(警方介入調查既第五天)
由於距離太遠,根本無法偷聽火Sir與阿媽既對話,我只能暗中觀察依位洋人督察既外觀,從白皙既膚色,應該屬於歐洲英國白種人,而且一副標準既白人輪廓,五官立體分明,眼窩深,眉骨高,鼻樑高,面形窄長,身高比火Sir高些少,目測接近一米九,但身形明顯比火Sir瘦削,年齡約四十至五十,一副非常嚴肅既模樣,但憑著一頭濃密既金髮,深邃既眼睛,俊俏既面孔,我相信年輕時係絕對係溝死女既俊男!
當阿媽與火Sir溝通後,將二人安排到士多房卡位座,相信阿媽亦會前去,於是我早一步到達水吧深處,等待偷聽。
與此同時,由於餐廳裡突然出現一位洋人督察,成為唔少客人討論既焦點,眾人議論紛紛,開始研究依位洋人既制服肩上既奇怪五星圖案,有點類似紫荊花,花外邊亦出現一個嘉禾圖案,亦有人猜測佢既來意!
樓面上已經有幾枱既客人開始大聲地討論,表達自己意見,眾說紛紜。
「喂!發左乜事呀!係咪間鋪俾人爆格呀?」
「喂!條鬼佬得粒花,無柴嫁喎!係咪最廢果堆?」
「屌!花梗係勁過柴啦!三粒咪最撚大囉!你曉唔曉嫁!」
「喂!睇黎有大事發生喎!」
「可能幫親食野啫!咪咁八卦啦!」
當阿媽沿路走到士多房期間,耳邊不時聽見客人熱烈討論,更有客人主動上前慰問關心,但阿媽只係微笑點頭,並無作出任何回應,隨即前往士多房。
到達士多房後,當May姐見到火Sir與洋人督察後,臉上明顯流露出緊張既表現,直到目前為止阿媽仍未知道火Sir身旁既洋人督察來意。
阿媽向著洋人督察微笑點頭後,隨即坐下來,並坐在二人對面,同時間火Sir立即向著May姐介紹身旁既洋人督察。
「May姐!依位係我西九龍區既大Sir!叫Mr.Ro⋯⋯」
但火Sir未介紹完,旁邊既洋人督察搶先伸出一手,示意停止,隨即向著阿媽禮貌地伸出一隻長滿小毛既性感右手,然後講出一句流利既英式口音廣東話。
「你好!周小姐,我係陳火既Boss,我叫Russel ,Russel Robinson !」
當阿媽聽見洋人督察用著流行廣東話自我介紹,同時又知道自己姓周時,臉上有一瞬間呈現出驚奇既表情,但下一刻仍然禮貌地伸手與洋人督察握手,微笑著回答「你好!Ru⋯⋯唔好意思我唔係好識讀個英文名,叫你Mr.Robinson得嗎?」
二人握完手後,各自放回原位,但我發現洋人督察既雙眼偷偷喵了阿媽緊身T恤既胸部位置,不過只不過一瞬間,隨即露出親切笑容再次開腔「Sure!周小姐,今次黎搵你既目的,我諗你已經估到!」
阿媽望了一眼火Sir,隨即望回洋人督察問「又係果單賣淫案呀?我真係幫你地唔到嫁!」
「Well!I totally understand your situation, ... I meant... 我⋯非常明白周小姐既難處!」洋人督察微笑著回應
但接著洋人督察繼續用著帶有英式口音既廣東話講「但周小姐, you know, I meant, 妳知唔知妳依家 situation 好危險!You are in great danger!」
洋人督察說話時,雖然可能母語關係,不時夾雜一些英文詞彙,但亦不忘補充一句中文翻譯,相信阿媽勉強仍能理解。
May靠著椅背,雙手交搭在胸前,翹著二郎腿,一副悠哉悠哉既表情回應「呵⋯⋯有幾危險呀!家下乜事都無!仲有!你地警察查案咪自己查囉,你地幾萬人,無理由下下黎為難我依個小市民黎嫁!」
但洋人督察並無因為阿媽既態度而擔心,反而面不改色,嘴角永遠帶著絲絲微笑,一副非常紳士既模樣再次解釋「周小姐!我地Police唔係無做過野,我地曾經派過多個 Under Covers希望接觸依個賣淫組織,But依班女Victims 賣淫既地點根本就無固定,可以嫖客既Home,又可以自己既Home!」
當洋人督察講完,火Sir隨即再補充解釋「係呀May姐!今次同以往賣淫集團有好大分別,以往賣淫集團通常係一些按摩場所,夜總會裡面進行,我地只要委派臥底探員收集證據證明該場所從事賣淫,而且有證據證明色情場裡既人所擔任既角色,就可以提出起訴。」
但當火Sir向著阿媽解釋時,旁邊既洋人督察臉色忽然變得難看,但火Sir並無察覺自己洋人上司既面色變化,繼續向著阿媽解釋案件「但今次依單案比較麻煩,無論我地派出男臥底或者女臥底,根本就接觸唔到依個幕後老闆,就算男臥底同依班賣淫婦女接觸,最多只能起訴女方從事賣淫活動,就算女受害人願意透露某人係幕後老闆,警方亦要蒐集證據證明某人係老闆既實質證據,否則女方所講只能當作傳聞,最麻煩係依班賣淫既婦女,直到目前為止,都未有一個願意透露幕後老闆既名字身分,一直堅稱係自願性質出來接客,可以想像依個幕後老闆控制依班婦女既手段非常可怕,所以我地警方一直束手無策。」
火Sir講解時,阿媽非常認真聆聽,但當火Sir講完後,洋人督察臉色變得更加難看,向著火Sir咬牙切齒地講「陳!火!你到底講完未!家下你係Boss定我係Boss!你記住你係under我!上司講野時,下屬一定要shut your mouth up!」
突然間被自己上司無原無故地罵,火Sir只能無奈地講「Yes Sir!」
但洋人督察似乎唔太滿意火Sir既態度,再講「陳!火!依家無你既事!Get Out!」
火Sir立即緊張地解釋「大Sir!May姐係我朋友黎!我覺得我有必要提供意見!」
當洋人督察聽見火Sir再次違背自己既命令時,臉色黑如碳,向著火Sir咆哮講「Get Out!This Is An Order!」
於是火Sir無奈地講了一句「Yes Sir」後,離開士多房位置,而卡座裡就剩下May姐與洋人督察二人。
而阿媽臉上流露出些少恐懼,明顯被剛才一幕驚嚇,坐姿忽然變得端莊起來,表情亦變得認真。
當我見到性格一向強朗火爆既火Sir居然被上司趕走,突然感覺到外國人既階級觀念非常重,作為下屬係上司面前,簡直就好像狗一樣,除了服從命令外就係服從命令!可怕!