又係開估嘅時候～
那些年，星星同學會 第72話
世事並唔會下下都如你所想，人係一個變數，你好難去理解一個人對另一個人嘅態度會代表啲乜，更重要嘅係，對方嘅表情動作聲線語調，你留意漏一樣都有機會將整件事理解錯，更何況好似阿星一樣，係一個不解風情嘅人呢？
Joyce用力將阿星條頸拉落去，原來係同阿星嚟個親密接觸，將佢微涼嘅雙唇同阿星嘅有啲乾，少少爆冊甩緊皮嘅咀唇相接。呢下好熟口面，上次你打咗阿星兩巴之後好似都有咁做。有冇記錯呢？
Joyce呢個舉動令到阿星一時之間唔識得俾反應佢，當四片唇分開嘅一刻，阿星只識得呆呆咁望住佢，雙手仍然扶喺佢纖腰之上，但係就硬係唔知道究竟頭先臨時臨急發生咗咩事。Joyce望住阿星望咗一陣，見阿星好似都係冇乜反應成舊木咁，再做出咗3件令阿星好詫異嘅事：第1，再哄埋嚟親多阿星一下；第2，企返直之後再送阿星滿頭星斗；第3，對住阿星咀郁郁咁講咗唔知啲咩，然後擰轉頭就走。
有冇聽過麥拉賓嘅7/38/55溝通理論呢？7%嘅内容，38%嘅聲線語調加埋55%嘅表情同埋身體動作，只要三樣都配合，一個成功嘅溝通就完成。不過disco入面唔知點解硬係中意黑屎媽媽，阿星因為燈光關係，睇唔到Joyce嘅表情同埋身體動作(55%)；又因為響鬧嘅音樂而聽唔到Joyce嘅聲線語調(38%)；更加冇可能聽到佢要講嘅任何內容啦(7%)，所以阿星絕對有理由想信Joyce想講嘅嘢係冇傳逹俾阿星嘅。
阿星再一次滿天星斗，喺閃爍嘅disco燈光底下阿星完全冇辦法望到Joyce去咗邊度。搖搖頭，阿星即刻從頭先眼尾睇到應該係Joyce行出去嘅地方追出去，穿過好多跳緊舞嘅男男女女，走到去酒吧枱嘅前面，一大群人喺度買酒，另一邊有一小群人圍住唔知喺度做緊乜。通常呢啲時候，都係睇清楚究竟Joyce去咗邊先再行動好啲。
雖然酒吧呢邊嘅音樂冇喺舞池果邊咁嘈，但係都係唔多聽到啲人講乜。阿星行埋啲班人度，發現4-5個男仔圍住個女仔喺度傾偈，而個女仔，竟然係Joyce！
待續😬
[ 本帖最後由 star_platina 於 2023-1-31 16:42 編輯 ]
