又更新下先～～～
那些年，星星同學會 第74話
「你唔瞓嘅？」Grace用矇矓嘅聲線問。
「係囉，醒咗添。」呃住先啦大佬。
「我哋一齊再瞓啦好冇？」Grace矇哂眼咁望住阿星。
「好，一齊瞓啦。」
………………………………
Joyce上巴士嘅時候都死命拖實阿星隻手唔放，一定要拉阿星上巴士同佢一齊搭。搭程night bus都唔平㗎，阿星俾佢拖實，都冇辦法唔上車同佢一齊搭巴士返去Man屋企啦，不過都去慣去熟，又冇咩問題嘅。
上到車，Joyce拖住阿星一路行上樓上去到車尾，車尾果排位中間果個先夠腳長嘅阿星坐，咁阿星就坐咗喺中間位，而Joyce就坐喺阿星嘅左邊，仍然捉實阿星隻手喇。好快架巴士就坐滿人，係呀，night bus喺總站好快就坐滿哂乘客㗎，然後去到遠啲嘅地方就會一路有人落車，慢慢去到啲後啲嘅站，架巴士就會得返好少人。阿星隔離左右都坐哂人，連Joyce嘅左邊個窗口位都唔例外。開車之後阿星終於忍唔住問Joyce ：「你冇嘢啦嘛？」
Joyce搖搖頭，將個頭捱喺阿星膊頭度，唔出聲，捉住阿星嘅右手同左手喺度玩阿星啲手指。阿星睇唔到佢嘅表情，但係睇到同感覺到佢喺度玩緊阿星啲手指：摸下每一隻手指，同阿星隻手十指緊扣，又喺度用自己隻手掌嚟到量度阿星手掌。頭先事急，都唔多留意到，原來Joyce嘅手掌都幾細隻，放埋同阿星隻手一量，阿星隻手一捉就可以捉住。既然你玩阿星啲手指，阿星唔俾啲反應你又真係講唔通嘅。
所以阿星就趁Joyce嘅手指同阿星嘅手指十指緊扣嘅時候，用力將自己啲手指夾緊，實行用手指代替行刑工具，同Joyce行個拶刑。拶刑係中國古代用嚟嚴刑逼供女人用嘅刑罰，用4條細細條用繩穿起嘅木棍夾住手指嘅根部，然後收緊繩索令到木棍夾緊手指做成劇痛，受者忍唔住手指被夾就會招供，從而逹到逼供嘅效果。
Joyce當然受唔住阿星嘅拶刑夾手指啦，佢即時縮手，好大力咁用手踭批咗阿星心口一嘢。哼哼，痛哩？
待續😬
