star_platina

引用:

原帖由 東方小倫117 於 11/10/2023 15:49 發表
Ai，而家興呢d🫢

家陣個個都玩AI，查實阿星都係AI嚟😬

star_platina

那些年，星星同學會 第166話

星期一返工，阿星諗住一陣得閒走去問下阿7月尋日做咩放阿星飛機。其實放飛機呢啲嘢真係好平常，不過阿星想知道咩事，因為如果係阿星約人，人哋放阿星飛機，阿星能夠理解；而阿星奇怪嘅係，明明係7月約阿星，點解佢會放阿星飛機嘅呢？整件事令到阿星成晚瞓唔著，一路喺度諗，阿星又冇得罪佢，難度佢揾阿星嚟做實驗？

原本7月都係約阿星星期六去食飯行街嘅，因為星期六阿星已經有約，所以就同佢講星期六唔得，不如星期日啦。7月諗都冇諗就答應咗，咁先令到阿星搲爆頭。不過通常呢啲情況，你越係想去探討發生咗咩事，就越係冇辦法知道。

今日唔知發生咩事，阿經理非常之多工作交落嚟，除咗開會嘅時候一大班人嘅時候見到6月同7月之外，由開工之後到食飯前阿星都冇時間去揾佢哋。然後終於食晏，阿星想去揾7月同佢去食飯，順便問下佢尋日點解放阿星飛機。阿星唔係介意，冇冇冇，絕對唔係。

喺阿星準備起身去揾7月嘅時候，6月就走埋嚟話：「去食晏囉！」

就係咁，阿星今日由朝頭早到食晏之後都見唔到7月。

食晏嘅時候，6月捉咗阿星去公司出面個公園仔度坐，兩個人仔去買咗一人一份三文治，嚟公園仔嘅長櫈度慢慢食。阿星咬完份三文治仲有啲意猶未盡，6月見阿星仲有啲餓，就將剩低嘅半份三文治同阿星分，佢咬一啖，阿星咬一啖。阿星每一啖，都係咬落阿6月之前咬落去嘅地方，其實咁食法，阿星食晒佢口水尾，唔通佢要阿星聽佢話？

公司總有公司嘅忙，阿星都唔例外，忙咗一個下午，一路忙到收工。喺阿星自己喺度忙嘅時候，相信其他同事都一樣好忙。收工嘅時候，6月走嚟揾阿星，問阿星要唔要同佢一齊走。阿星諗起中午食晏嘅時候阿6月咁照顧阿星，又餵阿星食嘢又請埋阿星食多細半份三文治，都真係要多謝下佢，同佢食餐飯。所以阿星就應承咗6月，同佢食晚飯作為答謝。大家咪以為阿星打份好好人工嘅工作，阿星都只係一個普通文員，同好多人一樣，做一份普普通通嘅工作，有一班普普通通嘅同事，出一份普普通通嘅糧；阿星想講嘅係，話同阿6月姐姐去食飯，都不過係去麥記度咬個包啫。

喺阿星應承咗6月姐姐同佢去食飯，佢好開心咁返去佢部門度執嘢之後，有一個人，靜靜咁企咗喺阿星後面，失驚無神咁開聲。

待續😬

star_platina

引用:

原帖由 markluk123abc 於 17/10/2023 12:38 發表
等你繼續更新
add oil

多謝師兄😬

star_platina

那些年，星星同學會 第167話

「你尋日做咩冇去見我？」失驚無神有人喺阿星背後開聲，嚇咗阿星一跳，原來係阿7月妹妹企喺阿星背後。

阿星擰轉頭，望到7月企喺阿星前面，7月企得好近，由於佢本身大概唔到160，企到咁埋7月就要抬起頭先可以同阿星有眼神接觸。7月見阿星冇答佢，再次開聲笑住問阿星：「你尋日做咩冇去見我嘅？」

「吓？你唔係放咗阿星飛機咩？」今次到阿星碌大四隻眼望住阿7月。

「我瞓遲咗呀，出到去遲咗，你冇等我嘅？」7月依起棚好白嘅牙，瞇到眼都睇唔到，笑住答阿星。咁即係點？你遲到，怪阿星唔等你？

「呀，well，係呀，係咁嘅，阿星等咗你半個鐘頭都唔見你，所以咪走咗囉。」嗱嗱嗱，阿星講嘅全部係事實，亦都係事實嘅全部，絕無半句虛言，你唔好賴阿星呀！

「依～～～～～我遲咗45分鐘先到呀，你都唔等埋人～～～～」一路講，一路用力打咗落阿星今日搬貨搬到有啲痛嘅手臂上面。

“啪”一聲，阿星絕對有理由相信，阿7月打得咁大力，係想強烈表達對阿星冇等埋佢自己走咗去嘅不滿。阿星有冇講過，呢份工雖然叫做文員，但係唔知點解硬係咁多體力勞動，又要搬啲一箱二箱，而且因為阿星夠高嘅關係，啲同事們個個都叫阿星幫佢哋喺啲貨架上面攞嘢，搞到阿星兩條手臂成日都好似唔屬於自己嘅咁。

阿7月打完阿星之後，繼續怪責阿星：「你呀，人地遲到你都唔打俾人問下，又唔叫人起身！」一路講，一路自己掩住咀笑。查實阿星係冇你電話號碼嘅，唔知你知唔知喇。不過作為一個男仔………… well，阿星都大過佢少少，作為一位男士，都係低低地慣一鋪快啲了事，一陣要阿6月等就唔好。

「呀，well，yes呀7月，即係咁呀，原來阿星係冇你電話號碼㗎，所以果日冇辦法揾到你呀。不如咁啦，你俾個電話號碼阿星，等阿星揾到你啦。」呢啲時侯，都係以進為進，攞咗電話號碼先講。

7月碌下佢對大眼諗咗陣，然後俾咗個電話阿星，叫阿星入自己個電話入去，阿星樂於照做。7月臨走問阿星聽日得唔得閒食晏，睇嚟聽日晏仔有著落。你講到咁，阿星又點會say no呢？

待續😬

star_platina

引用:

原帖由 markluk123abc 於 17/10/2023 13:40 發表
男人就係咁，始終口硬心軟。

有女仔咁留意，係難啲發難喳㗎啦😬

star_platina

哎唷，俾人倒扣一分添。

那些年，星星同學會 第168話

7月好滿意咁離開，臨走仲做個手勢，話聽日見。望住甜甜咁笑嘅7月離開，阿星又要嗱嗱聲收拾好枱面啲嘢，同阿6月放工一齊搭地鐡去也。6月同阿星住得比較近，同一條地鐵線比阿星早4個站落車去另一邊分叉線再坐多一個站。收工時間都係比較人多，無論係香港定係倫敦都一樣。地鐵車廂入面阿星同6月只係勉強有個位企，而且仲要俾其他放工嘅人夾到好似兩條沙甸魚咁。始終兩個人嘅企位，係佔用咗兩個人嘅空間。6月係一個好精打細算同埋心地應該都幾好嘅女仔，見車廂入面嘅企位越嚟越少，佢即時做咗一件事，令到車廂入面狹隘嘅空間得到抒緩。

6月同阿星企嘅位置，係靠近車門，過去幾個車站，都係喺另一邊開門，乘客全部往阿星同6月嘅方向推進，令到阿星同6月都企得比較壓迫。車廂入面人太多，當然係一個困難嘅境況；而另一個困難，就係下一站嘅開門位置，係阿星同6月企嘅呢邊。多人落車，又多人上車，隨時會將阿星或者6月，甚至阿星同6月一齊推出車廂之外，分分鐘上唔返車咁大件事。所以6月今次所做嘅事，可以講係救咗阿星同佢自己，免遭落車嘅乘客推落車之苦。

6月見架車都差唔多到站，車門將會喺地鐵停定嘅時候打開，就抆住阿星件恤衫，然後拉阿星埋佢度。唔講唔知，阿6月真係好力水，可能因為生得高大嘅關係，一拉就將阿星拉咗埋佢度。阿星俾佢一拉，就拉咗埋去，跟住6月趁住地鐵未停定，細細耳喺阿星耳仔邊講：「攬實唔好放手！」然後攬住阿星條福腰，個頭借阿星心口當枕頭用。

阿6月呢份苦心真係令人感動，頭先咁多乘客上上落落，唔係阿6月攬實阿星拉咗阿星埋去門口旁嘅玻璃度捱住，阿星一早已經俾落車嘅乘客人流冲咗落車，分分鐘仲要俾啲乘客推咗去另一個月台上埋另一班列車都有可能。

多得阿6月攬實，阿星先至安全咁喺車廂入面冇俾人冲到散。為咗答謝6月，阿星都伸出一隻手，攬住佢條腰，以防再一次俾下個站上落車嘅乘客推撞。
阿星一隻手攬住6月，另一隻手就扶住塊玻璃；而6月，就好小心翼翼咁攬實阿星，以防阿星俾啲落車嘅乘客撞到。

地鐵嘅行駛點都會有起動同煞車嘅時候，喺地鐵就到下一站，司機煞車嘅一刻，阿星有啲企唔穩，要扶一扶，攬住6月嘅手喺6月嘅腰不由自主咁去到佢背脊上面扶住。

令人意外嘅事件再一次發生，點解阿星掃到嘅6月嘅背脊，好似少咁啲嘢，呢樣嘢，應該係平時都有，但係今日阿星掃背嘅時候就冇嘅？

待續😬

star_platina

師兄客氣，阿星感謝😬

star_platina

那些年，星星同學會 第169話

阿星因為架地鐵chok一chok，要扶住6月嚟穩定自己，由纖腰扶到上背脊度，然後因為阿星扶穩咗嘅時候發生咗6月嘅背後唔見咗啲嘢。阿星越摸越驚，點解會唔見咗㗎？唔通今日係冇嘅？喺阿星不停咁左掃右掃上掃下掃，掃極都掃唔到原本有嘅嘢嘅時候，6月終於受唔住阿星驚慌失措嘅行為而開聲。

「我頭先除咗……………」講完將個頭繼續藏喺阿星心口。

除咗？除咗咩？

「呢度呀！」6月一路講，一路返手捉住阿啲嘅手喺佢背脊度掃。阿星俾6月揸住……………隻手係咁掃背脊，但就乜都掃唔到。

雖然家陣係4-5月時候，天氣仍然比較涼快，夜晚嘅温度大概都係13-4度左右。下午6點零鐘收工嘅時候，都係有啲凍，好多人都會著件外套以防攝親。

6月都唔例外，收工嘅時候都著咗件薄薄嘅毛冷外套，包住佢纖瘦但偉大嘅身體。遮住喺外套嘅裡面，阿星真係唔知道原來佢除咗。

「幾時嘅事？」阿星好奇，小星星聽完之後直頭想一探究竟。

「頭先囉…………」6月講得有啲炆，可能呢啲時候問會令佢唔高興。而且除咗出嚟真係會呼吸暢順啲咩？

阿星呢個問題逗留咗喺個腦入面冇幾耐，就已經浮現咗喺面上面。望住6月個尖尖嘅瓜子面一陣之後，6月就抬高頭合埋眼合埋咀，好似俾人點咗穴咁。

你咁樣，阿星真係唔知道點對你好喎，唔通你頭先太用力抆阿星埋嚟，依家又見暈咁大劑？

待續😬

star_platina

那些年，星星同學會 第170話

阿6月應該係有啲啲暈，架地鐵差唔多到站嘅時佢捉阿星件恤衫咁用力，家陣抬高頭合埋眼合埋咀見暈喇。你話係咪衰呢？明知自己用力過度會見頭暈，就唔好夾硬嚟啦嘛，搞到自己頭暈眼花咁，你話幾令人擔心呢？

阿星掃下掃下6月個背脊，見佢係咁合埋眼唔出聲，都估佢真係有啲暈地鐵浪。有過上一次嘅經驗，阿星知道人工呼吸係必需嘅，唔係嘅話6月分分鐘又會暈。呢啲咁緊急嘅情況，都真係唔顧得咁多喺咩場合，救人要緊，阿星都唯有一咀錫落去………………係一咀落去同佢做人工呼吸。為免阿6月好似上次喺屋企門口見暈咁樣，今次佢暈，會喺架地鐵入面，如果佢喺地鐵入面暈，佢屋企要行咁遠距離，阿星都唔知抬唔抬到佢返去。

喺阿星個咀一接觸到6月個咀嘅一刹那，6月即時伸出雙手嚟箍住阿星條頸。都話阿6月真係唔舒服，好彩阿星嘅人工呼吸及時趕到，唔係真係有機會釀成令人後悔莫及嘅事。就係咁，阿星不停斷斷續續咁為6月做人工呼吸，喺北線（Northern Line）嘅Goodge Street站一路吸下停下咁，為6月做人工呼吸直到Mornington Cresent站。當地鐵離開地鐵站嘅時候仍然有好多人，冇位俾阿6月坐。咁嘅情況，阿星當然要停止人工呼吸，等6月抖下啦，人工呼吸做得多唔好㗎，會出現成癮癥狀，一陣阿6月上咗癮，成日要阿星幫佢人工呼吸就唔好啦，係咪？

阿星同6月喺地鐡度人工呼吸，真係迫不得已，唔係見佢好似作嘔作悶就嚟暈咁，阿星真係唔會大庭廣眾咁樣做。去到Camden Town站，阿星同6月都要落車，喺同一個月台度等另一班開往High Barnet嘅地鐵，係呀，頭先班車係以Hendon Central作為終點站嘅，同阿星地去East Finchley係唔同方向嘅。阿星同6月落咗車，企返喺同一個月台度等下一班車嚟。呢個時候嘅6月，應該係因爲頭先暈火車浪仲未暈完，依家仍然要攬實阿星嚟到扶實。阿星望住6月，忍唔住喺度諗：你身體差成咁，真係要幫你睇下可以點樣搞搞佢喎。

待續😬

star_platina

引用:

原帖由 adiabaticlam 於 8/11/2023 14:36 發表
呢啲時候梗係送佢返屋企，請佢食啲高蛋白液體補補身。😂

人工呼吸都搞佢唔掂😬