離開咖啡室,各自返屋企,已經三點幾接近四點,舖頭營業到十點,我一直諗聽朝點向囡囡解釋我遲咗六個幾鐘頭先返到屋企。
打開門嘅一煞,走廊透入屋嘅微弱燈光,我見到囡囡急速轉身背住大門,佢早應瞓著咗,肯定係為咗等我。
我躡手躡腳走埋床邊,佢出力瞌實對眼,扮瞓咗唔望我,但係眼淚喺佢眼角滲咗出嚟。
「對唔住呀!」
我喺床邊,除咗對唔住,都唔知可以講乜嘢。
囡囡終於擘大眼,不過無望我,向住度牆。
「媽媽,我係咪返嫲嫲度好啲呀?」
听到佢咁講,我個心好似玻璃跌咗落地下,成個碎晒。
「囡囡,媽媽對你唔住,你唔喜歡阿Mark,我會同佢分手,媽媽唔會再同囡囡分開⋯⋯」
「媽媽,我好驚⋯⋯佢⋯⋯佢唔係Mark哥哥,佢唔係!」
囡囡激動得亂講說話,跟住伏個頭喺枕頭喊。
莫非係⋯⋯
我敢再諗落去,亦都唔想係咁。
[ 本帖最後由 Jindaoonline 於 2023-1-29 02:07 編輯 ]