引用:
原帖由 惑感惑 於 2021-4-9 00:03 發表 
好正，快啲再 update
引用:
原帖由 fattg 於 2021-4-9 09:40 發表
好正，我都睇到好心噏！希望珊姨早啲返嚟！
呢幾集將會暫時抽離一吓。
* * *
3.6.1
呢幾集會少甜。
先交待番老豆同予姨嗰嘅故事嘅背景。
老豆同予姨嘅故事開始時嘅現實版同
呢個故事一開頭直至第5版
第47個帖有90%相似。
予姨之前喺大陸投資失敗，由一個有少少錢嘅女人變成一無所有，朋友介紹嚟香港做工。
佢嚟香港做嘢大概1年識老豆，自己嘅收入加上老豆幫助少少，供佢同前夫生嘅女婷婷學費之後僅夠生活，咁多年一直冇積蓄。佢同老豆一齊兩年幾開始遇上工作困境，生活、財政越來越艱難。當時老豆自己嘅事業都遇到困難，加上阿媽監管佢嘅財政，老豆幫唔到予姨。
予姨走投無路之下去做苦工，僅夠養活自己。
佢同老豆一齊三年，偶然埋怨老豆唔可以同佢正常拍拖、過時過節要自己搵節目，期間好多有錢人追佢佢都守住同老豆嘅感情冇接受到，係希望老豆有一日會離婚娶佢。
老豆心裏面好想但一直冇咁嘅打算，因為佢唔想傷害阿媽。
我問老豆，妳愛阿媽多過予姨？
係親情，責任多過愛，而且妳阿媽好脆弱，我怕佢情緒崩潰。
呢段時間，予姨對老豆有好多怨言，經常喺屋企喊。
老豆話，有好條件嘅人想對妳好，妳考慮吓，講聲我知就得喇。予姨就更加嬲，覺得老豆捨得佢跟第二個，唔想負責任、唔愛佢。
當時我只係唔想佢受苦，我好唔捨得佢嘅。
予姨一直有好多人追，呢啲人不乏好有條件，佢哋請予姨去貴嘅地方食嘢、去游艇河，但予姨愛老豆所以之前兩年一直拒絕呢啲人。嗰年佢開始考慮搵個人照顧。
予姨去見人，最初有同老豆報告，後來覺得好大心理壓力。佢唔想有壓力，開始唔講俾老豆知，同啲人喺電話裏面傾。
有個太子爺，Don，細予姨10幾年，好鍾意予姨，知道予姨生活困難就幫予姨交租，仲提出包養：假如予姨應承，佢先俾幾十萬首期，然後每個月俾家用，予姨乖乖哋跟佢兩年再送一間公屋俾予姨。
當時予姨諗法係幾十萬到手之後就即刻返大陸再同老豆交待。
臨傾成條件之前，太子爺知道咗予姨有男朋友，佢最憎人呃佢，就封鎖咗予姨。
除咗Don之外，仲有一個叫做周天淵嘅人，一個老頭係沙田一間酒店高層，同埋一個60幾歲嘅工程公司老闆，佢叫予姨叫佢做阿B哥，係個肥佬。
其他人都只係想包養，予姨唔想無名無份做人二奶。得肥佬單身，冇仔女。佢好鍾意予姨，想娶佢。
我知道妳唔鍾意我，但我好鍾意妳；妳需要嘅生活照顧，我可以到妳。
嗰段時期予姨嘅精神壓力好大，除咗日日應酬呢啲人覺得好對老豆唔住，個腦好亂，加上老豆知道咗予姨呢啲事之後，好擔心予姨，好着緊，予姨同老豆溝通亦好困難，好容易就嗌交。後來，有人介紹予姨入一間公司做，佢喺嗰度日日俾個老女人鬧，情緒好差、思想好混亂。
肥佬經常問予姨考慮成點。
一日，老豆喺予姨屋企嗌咗場交。
第日，予姨又俾老女人精神折磨。肥佬又試問予姨考慮成點。予姨話工作壓力好大，日日俾人鬧。肥佬話，妳俾我養吖嘛，咩都唔使做，所有生活問題解決哂。
佢哋就傾條件。
肥佬開出優厚條件，要予姨第二日就上去，即刻同居，再慢慢搬啲嘢過去。
予姨話俾老豆知道。
老豆渡過咗痛苦嘅一個星期，每晚諗住予姨已經喺人哋屋企，同人哋瞓，失眠咗好多晚。
星期六，老豆同阿媽去街，成個人感到空洞洞。全日好掛好掛住予姨，諗起予姨可能同肥佬有節目，以後佢就會同人有新生活。
夜晚忽然收到予姨訊息，問老豆點。
老豆話，好掛住妳，但諗住你哋今日可能有節目，唔敢發訊息俾你。
予姨話全日發燒，冇節目。
第二朝，予姨約老豆去太子食晏，老豆覺得奇怪，佢唔係去咗肥佬度住嘅咩，做乜特登過嚟太子。
點都好，佢好想見予姨，就過去。
食完飯，予姨去尖沙咀幫人買貨。兩個人就去咗佢哋初期成日一齊嘅地方，做番當時經常做嘅嘢。
然後，有朋友向予姨提及一間公司要請人，予姨好想入呢間公司，於是幾乎晚晚搵老豆出去教佢必需要嘅知識。
每晚，老豆教完予姨嘢之後，就送予姨返佢太子住嘅地方，予姨途中慢慢透露佢同肥佬嘅事。
原來嗰晚，予姨去肥佬屋企食飯之後就返自己屋企，一直冇再去過肥佬度。
由嗰陣開始，予姨同老豆重新開始。
老豆幫予姨考到入嗰間公司，予姨希望能夠喺嗰度有發展，之後就可以擺脫肥佬，唔再靠任何男人。
（佢哋呢段時期嘅故事，從
呢度到
呢度）
予姨雖然冇啋肥佬，但肥佬一直有打電話、發訊息向予姨表白。朝早、收工有時會去接佢，予姨好唔鍾意，一直手都唔俾拖。
予姨知道肥佬周時喺予姨屋企樓下、附近監視，佢唔鍾意肥佬，想爭取工作上有好發展，繼續同老豆一齊。
但係萬一份工攪唔掂的話，予姨生活就成問題。老豆又唔可以同佢結婚，佢一個大陸人喺香港搵嘢做又咁困難，想留番條後路。
所以初期，予姨唔敢俾老豆上去佢住嘅地方，因為肥佬有佢大廈密碼，試過上去敲門。
肥佬問予姨，妳生活咁艱苦都唔俾我照顧妳，係咪有男朋友呀？
冇呀。
咁到底妳要咩條件？搵日出嚟傾吓？
予姨用忙做理由話唔傾住。
老豆個心好不安，感覺予姨份工最終唔係咁理想，予姨生活冇保障之下會投靠肥佬。佢覺得與其一路擔心呢件事發生，叫予姨不如趁而家同肥佬好好傾條件啦，如果唔係妳真係走投無路至搵佢，佢實蝦妳㗎。予姨好唔鍾意老豆咁樣講，覺得老豆好似唔愛佢、唔想負責任。
有一日，予姨問老豆，喺邊？
屋企冇飯食，自己出嚟食，去咗妳屋企附近。
我喺深水埗，不如妳過嚟，食印度嘢，你鍾意食印度嘢。
嗰年之前，予姨仲住喺深水埗。嗰度環境好差，但係好方便，後來因為環境唔好、附近又雜，就搬咗去太子。
嗰日老豆着住件佢同予姨最好嗰段日子，予姨做俾老豆嘅恤衫。喺地鐵上，予姨話，妳着呢啲衫好睇。
係妳做俾我嘅，記得嘛？
記得，你掉哂佢啦，第日我做過一批俾你。
唔使啦，我做俾我啲衫，有一件我從來冇着過。
做乜唔着？
唔捨得。
老豆送予姨去到屋企樓下嘅另外一邊入口，肥佬唔知道有呢個入口嘅。
我係咪唔可以再上去呀？
我想留一條後路俾自己。
予姨望住老豆，話，好唔捨得你，好想同你結婚。
老豆抱住予姨，話，我哋繼續努力吖。
（未完待續）
[
本帖最後由 dcat20 於 2022-12-14 23:06 編輯 ]
