迎月嘅日子,享年96歲嘅英女皇逝世,阿星住喺英國有一段時日,對英女皇都有一份感情,希望女皇離開之前並冇太多痛苦,係安詳地走。
唔好咁唔開心,迎月星期五出多一段先得,星星同學會第13話~
那些年,星星同學會 第13話
真係好唔舒服,呃咗佢,又俾人呃。佢鬧咗一輪,阿星都唔敢出聲,耳仔都紅埋。最後Sharon講咗一句:”Don't you ever show your face in front of me again! “跟住轉頭就走,阿星成個人都傻咗。Helen笑咗一下,講咗一句:”I don't want to see you either!” 就關門,剩低阿星自己一個企咗响度!
往後嘅日子,阿星再冇去籃球隊練波,因為唔敢見Sharon呀,老師同隊長問,咪搖頭扮唔舒服囉,反正都唔識講。上堂都唔敢再望佢,更加唔好講讀書,成績自然又差返落嚟。記唔記得仲有個好似圖書館管理員嘅女仔叫Emma?佢睇到阿星成日唔開心,就問阿星好多嘢,一嚟阿星都聽唔哂,二嚟又唔識講清楚,三嚟都唔敢講啦,好光彩咩。
Emma係果啲你通街都見到果種四眼妹,短頭髮,唔多出聲嘅。佢好好心㗎,見阿星成日唔開心,又請阿星食糖又盛咁,以一個英國中學生每日得兩鎊零用嚟講,唔係咁多錢使,佢算好闊佬啦。相信每個窮學生出國留學都試過,放學之後去餐館做兼職,阿星都唔例外,逢星期五六晚都返。當時都算幾好圍㗎,成廿鎊一晚,所以比起其他同學有錢。Emma請食一粒半粒糖,喺阿星眼入面梗係唔係啲咩啦。為咗表示謝意,阿星都去到倫敦市中心啲店舖度買咗包朱古力當係多謝佢。去到英國兩個月阿星就開始打工,老豆唔俾零用,話你要使錢自己賺啦。所以阿星都因為返工呢,已經由一個鄉下仔變成一個城市人喇。
待續😬
[
本帖最後由 star_platina 於 2023-5-11 09:47 編輯 ]