star_platina

引用:

原帖由 markluk123abc 於 25/8/2023 11:50 發表
師兄Add Oil

好多年前嘅oil，add咗好多㗎啦😬

star_platina

那些年，星星同學會 第158話

6月攬住阿星隻手再次望住阿星：「你好怪。」你都唔係第一個咁嚟講阿星㗎啦，俾啲新意嚟好冇？阿星只係笑笑，始終一個女仔著咁少衫，係會令人有啲擔心嘅，第一日出街你就冷親，阿星會有罪惡感，所以阿星冇同6月喺怪唔怪呢個議題上面再爭持。

6月原本要阿星幫佢拎住袋衫，依家埋嚟叫阿星俾返袋衫佢。自己攞返好吖，你買嘢唔係阿星買嘢，自己攞返咪乖囉。

去到食飯，6月再冇用手攬住阿星。值得一提嘅，就係食飯大家一坐低，6月就攞埋袋衫去咗廁所，出嚟嘅時候阿星留意到，相信係6月對阿星表示嘅擔心作出回應，就係將淺灰色嘅CK胸圍著返上身，令到綠色碎花裙嘅心口位置睇落更加脹卜卜。點解阿星睇到？因為兩粒稍稍向下一指已經唔見咗，變成兩團圓圓滑滑啦嘛，仲問！

呢啲小事，全部阿星都睇得一清二楚，不過阿星係唔會出聲嘅。人地覺得凍，著返件衫好平常啫。飲啤酒嘅時候，6月只叫咗半pint，飲下飲下，阿星同佢都已經飲完。正要起身去買啤酒問6月要唔要嘅時候，6月開聲：「你買一杯，我倒少少吖。」都好。返嚟嘅時候，枱面嘅兩隻玻璃杯都唔見咗，6月側側頭，話啲杯俾人收走晒，佢唔識講英文阻止喎。你………………唔識英文？！
阿星坐定，飲咗兩啖啤酒，6月就開聲：「我隻杯冇咗，我同你share?」唔等阿星答佢，就自己一路攞起阿星隻pint杯，一路對住阿星眨眨眼。你都攞咗啦，唔通阿星仲可以話唔得麼？
6月揸住阿星……………隻pint杯，伸條脷出嚟喺阿星飲過嘅位置lam咗一下，然後先含落去……………

待續😬

star_platina

落雨斯濕，更新下先～


那些年，星星同學會 第159話

嚴格嚟講，唔係含，係呷，呷啖啤酒啫，大家唔好心邪諗咗第二啲嘢。6月呷咗啖啤酒之後，放低個杯，推返去阿星面前，將個杯擰到去頭先佢呷啤酒個位，即係頭先阿星飲咗啖個位置。6月特登將個位置擰到向住阿星，方便阿星飲，呢啲女仔真係細心。既然你咁大方體貼，阿星都要表示感謝，梗係要飲返啖。

6月見阿星繼續飲，繼續同佢傾偈，佢又開始坐埋啲阿星度，話呢度人多，好嘈，坐埋啲先聽到阿星講嘢。阿星明嘅，條碎花裙咁薄，酒吧又大冷氣，係凍啲。人地女仔嚟㗎，唔通要開聲同你講佢凍咩？

每一次6月開聲，就會哄埋嚟阿星耳仔度，吹住氣細細聲咁講，等阿星聽唔清楚，要哄隻耳仔再埋啲嚟聽；而每次阿星同佢講嘢，佢又要哄埋嚟阿星度，用隻穿咗3粒耳環嘅耳仔同啲今日同阿星行咗一日街而稍稍亂咗，最後去廁所梳理過，好香，但係有幾條撩到阿星鼻哥嘅頭髮哄住阿星，搞到阿星有幾次講嘢太用力，吹咗啖氣入佢耳仔窿度，令到6月不期然打咗幾個冷震。

6月每次打完冷震，就會笑住打阿星大脾，瞇起雙眼嚟望阿星。阿星留意到3樣嘢，令到阿星覺得阿6月應該真係有啲凍，再傾夜啲佢分分鐘會冷親：第1，阿星唔覺意吹氣落6月耳仔度，吊帶裙露出嘅兩條手臂起晒雞皮，證明6月係有俾阿星吹到，係堅凍；第2，每次阿星吹6月，佢一定會捱後少少，瞇起眼笑住嚟打阿星，打落阿星樹嘅手掌嘅皮膚觸感都係比較冰涼；第3，阿6月打完冷震同打完阿星之後，藏喺綠色碎花吊長裙入面嘅兩條大脾一定會夾一下。就憑阿星睇到嘅呢3點，就證明阿6月已經凍到頂唔順，係時候要走啦。明冇？

待續😬

markluk123abc

師兄，近排比較忙，冇時間update

star_platina

引用:

原帖由 markluk123abc 於 11/9/2023 16:33 發表
師兄，近排比較忙，冇時間update

咦，阿師兄連阿星忙都知道，真係犀利，既然係咁，趁得閒出夠兩話先～～～～😬

star_platina

霉開………………係梅開二度先啱，今日出夠兩話，星星同學會第160，161話～


那些年，星星同學會 第160話

酒，總有飲完嘅時候；pub，亦都有關門嘅一刻。晚上11點，所有pub都要關門，酒保同侍應生出嚟趕客，叫佢哋返屋企做愛做嘅事；但係一般都會有啲唔識相嘅人喺度慢慢飲，阻住人收工之餘仲要少咗做愛做嘅事嘅時間。阿星杯酒仲有少少，聽到侍應生嚟通知，望下6月，6月亦都喺呢個時候望住阿星。阿星開聲：「都成11點啦，不如走囉？」

6月點點頭，問：「跟住去邊度？」
跟住去邊度，係子華神1992年嘅經典。時值1998年，跟住去邊度之後6年，估唔到阿星竟然由6月嘅口入面再次聽到。

跟住去邊度，呢個問題問得好好。今日同6月一早出街玩到依家，都已經玩咗大半日，係時候要返屋企，況且阿6月都著咗條新裙成日，阿星擔心佢會冷親，都係送佢返屋企穩陣。

阿星飲咗啖啤酒，將個杯遞過去6月度俾佢，6月好自然咁接過杯，飲多一啖啤酒，再將剩低少少啤酒嘅杯遞返俾阿星要餵阿星飲。乜你餵人飲嘢咁冇禮貌，未問下阿星就餵阿星嘅？最後一啖啤酒，阿星喺6月揸住個杯餵阿星飲之餘，仲要喺6月啱啱飲過嘅位置度飲埋佢。6月見阿星飲得咁聽話，再次用力攬實阿星隻右手，瞇起雙眼對住阿星笑。

「走啦。返屋企啦。」

「吓？唔係仲會去第二度咩？仲好早咋喎。」6月問。

「唔啦，今日都玩咗好耐，有啲攰啦。」阿星怕你冷親，一陣賴阿星，咁就真係水洗都唔清。

「咁…………………好啦！你送我返屋企啦！」6月攬住阿星右手嘅手再一次收緊。唔，送你返屋企都應該得嘅，聽聞你話屋企喺附近。

20分鐘嘅步行，絕對可以幫助消化，而且仲可以消醉添。6月住嘅，係一楝3層高嘅開放式單位，亦即係studio flat。每一層都有兩個單位，一條樓梯直通各樓層。6月住喺3樓，亦即係頂樓。行樓梯一路跟住6月上去，吊帶裙嘅裙擺，喺6月上樓梯嘅動作底下飄揚，令阿星不期然想起，今日試身室入面睇到嘅疏疏落落。呢啲時候，小星星總會喜歡出嚟煞風景。


第161話

終於捱到上去，阿星喘晒氣，6月都喘晒氣。既然6月都安全到達，阿星都係時候功成身退。6月只將大門打開少少，企咗喺門口，擋住咗單位入面嘅景色。

「我間房好亂嫁，唔俾你睇！」

哦，咁唔睇囉。阿星點點頭，轉身就準備落樓返屋企。

落咗兩級樓梯，背後嘅6月就叫阿星：「喂，你就咁就走嗱？」

唔係點？你唔係想煮埋宵夜過阿星啩？

阿星擰返轉頭，望到6月斜斜咁捱住門框，左腳微微屈曲，擺出一個想人行埋去嘅姿勢，然後右手輕輕將大門推開。咁點呢？呢頭又話唔俾阿星睇，果頭跟手推開門，你間屋入面係點，俾阿星睇晒囉喎，你企到咁，係咪唔舒服？阿星企喺樓梯級落兩級處，望住6月唔出聲。

大家互望咗一陣，阿星又擰轉身繼續落樓梯。

「喂呀！你真係就咁走嗱？」6月有啲唔係幾好老脾，語氣有啲唔中意，可能佢真係開始作病。阿星唯有又上返樓梯，行到去6月面前。6月喺阿星行埋去嘅時候，一路同阿星有眼神接觸，當阿星行到埋去佢面前，6月已經要抬起頭望住阿星。距離咁近，6月都做唔到啲咩，抬高頭之後就合埋咀合埋雙眼向住阿星。6月咁嘅樣，相信可能係因為之前飲咗啤酒，又要行咁多層嘅樓梯，而且夜晚又有啲涼，搞到依家有啲暈，所以迫於無奈要合埋眼合埋咀，唔係一陣作嘔作悶真係會嘔出嚟。

望真啲6月，佢瞇晒眼瞇晒口之後個樣有啲似後生嘅姚瑩瑩。呢，家陣做愛回家果個Helen姐呢，人地當年都係新加坡小姐嚟㗎。當然啦，相似啫，唔係一樣，總之6月就係咁上下嘅樣啦。比阿星年紀大4歲嘅6月，應該身體差過阿星，而且今次似乎有啲掌控唔到嘅慌亂，可能因為喺阿星面前見頭暈，令佢泰然自若嘅氣質減少咗。

有個咁靚嘅女仔喺你面前見頭暈，你會點幫佢呢？

待續😬

star_platina

家陣多咗好多師兄師姐喺度分享，阿星嘅故仔就變得冇咁特别，少人睇喇。不過唔緊要啦，如果師兄或者師姐有幸或不幸睇咗阿星嘅故事，都請留言。互動除咗喺床上面同異性或者同性之外，床下或者床外都可以互動嘅，只要動，不要停，大家話係咪？


那些年，星星同學會 第162話

真係唔好講到阿星咁冷酷無情，阿星都係一個好人；雖然對靚嘅女仔冇乜抵抗力，而如果個女仔仲要係病病地嘅話，阿星係一定會照顧下佢嘅。阿6月抬高頭合埋眼對住阿星，盲嘅都知道佢係頭暈唔敢張開眼啦。

呢啲時候，阿星都要俾返啲男士風度，做返個回應，等阿6月舒服啲先得。阿星耷低頭，哄埋去6月度，將阿星個咀嘅距離同6月個咀嘅距離貼到好近。近，並不代表冇距離，而係話俾人知阿星同佢好接近。阿星個咀未掂到6月個小咀，但係就同佢頭先喺隻啤酒杯度留低咗唇膏印嘅小咀非常之接近。

準備好人工呼吸，但係阿6月又未係已經暈咗，兩個咀四片咀唇仲未黐埋一齊。咁阿星喺呢段咁短嘅距離入面做緊乜呢？接近零，同零，係有好大嘅距離，而當你進入接近零呢個距離開始，距離係無限遠。有冇聽過？阿星唔記得邊度聽返嚟嘅悖論，只要你嘅距離同目的地喺每踏出一步嘅時候都會縮短一半，你係永遠唔會到逹目的地嘅。

當阿星個咀同6月個小咀嘅距離越嚟越接近，阿6月係有機會好耐都錫唔到阿星…………係阿星有機會幫唔到6月做人工呼吸先啱。

阿星個咀，同6月個咀留有些少嘅距離，但係阿星冇再進一步貼落去，呢個距離，可能大概只有5mm或者唔到嘅空間。阿星準備做啲嘢，以備6月需要人工呼吸嘅時候就隨時可以幫佢做。

大家知唔知阿星喺雙唇距離唔夠5mm嘅空間度做咗啲咩呢？

待續😬

markluk123abc

當然就係突然張開眼睛望住阿星啦

markluk123abc

阿星就梗係準備咀落去啦

引用:

原帖由 star_platina 於 2023-9-18 08:48 發表
家陣多咗好多師兄師姐喺度分享，阿星嘅故仔就變得冇咁特别，少人睇喇。不過唔緊要啦，如果師兄或者師姐有幸或不幸睇咗阿星嘅故事，都請留言。互動除咗喺床上面同異性或者同性之外，床下或者床外都可以互動嘅，只要動，不要停，大家話 ...

star_platina

引用:

原帖由 markluk123abc 於 18/9/2023 10:56 發表
當然就係突然張開眼睛望住阿星啦

呢個都係一個可能性，因爲咁近距離張開眼睛，真係乜都俾6月睇得一清二楚，包括阿星個鼻上面啲黑頭同埋阿星個鹹濕樣。😬