引用:
原帖由 lulu1238899 於 2021-11-21 11:32 發表
哈哈哈哈,女人有時真係好矛盾,呢段对話真係好真實感
除咗矛盾之外,亦好反覆。
* * *
3.6.5下3中
小詩問,點解始終冇辦法約到你出嚟?
我話其實我唔識打golf。
佢話,哦,好小事啫。
我問做乜咁想叫我見妳啲世叔伯?
佢哋個個都好成功、超有錢,你唔想擴闊吓人脈咩?
我驚同佢哋傾唔埋啫。
佢哋好好人,而且我話你係我好好嘅朋友,唔使擔心。
佢哋已經知道我?
係吖。
妳同佢哋講我啲乜嘢?
冇,就話你係我好欣賞嘅人。
我真係摸佢唔透。喺佢再三邀請之下,就應承同佢嘅一個世叔伯飲茶。
小詩喺朗廷酒店唐閣book咗個包廂。
餐飯食得好拘謹,雖然小詩講到佢世叔伯幾友善,我感覺佢對我有啲質疑,直至我表示我喺工作上認識小詩,大家只係商務朋友,我當佢係後輩咁關注,佢至好似稍為友善。
佢話同小詩爸爸係生死之交,所以有責任關心一吓小詩嘅幸福,有可能誤會咗我,唔好意思。
聽到幸福兩個字,我大概估到啲嘢。
我表達我對教養嘅睇法,話應該俾細路自己碰吓受吓傷。
佢話但係唔係任由細路受傷。
我對佢嗰種乜都識嘅態度有啲反感。好多做生意叻嘅人都有一種通病,就係因為做生意叻,就覺得自己真係乜都識、乜都叻。
尤其佢嗰種「我去過好多國家見過好多嘢,對好多嘢都有睇法」嘅態度令我唔係幾想同佢講嘢。
食完飯,送咗阿叔走,我就同小詩行海港城。
我試圖問佢同世伯講我啲乜,但佢掛住睇衫。
行過三宅一生,佢話,呢個係我好欣賞嘅設計師,就入去睇。
佢話,我覺得你嘅氣質好似呢個品牌。
你唔覺得我比較英式、傳統?
我係話氣質,唔係話着衫。
唔係好明你所指。
簡約、文化。
哦。
佢睇中幾件上衣,就逐一試着出嚟問我覺得點。
我話,都好睇。
佢話,信你品味。然後就一口買哂,找數要兩皮幾。
拎住袋衫出嚟,喺海港城逛吓逛吓,逛到頂層觀景台,見到陽光下嘅維多利亞港一片光輝,感動到走上前欣賞、影相。
我哋合照吖?佢問。
我話好。
佢就繞住我手臂,笑得好開心咁。
我諗起同小予識冇幾耐同初初一齊嘅時候。
手臂接觸到佢胸部,並冇小予嗰份豐滿嘅彈性。
佢影完相之後,就當正冇嘢咁一直繞住我手同我行,一直行落去天星碼頭。
我連同佢討論大家係咩關係嘅機會都冇,就俾佢繞住手行。
我想搭渡海小輪,你陪我好嗎?
妳架車泊喺邊?唔使攞車咩?
今日冇揸車出嚟。
喺碼頭等船嘅時候,佢突然拖住我手,然後挨喺我膊頭上。我覺得咁樣唔多妥,必需要同佢攪清楚關係。
正當想開口,忽然收到訊息。
我第一個諗到嘅係小予,但原來係樂怡。
哥,拍緊拖嗎?
有啲事發生。
咩事?
我一路有將小詩嘅事講俾樂怡知,就講俾佢知剛剛嘅事。
樂怡話,我覺得你應該媾上海妹,佢咁有錢,你媾咗佢就可以有錢照顧阿嫂。
小詩忽然喺我旁邊問,同邊個傾偈呀?
朋友啫。
哦。
詩…
唔?
我哋…
你唔想同我做朋友?
唔係…
咁就好喇,唔使刻意講啲乜嘢。唔好介意阿叔講啲嘢,佢係咁樣。
小詩講完,再次挨落我膊頭。
我一時心軟,又或者,其實我都喜歡佢嘅,就冇再講嘢。
上船嘅時候,佢拖住我。
喺船上,佢講佢嘅嘢我聽。
喺大陸,爸爸管得好嚴,根本冇機會識男朋友。嚟香港讀大學,識咗第一個男朋友,大家都好規矩咁拍拖,冇做過過份嘅嘢,雖然我好想體驗吓。阿叔知道咗,驚個男仔貪我屋企有錢,就叫人搵個男仔屋企人講,個男仔就唔敢同我來往。冇錯,我而家喺呢間公司做嘢,係我爸爸嘅企業旗下嘅業務,所以我至可以咁後生坐上嗰個位,不過我係靠實力先至坐得穩…
我試圖同小詩講清楚,於是打擾佢,妳完全唔知道我嘅狀況…
小詩故意無視我嘅說話,繼續講,我從來唔輸俾人,無論讀書、做事,我都做得好好,喺公司嘅表現已經證明咗我嘅能力,阿叔唔會再打攪我嘅朋友。
落船嘅時候,佢一直拖住我行。
你送我返屋企好嗎?
行路上半山?
可以嗎?
行咁多路,妳習慣嗎?
我平時有做運動、有行山。
但今日妳着高踭鞋喎。
我ok。
好。
拖住小詩,穿越中環嘅繁華街道,行到皇后大道,佢開始繞住我手臂。
搭行人電梯時再冇拖手或繞住,我企喺佢後面,試吓貼實佢,佢並冇抗拒,我就從後面抱住佢。呢招我初初識小予嘅時候用過,嗰陣我同佢仲未確認關係,但幾乎日日都一齊。有一日我哋食完晏之後,去中港城外面嘅平台對住維多利亞港自拍,我又係咁樣貼實佢佢後面,手從後面兜上前抱住佢腹部。當時小予不但冇抗拒,仲笑得好開心。
一從行人電梯出路面,小詩即刻企返我旁邊拖住我,於是我哋沿干德道並肩而行,一路上再冇講話,去到天匯入口,佢望住我,問,想上嚟參觀吓嘛?
我掙扎咗半秒,話,下次先吖。
好吖。佢好爽快咁回應,話,返到屋企發訊息俾我,唔好喺街上野。
好。
我轉頭就走,心諗佢咁細個,就算做到發展商高層,如果唔係有家底,邊度嚟咁多錢住天匯?就開始考慮樂怡講嘅嘢。
有訊息入。
喺邊度?
係小予,我大喜。
同人客食完飯,妳做緊乜?
同小S喺銅鑼灣做緊facial,小S一陣要返公司做嘢,我好掛住你。
嚟搵妳好冇?
你話會帶我去做spa嘅,搵到地方未?帶我去。
我搵到一間,唔知人哋而家有冇booking。
你打去問吓。
我知道一間喺銅鑼灣同天后邊沿,有雙人房,私隱度極高,而且係全女師傅,好啱情侶同房。我刻意搵間咁嘅spa,一心諗住喺外人面前同小予肉帛相見。我打去問吓,佢哋話剛好有人客除消咗booking,你哋個半鐘後嚟唔嚟到?我問小予,佢話好,我就即刻趕過去。
去接小予途中,小詩訊息嚟。
返咗屋企未?
返咗喇。
你走後我先至醒起其實時間仲早,本來仲可以行吓,食個晚飯,想見你多一啲。
下次再見都得啫。
好,今日好開心。
咁就好。
你呢?開心嗎?
開心。
星期一放工,我想同你晚飯,好想再見你喇。
好,星期一臨放工再約。
去到渣甸街,按照小予俾嘅地址搵到間facial。等咗陣間,小予同小S出嚟。小予一見到我,就叫我老公。小S喺小予身後靦腆咁望住我。
佢哋找數時,小予手機突然響。
肥佬打嚟,話嚟到樓下接佢哋。
我有啲㷫,問,佢點會知道妳哋喺度㗎?
小予好委屈咁話,佢車我哋嚟嘅,我本來話做完facial會同小S去玩,佢話去元朗朋友屋企,所以我就諗住約你出嚟。點知佢咁陰險,突然話嚟話就嚟,仲話我同小S去邊度可以載我哋。
妳話女仔行街食飯,唔方便男人跟住咪得囉。
你正話都聽見,我話我同小S去玩,佢係都要嚟。
小S話,我諗佢信小予唔過,所以突擊。不如一陣我哋同肥佬講,我同小予去做spa,如果佢堅持送我哋去,就俾佢送。你話個地址我知,先過去嗰度等我哋,我哋隨後過嚟。
唯有係咁。
於是我先落樓,離開間舖頭嘅時候見到佢哋兩個望住我。
喺大廈門口兜口兜面見到阿B喺架車外面等小予,見到我出嚟望一望我。
希望佢唔認得我。舊年8月尾佢俾錢小予想同小予一齊,小予收咗錢之後冇啋到佢,9月晚晚同我一齊,有一晚肥佬喺小予屋企樓下監視,見到我送小予返屋企。希望嗰晚條街暗,加上距離遠佢唔係好睇到我咩樣。
我去到天后間spa,先入房,同店員講我朋友隨後嚟。
但係等咗大半個鐘,音訊都冇,我亦唔敢訊息小予,我同店員講照計鐘。
等咗差不多9個字至收到小S訊息,肥佬唔俾我哋嚟,佢夾硬話要請我哋食飯,我哋而家同佢一齊,小予唔方便訊息你。我本來要返公司做嘢,都返唔到。
我有啲㷫,就問小詩,妳做緊乜嘢?
喺屋企。
食飯未?
正想食。
不如我過嚟同妳食?
太好喇。
(未完待續)
[
本帖最後由 dcat20 於 2021-11-22 09:26 編輯 ]