引用:
原帖由 katieW 於 2021-7-28 06:14 發表 
有點好奇想知道妳們的經過
可以嗎? 
係final year 一個project o既組員, 原本真係冇乜兩句o既,
只係分組果堂我地果枱人, 要組隊果一刻同枱好似係6-7個人左右大家互望o左幾秒鐘,
一條友問 "就咁樣?" 其他人點頭 "ok", 咁就成o左團啦, 佢係其中之一
之後大家先有比較深入o既交流同介紹, 交換 contact 等等
佢算係斯文內向型, 說話唔多不過有料, 討論果陣唔似得另外幾條八婆叻唔切咁嘈嘈閉,
但講o既每句話都中 point 囉, meeting 左幾次之後我已經有d 欣賞佢
我地一個大組自己再分成兩個定三個小組咁, 負責唔同o既o野,
佢同我唔同team, 但小組之間耐唔耐要協調果陣我都儘量搵佢而唔係搵另外果個
果陣其實我係有男朋友o既, 名義上啦, 已經好多o野好唔開心成日鬧交果種
不過只要我一日仲係人女朋友我都唔會俾自己成為第一個做對唔住對方行為o既人
所以同呢位同學只係維持住同學+組員關係, 傾計99.9%只傾正經事
個project 進行到一半左右啦, 卒之真係徹底咁同男朋友鬧翻o左, 雖然結局早就預料到但總會唔開心嘛,
脾氣變得有d 壞, 講句說話都好似鬧人咁, 有次佢就問我咩事呢幾日硬係寸寸貢咁樣
我話o左俾佢知, 佢有安慰我請我食飯 (當然唔係大學 canteen 咁cheap 啦)
我知佢雖然開始果陣怕怕醜醜咁但後來同d 組員都混得唔錯, 就remind 佢唔同講閒話咁話俾果幾個八婆知
之後開始多o左同佢傾計, 講project 以外o既個人o野, 叫做熟絡起o黎囉
佢都同我講o左佢一d 秘密, 就係佢睇上o左個course 入面另一位女同學
就係果一下, 我忽然有d 失落... 心情好複雜, 即係果種一來又唔確定自己係咪中意佢,
知道佢中意第二個又好似失去o左d 野咁, 唔要臉(x1)咁講, 以為佢之前對我好果d 係因為佢都對我有d 意思
點知原來只係一個gentelman 對一個剛剛經歷感情創傷o既女人o既一d 照顧, 但又因為咁覺得佢係好男人,
佢話佢有意思果個女同學係唔差o既, 可能佢地有其他堂一齊上卦, 不過我就未曾親眼見過佢地之間有咩互動,
心諗唔 L 係下話? 唔要臉 (x2)咁講, 本宮比佢索得多啦
睇上佢都唔睇上我
(事後反省, 可能就係因為我粗魯...)
總之知道個消息之後真係幾down, 但根據我自己所知o既去判斷, 佢暗戀人啫, 係咪真係愛上人又未知,
人地受唔受又係未知, 我都唔算輸o架
之後更多主動搵佢, 公事又好私事又好都同佢傾,
想拉近我地之間o既距離但又點到即止, 即係冇好主動咁去追人, 因為畢竟我剛剛分手而佢又知道呢件事,
太猴禽會俾人一個我唔係好女仔o既感覺...
後面果d 就省略啦, 有機會再同你講, project 做完都差唔多快畢業, 各散東西, 忙搵工忙呢樣果樣少o左聯絡
事隔幾年之後忽然當日o既一條八婆群發message 俾我地幾個member, 要聚一聚喎
(其實係想打聽大家動向, 有冇工作機會介紹)
咁又再次見返面, 有返聯絡, 飯局之後先有返單對單o既交流, 條友竟然真係追到o左當年暗戀果條女囉
不過 last 左唔夠一年就分手
