星期六喎,出下更新先。星星同學會第18話~
那些年,星星同學會 第18話
讀唔到書,又要重讀,今次阿星醒啦!舊年要讀十科考五科,今年阿星讀五科考五科!出咗去倫敦中心區一間私學校度報讀,由於舊年已經打咗英文底,今年啲先生睇嚟好buy阿星啲英文,啲同學都紛紛問阿星嘢,咩都叫阿星同先生講,突然間變咗班長!
所以話呢,要學任何一種語言,點都要食返咁上下多口水先有效果嘅。阿星上嘅幾科入面,其中有個女仔叫Salina,香港人嚟,讀完中五成績唔好,想嚟讀過。有個希臘妹,唔記得佢咩名喇,面長長嘅,咦,上唇有鬚嘅?!仲有機友嘅兩個妹妹,Joyce同Grace。
講返Salina,都係十七八,性唔性感見人見志,但一定係小野貓。佢好叻借位坐喺阿星隔離,聽唔到先生講咩,有咩唔明白,唔識做,都就即刻問阿星。成日借啲意拍下阿星手背,問阿星攞筆記抄。好心啦,睇唔到就戴返個眼鏡,原來佢真係四眼㗎!過兩日佢戴返副眼鏡返學,阿星差啲唔認得佢。Salina見阿星一路望住佢,忍唔住問阿星係咪佢塊面汚糟咗,點解眼定定望住佢?阿星話唔係,唔知你都戴眼鏡啫。
待續😬
[
本帖最後由 star_platina 於 2023-5-11 09:57 編輯 ]