛球場咁，呢個又問阿星打唔打乒乓波，果個又話要阿星陪佢雙打羽毛球，你睇阿星個款就知阿星冇乜運動，郁兩下就會死㗎啦。
好彩阿星冇劉華咁靚仔，城城咁跳得，學友咁好唱功，係唯一一樣高過阿Leon咁啫。想當年喺倫敦做嘢，21歲嘅阿星見到29歲嘅阿Leon，啲面口真係有返咁上下（黑），喺後台睇阿學友嘅倫敦演唱會又真係非常之感動，唐人街巧遇劉華食完午飯喺街行都真係好驚喜，係冇見過城城舞動全個倫敦中國城啫。
後生女好奇啲叔叔係有嘅，而且真係夠膽死約埋你收工去飲嘢仲要夾錢請埋你先攞膽，唉，阿星知阿星自己老餅，個個都唔攞現錢出街阿星仲走去唱咗咁多人民幣，不過當時如果唔係Cassy話同佢哋去飲嘢阿星真係唔敢去，喺公司飯堂你班女仔都咁主動，真係嚇到阿星呢個大叔有啲怕。
當然，可能完全因為阿星係一個喺英國住咗好耐又住喺榴槤之國嘅香港叔叔一個咁麻柒煩嘅人，所以啲同事先好奇究竟係乜水啫。最好笑嘅係，阿星嘅普通話真係普通得可以，年輕女孩個個聽完笑到花枝招展，簡直好似聽完楝篤笑咁，阿星同佢哋講其實阿星同佢哋係同鄉，不過係唔識講咁解，佢哋就更加笑到唔識停。查實有咩咁好笑呢？有個住喺榴槤之國嘅香港同鄉真係咁高興？
老婆型嘅情人，會唔會俾人吟？
索靚正嘅情人，隨時唔放人喎。
真係要揀，阿星真係冇乜所謂，又唔係來者不拒嘅，只係好似抽獎咁，你永遠唔知抽到啲乜，而且有時你唔抽，仲返而有驚喜，所以真係靚有靚好，索有索妙，賢淑有賢淑嘅呱呱叫😬
[
本帖最後由 star_platina 於 2023-2-10 20:41 編輯 ]
