突然喺度諗，究竟有幾多師兄睇故仔呢？喺度寫，又會唔會俾人當係長篇小說咁睇呢？然後，睇完嘅師兄，又會唔會有回應呢？然後然後，阿星嘅故事入面嘅女角色，其實係咪真嘅呢？然後然後又然後，阿星寫落去，係咪好長氣呢？
那些年，星星同學會 第119話
要發生嘅事始終會發生，Chloe約得星多終遇媽。阿星媽見阿星晚晚去夜街，問咗阿星兩次，阿星又忍唔住阿星媽嘅迫供神功，終於吐咗所有嘅口供俾阿星媽知。查實阿星媽都有聽阿星老竇講，有個女仔嚟同阿星住咗兩個月，阿星媽以為Chloe係Grace，一路問阿星個女仔係咩人，點解唔叫佢返嚟食飯，等阿媽望真下佢。就係咁，Chloe見得星多終見星媽，阿星媽話要同佢食餐飯，同佢傾下偈，好似話睇下個新抱仔咁話。典解阿星解釋咗咁多次，阿星媽都仲係唔明，一時以為Chloe係Grace，又一時以為佢係Joyce嘅呢？唔通阿星嘅口才真係咁差？
阿星媽都算破費，一聽到係阿星女朋友，即刻唔知邊度揾到第二晚同阿Chloe食自助餐。是咁的，法官閣下，Chloe喺旺角返工，要去銅鑼灣怡東酒店都要啲時間。阿星媽叫阿星去接Chloe收工，佢去酒店度等阿星地嚟，咁阿星就去咗接阿Chloe收工喇。
Chloe知道阿星嚟接放工，當然開心啦。阿星一碌杉咁企喺佢公司門口，終於有人問阿星揾邊個。等咗一陣Chloe就攞住手袋走出嚟。兩個人仔喺旺角度等巴士過去銅鑼灣怡東酒店食自助餐去也。
大家都知，香港嘅司機整體都唔係咁好駕駛技術；唔怕得罪講句，啲司機係冇乜品嘅，而且揸車仲要揸到chok下chok下咁，搞到啲乘客好似食咗fing頭丸咁fing嚟fing 去。收工時間，當然冇咁多位你坐，阿星同Chloe上咗巴士之後只能夠迫埋一齊企。喺架咁多人迫埋一齊嘅巴士入面，仲要俾個死人巴士司機chok下chok下，Chloe同阿星都企唔穩。臨入紅隧喺巴士轉車站，唔知搞乜鬼，架巴士chok咗一下。可能因為阿星生得高大重心高，呢下一chok阿星企唔穩，Chloe即刻攬實阿星以防阿星跌親。就係咁，由紅磡紅隧入口慢慢塞到去銅鑼灣果邊嘅出口，全程Chloe都攬實阿星唔放手，而阿星喺呢啲時候，亦都只能夠攬住佢，唔敢放手。
待續😬
