更新多一話先開工～
那些年，星星同學會 第29話
Grace個衰妹仲大模斯樣入屋叫人坐咗喺廳度。老豆捉咗阿星入厨房斟茶，一邊問：「女朋友？咩人嚟？拍咗好耐？幾時同佢食餐飯？」
大佬呀，俾阿星講一句得唔得？朋友個妹咋，話叫阿星飲茶，同埋佢阿哥啩。老豆後生算得係美男子，好多女人埋身，好多風流債。阿星呢，就差好遠，唔靚仔，傻更更，不務正業，打機食煙蒲機舖…………總之唔係你地講果啲食家啦。
唔理老豆，攞杯茶出去俾Grace，已經見到細媽又摸手又講笑咁同Grace傾到好開心。唉，主角唔在，配角担重戲。
「喂，你唔係話好餓咩？唔好要其他人等，快啲出發啦。」
Grace有啲唔想走：「傾得咁開心，傾多陣先啦。」
其實阿星好怕遲到要人等，一手捉住Grace就行：「行啦，下次再講。」
果啲拜拜uncle auntie就唔講喇，着完鞋出咗門口個衰妹竟然挽住阿星手臂痴到埋一埋。由鞋房行去架車都唔知有冇十秒，俾佢拖到成分鐘先上到車。一上車阿星即刻就問佢去邊飲，其他人到未。個衰妹竟然話冇人去，得阿星同佢。
待續😬
