kenny_love

Part 34
係出發前呢2個月，我同Miki都有種幻得幻失既距離，這麼近那麼遠。
大家都冇嘗試去互相試探，問出對方的心意。就這樣，我們過了2個月的時間。
係旅行前兩日既一個禮拜五，Miki佢地3個約左我旅行前食個飯先。
經過一大輪既討論，最後佢地決定左要徵用我間屋食飯，無錯，約我食飯跟住用返我間屋，話可以玩得開心啲，飲得放啲。
大家嗰晚乜都講一餐，果然自己地方可以講得放啲，癲啲。
Ally同Wendy都飲左啲酒，有少少貓貓地，所以我call左的士逐個兜去佢地樓下，返到屋企再打俾我先安心，送哂佢地2個之後，我準備送埋Miki返屋企。
Miki: 我唔想返屋企住…可唔可以陪我睇套戲。
我記得嗰陣已經係半夜1點幾，戲院都閂哂，可以睇戲既地方得返我屋企。
我: 咁...不如上我屋企睇?
Miki: 好呀!
於是，我地一齊行返我屋企。
Miki: 你今次去英國成2個禮拜係咪住係朋友親戚屋企呀？
我: 係呀，聽聞啲地方大香港好多。
Miki: 我正想講嗰到應該寛落好多，其實住呢啲都幾正，係去巿區麻煩啲。
我: 係架，郁啲都可能要車先搞得掂，你夠18架啦喎，有冇準備學車整個國際牌係美國自己揸下呀？
我有好師傅介紹。
Miki: 哈，你唔驚我變成馬路炸彈咩？
我: 呢個世界女司機同靚女司機既待遇差好遠架。
Miki: 有咩分別XD?
我: 好複雜，遲啲再同你詳細解釋。
Miki: 不過而家學應該學唔切。
我: 學唔切？
Miki: 冇野，我想快啲有牌姐。
返到左我屋企，我地搵左套唔知乜鬼俏佳人既戲睇，套戲係咩內容我都唔太記得了，淨係記得我地兩個都眼眼地訓，大家好靜咁睇戲，但其實我地都冇睇緊套戲，而係坐係Sofa靜待緊大家。
慢慢，Miki捱左個頭落我膊頭，我亦都慢慢將個頭捱落Miki個頭到，但我倆一句說話都冇講到，我右手慢慢伸去Miki既左手，兩隻手十指緊扣咁拖住，大家依偎在對方，彷彿世界只剩下我們兩位的一樣。
時間一點一滴咁過去，套戲完結未都冇人知，淨係知我地用姿勢下訓著左。
睡夢中，我成戲中的男主角，進入了準備與女主角離別的一幕，我倆站在門前，凝視著對方，有一種相愛相知但不能相守到尾的悲情感，女主角走近了我，輕輕的親吻了嘴唇，這一吻，來得溫暖，來得真實，來得傷感。我...流淚，彷彿感受到面上有一條條冷凍的淚珠流過。
女主角慢慢轉身，推開門，離開了我，「咔嚓」一聲，她離開了，她真的離開了。我繼續站著發呆，我想去勉留一切，但我卻不能勉留，那種心有不甘的感覺慢慢湧現。
然後，我醒了。
我只見到得返我一個躺臥係Sofa到，Miki已經走左，只見到留低左張紙條。
「我訓醒見你訓到成隻死豬咁，連放低你落sofa你都冇感覺，就知你準備旅行野好攰，你繼續訓覺休息啦，我唔夠力抬你入房，唯有放平你個人係sofa訓，旅行玩得開心啲，我走先啦，多謝你陪左我成晚。再見！」
我整個人仍然沉浸係夢中，久久未能回神。
「鈴鈴鈴...」阿誠打黎
阿誠: 喂，你買齊野未？今晚就出發啦喎，不如下畫再一齊去買下野。
我望一望錶，原來已經11點幾。
我: 都好！我Check多次仲有咩漏，一陣係XXXX等再去行下買下。
冇錯，我係5月18日夜晚11點機飛去英國，黎緊既日數會好緊湊，所以我寫邊一日咁。
我約左阿誠妟晝3點幾係屋企附近既商場買埋最後唔夠既野就拖埋個喼，買埋外賣就上我屋企食。
阿誠: 喂！你而家同Miki唔湯唔水咁，仲要走去探Polly，得唔得架？你驚你個人亂哂大龍喎。
Polly係邊個？相信大家都估到少少，佢就係我前女友，亦即係我好多年前篇文入面既PP。我決定俾返個名佢(雖然都唔係真既XD)。至於點解佢會係英國，點解我地會分左手，之後會揭曉。
我: 咁去英國唔探佢又好衰喎，況且都咁多年啦，咩都要放低，如果連佢見都咁驚，點樣開始一段新關係呀？
阿誠: 咦，睇黎你已經準備將煲野變返上湯啦喎。
我: 呢次去英國去旅行，我要諗清楚自己想點，返到香港我就唔要再唔清唔楚，拖泥帶水咁。
阿誠: Good！支持你。
就係咁我地出發去機場，我忐忐忑忑咁上機，雖然口講唔怕見到Polly，但其實畢竟呢幾年我地完全冇見過面，只係得閒一兩封email聯絡下，冇錯係email，亦講唔到啲咩深入野，最多大家知道大家仲未死XD，當然呢一次既旅行Polly都幫左我地唔少，好多野都係佢幫手先咁快Book到。我帶住一個複雜又百感交雜集既心情飛去英國。
我地計過，飛去英國倫敦直航大概14個鐘到，連埋行李過關，應該香港時間1500到香港，咁英國時間就大概朝早8點到，到步就差唔多可以開始玩了，我英國既2星期旅遊正式開始，全靠阿誠有親戚移左民去英國，可以住係佢到，我地先可以慳左一大筆住宿費。
當然整個旅程其實我最有興趣係大英博物館，而其餘既野都係阿誠安排多，佢叫我book咩我就跟住book咁，坐下火車，去下唔同既城巿玩咁。
「5月25日」
緊張既日子黎了，我係倫敦坐火車去Polly住既地方－曼徹斯特。我終於要去見我前女友，2個半鐘既火車，我諗幾百句唔同既開場白，結果落火車見到Polly。
我: ..............................................................................................................................
幾年後既Polly，外貎依然秀麗，比起以前多了一點成熟感，比起幾年前更fit，應該做左唔少運動。
不知是英國飲食問題，還是二度發育，上圍好似比起以前豐滿。
Polly露出招牌笑容: 點唷？見到老朋友打下招呼都得掛？
我: 嘿！我係火車諗定左好多句開場白架啦，但原來一句都唔岩用XD
Polly走過黎接過我手上既行李: 行啦，車你去屋企放低左行李先帶你去參觀我大學。
一去到佢屋企，嘩屌-.-英國地方大真係唔同啲。
淨係入門口個偏廳俾客人放下袋寒暄下既空間，已經大過我屋企個廳。
Polly係曼徹斯特一間大學讀緊PhD，係一個幾出名Professor既Research幫手。英國既大學，地方比香港真係大好多，參觀下圖書館，行下草地。
Polly一路介紹唔同既地方，介紹下佢幫緊手既Research，當然我唔係好聽得明佢講咩，但明顯感受到佢對呢一份工作既熱誠。佢係到真係搵到佢生活既意義，當初佢既決定果然係冇錯。
慢慢我就適應返同Polly相處既感覺，只係大家一直冇提幾年發生既事。
離開大學之後我地直接返左佢屋企。
我: 咦，唔係去食飯咩？
Polly: 英國夜晚出去食飯好貴架。今晚我煮啦，你以前成日話我唔識煮飯，剃你眼眉！
我: 係咪咁勁呀？
Polly: 我呢幾年晚晚都自己煮架啦，而家隨時勁過你添呀！
我: 咁我有咩要幫手？
Polly: 你幫手切下野，不過你地男人份量我唔知預得岩唔岩。
我: 你平時唔會同男人食飯架咩XD？ 你office尼姑奄黎？
Polly: 尼姑你條命，平時點會冇啦啦請個男人上黎屋企食飯？
我: ...
Polly原來一直單身？
Polly: 做咩？
我: 冇，我以為你都有識下男仔。
Polly: 識男仔就冇啦，有男仔想識下我都有既。
我: 係？
Polly: 咁八卦做咩？你唔會想復合掛？
我: 洗唔洗咁直接-.-我冇諗過復合。
Polly: 哦，嚇死我，不過你地男人咁鹹濕，肯定忍唔住啦。
我: 你唔好講到我咁飢渴咁...
Polly: 我有聽過之後你同Janet(即係前篇故事既J，34D熟女，其實只係大我一年)
我: 咁都係一陣仔，失落狀態容易出事麻。
Polly: 咁我都處理得唔好，冇諗過你咁大反應，咁你呢幾年點呀？
我: 前1 – 2年冇乜野，但呢一年好多野發生，不過一言難盡。
Polly: 係？！放心，我已經準備左幾支靚白酒同你飲，今晚可以慢慢傾，咁耐冇見我都想知你過成點。
Polly比起以前爽朗左唔少。
~打住咁多先，下集見~

[ 本帖最後由 kenny_love 於 2023-4-16 00:28 編輯 ]

kenny_love

我又寫得長氣左 原來打算2 parts打哂既野應該會變成3 - 4parts, 大家見諒

wallacepigpig

引用:

原帖由 kenny_love 於 2023-4-6 20:00 發表
Part 34
係出發前呢2個月，我同Miki都有種幻得幻失既距離，這麼近那麼遠。
大家都冇嘗試去互相試探，問出對方的心意。就這樣，我們過了2個月的時間。
係旅行前兩日既一個禮拜五，Miki佢地3個約左我旅行前食個飯先。
經過一大輪 ...

終於都等到樓主update！真係難得難得！

加油呀！樓主！

活性壞細菌

終於有更新喇 等左你好耐喇😂

CTAN2Y33

咁快就睇完啦？ 唔夠喉

gary1977

Kenny 哥加油！

Nepartak

很高興再次見到Kenny哥哥（跟吓Miki佢哋噤叫先）。
我把噤多part抄咗出嚟，當作小品不時睇返。
加油。💪

[ 本帖最後由 Nepartak 於 2023-4-7 09:14 編輯 ]

whjack

好的故事，雖然耐了一點，但仍然是很吸引。Thanks

cupidlyp

等到花兒也謝了，不過值得，加油

HO1234567890

多謝Kenny gor