又更新下先~
那些年,星星同學會 第66話
打機嘅時間好快過,眨下眼又9點幾,機友越嚟越少,星期二晚嘛,聽日仲要返工返學㗎,你估好似阿星咁遊手好閒咩?見啲人走得七七八八,阿星記起好似忘記咗Joyce喺度,即刻擰轉頭睇下佢點。原來Joyce一路企喺阿星後面,一路都冇離開過。今次輪到阿星唔好意思喇,即刻叫佢坐喺阿星隔離,又對唔住又敬哂禮咁,希望佢唔好又星巴阿星嘆。Joyce冇平時咁惡嘅表情,只係靜靜咁坐喺阿星隔離,等咗好耐,佢突然間出聲:「你就嚟死啦!」咩事?
「你就嚟死啦!」Joyce一手捉住阿星個下爬,向住遊戲機螢光幕一擰!係喎,阿星個拳王就嚟俾人打死啦!好彩係拳王就嚟死,唔係真係阿星就嚟死,真係俾Joyce嚇鬼死。
Joyce好安靜咁坐喺阿星隔離睇阿星打機,間唔中有人嚟挑機,佢就會起身企喺阿星後面,直到挑戰者輸咗起身走人,Joyce又坐返喺阿星身邊靜靜咁睇住阿星打機。
坐下坐下,都差唔多11點,機舖都就關門。阿星望下Joyce,發覺佢原來望住阿星。今日阿星都著返條西褲,著返件恤衫,做返個斯文人,唔通阿星著得有型,令到Joyce望住阿星?
待續😬
[ 本帖最後由 star_platina 於 2023-1-19 13:52 編輯 ]