但May姐面對著兩位古惑仔囂張跋扈,絲毫不退讓,仍然力爭到底,更以霸氣語氣講「你頭先非禮佢,必須同佢道歉!唔係我一定報警!」
金髮古惑仔囂張既表情回應「非禮佢?邊個見到呀?」
May姐橫視一周,望著全場所有客人講「你地有無人見到頭先金髮個仆街非禮我身邊依個女仔?」
全場客人忽然間靜止下來,金髮古惑仔臉上露出得意神色,雙手攤開,做出一個非常欠打既表情。
但突然間有位手握拐扙既婆婆,雙眼有嚴重既白內障,舉起顫抖既手,向著前方,用著沙啞既聲線大聲地講「我⋯見到!」
金髮古惑仔隨即用著兇狠眼神投向婆婆身上,更以惡劣語氣回禮「收嗲啦!死老野!」
金髮古惑仔語音未落,又有另一把女聲音出現「我都見到!」
一位斯文女客人舉手後,最遙遠卡座位上,一位大叔亦舉手,隨即又有一把聲音一隻手舉起「我都見到!」
接著下來既畫面,簡直令人感動流淚,每當出現一隻手,就出現一把聲音,一把接一把既聲音逐漸響起,原本每位客人都視若無睹,但May姐一聲令下,全場既每位客人,就算正在用餐既客人都放下碗筷,加入聲援行列,為阿倩抱打不平。
「我都見到!」
「我都係!」
「仲有我!」
「我都見到!」
同時間當阿倩望著眼前既畫面,雙眼不由自主地流出淚水,更用力握緊May姐既手臂。
依刻兩位古惑仔臉色難看,表情呆滯,但仍不甘示弱地講「痴鳩線!」
但May姐勢不繞人,以凌厲既眼神投向二人,以霸氣十足氣勢開腔「道歉!道歉!」
與此同時,全場客人亦跟隨May姐,向著古惑仔大聲喝道「道歉!道歉!道歉!⋯⋯⋯⋯」
過百位客人,嘴巴一直重複二字『道歉!』,如此浩瀚既聲勢,團結一致,目的只為一個!向依位只得十幾歲既學生妹道歉!
面對著幾十把不滿聲音,兩位古惑仔依刻那有黑社會既影子,剛才囂張氣焰,不可一世既氣勢已經消失得無影無蹤,兩個大男人緊貼在一起,猶如小鵪鶉一樣,有種落荒而逃既感覺。
銀髮古惑仔眼見勢色不對,暗地裏向金髮講「走啦大佬!」二人隨即往正門逃走,但May姐神色自若,嘴角微微上揚,任由二人離開。
正當二人準備從玻璃門離開時,玻璃門自動拉開,隨即傳來一把威嚴又充滿震攝力既聲音。
「想去邊呀!兩位!」
當兩位古惑仔見到眼前既依位身高一米八以上既男人,臉色蒼白,全身顫抖,雙腿不由自主地向後退。
「火⋯⋯火Sir!乜⋯⋯乜咁得閒呀!」
沒錯!依位身高超過一米八,一身澎湃結實既肌肉將T恤撐到緊繃,令無數古惑仔聞風喪膽,避之則吉既男人,正是人稱火爆既火Sir!
火Sir臉帶笑容二人,逐步向前逼近,而兩位古惑仔亦逐步退後,霎時間再次退到原本既位置。
「點呀!想同小妹妹道歉,定同法官道歉!」火Sir平淡地講
此話一出,兩位古惑仔瞬間面向著阿倩,以90度彎腰鞠躬,不卑不亢既語氣講「對唔住,靚女!」
May姐向著阿倩問「阿倩,你接唔接受佢地既道歉呀?」
阿倩面對著此場面,有點受寵若驚,縱使二人已經道歉,但仍然感到害怕,只係微微點著頭「嗯!」。
但May姐隨即向著火Sir講「火Sir!佢唔接受喎!」
阿倩搖著頭,拉著May姐小臂講「唔係呀!Auntie⋯⋯我⋯⋯」
阿倩並未講完,火Sir右腿出現一下殘影,兩位古惑仔瞬間跪在阿倩面前。
「道歉俾D誠意先得嫁!」
「對唔住!小姐!對唔住!小姐!求你大人有大量原諒我地!」金銀髮古惑仔跪拜形式,誠心誠意地懇求阿倩原諒。
從未面對過如此場面既阿倩,而且受著如此莊重既跪拜式道歉,阿倩腦海一時間反應不來,表情呆滯地「哦⋯⋯」
於是May姐向著火Sir微微點頭,一個眼神後,火Sir隨即二人講「仲唔走!」
「係!多謝小姐!多謝老闆娘!多謝火Sir!」
兩人更向著三人道謝,隨即狼狽地離開。
當兩位古惑仔離開後,May姐隨即向著全場既客人道謝。
「好啦好啦,無事啦!麻煩囇大家!」
「一場街坊!應該既應該既!」
「唔好咁講!May姐!」
依刻餐廳裡再度回復平靜,客人亦再度用餐。
而阿媽亦向著火Sir講「又麻煩到你添!」
火Sir舉起一手,傻笑著「傻啦!咪講依D!整杯凍啡,飛沙走奶!」
於是我入左水吧,為火Sir炮製一杯齋啡後,隨即送到火Sir枱上。
而阿倩坐在May姐旁邊,May姐一副苦口婆心地講「家下你知,幾危險啦!叫你返上樓又唔返!」
當阿倩望著May姐既眼神時,雙眼冒出心心眼,猶如阿媽既小粉絲一樣,一副崇拜又仰慕既態度地講「Auntie!你岩岩型爆呀!」
May姐白了一眼,以訓話既口吻講「以後呀!你放學返黎唔換衫!唔準你落黎呀!」
阿倩羞愧地點頭,隨即向著火Sir微笑著問「阿Sir,岩岩唔該你呀!不如我叫阿偉整D野你食呀!」
火Sir望了阿倩一眼,隨即又以疑惑既眼神,望了我一眼,彷彿好像知道我同阿倩既關係,平淡地望著我講「好呀!少爺仔,整碗餐蛋麵,走葱熟蛋。」
阿倩微笑著講「咦!咁咪同我一樣!偉!我又要一碗!」
於是我又進入水吧,親自落廚炮製兩碗餐蛋麵,由於一碗係阿倩,一碗係剛才為阿倩出頭既火Sir,所以必須用心炮製!
煮麵既過程,望著遙遠既卡座,三人大聲講細聲笑,令我非常在意到底聊什麼,但要煮出一碗極品超水準既餐蛋麵,過程非常繁複,唔能夠中途離開,亦唔能夠馬虎了事。
八分鐘後,大功告成,當我將兩碗極品餐蛋麵送到枱上,香氣四溢,阿倩與火Sir急不及待拿起筷子。
但當火Sir吃了一口後,隨即用奇怪目光投向我身上「少爺仔,乜解究!平時食既餐蛋麵,同依碗唔同既?」
阿倩聽見,幸福地笑著,火Sir絕對知道當中因由,明知故問,所以我笑而不答。
由於餐廳裡仍在營業,我同阿媽不時離開座位,一邊工作一邊聊天。
而且發現阿倩與火Sir二人不時聊天,二人相差廿年居然有話題,令我非常妒忌,到底有乜傾乜呢!有機會一定要質問阿倩!
當阿倩吃完後,由於我怕兩位古惑仔會向阿倩報復,所以送阿倩回家,但May姐知道後,一口拒絕,更親自送阿倩上樓。
我只能欣然接受!從剛才阿媽保護阿倩一刻,我知道其實並非討厭阿倩,而且非常疼錫,之所以阻止我地一齊,因為阿倩係好女孩,好女孩不應該陷入一段三角關係,應該擁有一段好感情好婚姻。