之後究竟阿星同Joyce兩個發生咩事呢～
那些年，星星同學會 第73話
時間一路咁過去，已經差唔多朝頭早9點。阿星同Grace返咗嚟到依家只係瞓咗三個零鐘左右，依家諗住Joyce，完全瞓唔著。
……………………………
Joyce同阿星係一個好突然嘅突發情況，令到阿星好似完全俾佢掌握咗咁，定係查實係小星星俾佢掌握住呢？中意嘅時候就做愛熱情如火，會揾你出去食飯，會聽你講嘢；唔中意嘅時候就粒聲都唔出，你同佢講嘢都唔知佢有冇聽到，而且有時打俾佢都係講唔夠兩句就話要收線，完全冇果種男女朋友嘅煲電話粥嘅感覺…………………
阿星見Joyce喺度同啲人傾偈，就走埋去，佢望都冇望阿星，但係阿星終於聽到班唐人男仔講乜，大概都係話點解約咗Joyce咁多次都唔出嚟，但係又自己出嚟disco之類。唉，如果個女仔係唔中意同你出街嘅話，你約1千次1萬次人哋都係唔會出囉，你估打機，打得多就會升呢打得叻嘅咩？阿星聽到個男仔越講好似越激動，真係有唔係幾好嘅預感，即刻走入去人群度一手捉住Joyce隻手，然後話：「仲唔俾阿星揾到你？自己喺度撩男仔傾偈想令到阿星呷醋咩？依家應哂棍啦！阿星呷醋啦，快啲同阿星返出去啦，darling！」就係咁拖住Joyce走返入舞池入面，然後行快啲唔理三七二十一向住舞池另一邊嘅出口衝過去。
出到去disco門口，依家先零晨一點幾，啲minicabs都未嚟兜客，阿星見後面冇人追嚟，就拖住Joyce由Leicester Square行落去Trafalgar Square大狗廣場度等夜班巴士喇。阿星嘅巴士站同Joyce嘅巴士站雖然都喺大狗廣場度，但係一個東，一個西，方向唔同，而且一個鐘先得一班巴士，如果走咗一班車嘅話，就要再等一粒鐘先再有。既然係咁，唯有送咗Joyce上車先再諗辦法返屋企啦。
待續😬
