又更新下先~
那些年,星星同學會 第44話
好一個Grace ,真係死纒爛打到你驚。聽到阿星話要趕車,即刻話:「我揸車嚟嫁,我哋一齊返去食宵夜啦。」小姐,阿星屋企啲人瞓哂,你唔係諗住去阿星屋企嘈醒哂全部人下話?
Grace 即刻話:「咁我哋食完先入屋咪得囉。」阿星望下包外賣,半隻香酥鴨,又青瓜絲又蔥絲又餅皮又海鮮醬咁,隻鴨又未爬絲,阿星睇下你點樣喺車度食?見佢又打電話去阿星屋企問長問短,又夜媽媽嚟車阿星收工又盛咁,推佢又好似好衰,唉,阿星都係俾你舞到七個一皮咁㗎喇。好啦,一陣去到你唔好咁嘈,食完早啲上去瞓,阿星有毛巾,去到你冲個涼啦,不過你冇衫喎。
你估個衰妹講咩?佢話:「我一早攞埋衫啦!尋晚冇衫換,瞓得唔舒服!」你早有預謀,今晚又去阿星度瞓,你真係唔驚阿星咁喎。Grace 一路拖住阿星行去佢架車度,一路笑住話:「我先唔怕你呀,你得把口嘅!」哼,睇下點!
就係咁,阿星今晚又坐住Grace 架車返屋企去也。Grace 對於阿星屋企條路真係好熟悉咁,阿星問佢點解咁熟路,佢笑住話:「喺你返緊工嘅時候我已經嚟呢度兜咗三次,記熟咗條路喇。我係咪好叻呢?」你都得㗎喇,冇事做揾嘢嚟做。真係冇你符。
待續😬