我工作量真係好輕,輕到懷疑Leonard點解會開呢間公司,唔通只係為咗俾一份工我做,定係以出糧俾我為名,我做佢情婦為實。
好多時清閑得滯,打電話俾囡囡同佢傾吓偈,但係Leonard就講明唔喜歡我咁做,話公司有公司嘅紀律,無謂嘅電話放咗工先打。
放工,而加我放工係無定時嘅,因為佢入親嚟都要我陪佢食埋晚飯,每一餐飯都好花時間,飲吓酒,傾吓偈,兩至三個鐘頭先埋得單。
我本來打算唔洗陪佢嗰幾日,放工之後去接囡囡出嚟相聚吓。
「遲啲先啦,我可能趁食飯時間同你傾吓公事,如果有需要,我會要求你食完飯返去寫字樓做嘢,所以你暫時留返夜晚呢段時間俾我。」
Leonard知到我打算,就制止我。
我想像唔到我呢個職位,所負責嘅工作有乜嘢咁緊急。
「假設我同你忽然有性需要囉,哈哈⋯⋯」
佢唔似講笑,認真咁講,應該以為我係佢情婦。
~~~~
小學一年級派位結果終於出咗,係我哋第一志願嘅選擇。
家長群組又再活躍,有啲人興奮,有啲人失望,仲有一班囝囝囡囡早前俾名校取錄咗嘅家長,趁機會喺度再一次晒命。
「一點綠」亦都即時私訊我,關心囡囡嘅派位結果,又提醒我學位註冊要注意嘅事。
佢一直幫助我,令到我有啲後悔當日同Leo分別當眾羞辱佢兩次。
剛覆咗「一點綠」,囡囡嘅電話到。
「媽咪,哥哥同我去玩得唔得呀?」
囡囡喺電話度問我,佢知到咗派位結果,第一時間通知阿Mark,話俾佢知終於有學校收佢,佢有書讀喇。
呢幾個月,囡囡年紀咁細,都深深體會到挫敗,但喺我面前佢仍然好開心咁,只係靜靜雞同阿Mark講,隔住電話喊。
「不過哥哥話要先問過你,咁得唔得呀?」
「得呀,梗係得啦,哥哥咁錫你!」
我當然唔會反對。
「哥哥問媽咪想唔想去喎?」
個傻女原來咁多嘢同阿Mark傾。
「想呀,你話俾哥哥知,媽咪想陪埋囡囡一齊去呀!」
唉,估唔到同阿Mark搞到要囡囡做中間人傳話。
~~~~
適合囡囡玩嘅,我同阿Mark都陪佢玩,囡囡想食嘅小食,我都買俾佢食,為咗趕睇表演,阿Mark抱住囡囡,拖住我,連奔帶跑,趕去睇即將開場嘅表演,佢一早探索好邊度係睇花車巡遊嘅有利位置。
到晚飯時間,由阿Mark負責揸住,我哋三個人你一啖,我一啖咁分享咗一隻好大嘅火雞脾。
「可唔可以問你同女朋友嘅嘢?」
巡遊未開始,我嘗試問阿Mark,但係怕佢好似上次咁,一講佢就激動。
「我努力緊囉。」
阿Mark咁講,我以為佢講緊儲錢結婚。
「我努力對佢產生感情。」
「咩話?!」
阿Mark點吓頭表示真確,我唔敢講啲乜。
「你同你老闆呢?」
阿Mark仲記住Leonard喺我屋企過夜。
「都係咁啦。」
我無稜兩可咁回應,自從喺老公呢個陸地跌咗落海,喺水裡面飄浮咗好耐,抓唔住想抓嘅石頭,而Leonard係唯一可以抓得住嘅乾地。
唔算得做好喜歡,但係起碼我唔討厭佢,情感上對佢到而加仲係可有可無,雖然我甚至無著佢買俾我啲內、外衣,無配戴佢買嘅襯飾,全部封存晒喺衣櫃,心理上唔想欠佢咁多,但現實係我差唔多依附咗佢。
況且,打咗佢工,佢就無再提過同我一齊呢件事,可能佢覺得而只要想見我,我就隨時喺佢身邊,陪佢到九點、十點,連寫字樓都準備埋睡房,我係佢砧板上面嘅肉,飛唔甩。
「我返咗工喇!」
阿Mark見我魂遊太虛,佢拉我返落嚟。
「哦!之前預先取錄嗰份?」
「另一份,我考咗張文憑,而加幫緊大學做運動醫學研究,一面讀碩士。」
「嘩,好叻仔喎!」
阿Mark一直唔想輸俾Leo,我認識Leo深咗,喺我眼裡面,唔需要鬥,無論心理,人格,阿Mark已經拋離咗Leo十萬八千里。
巡遊開始咗,花車配襯埋燈飾好靚,囡囡睇到興高采烈,我同阿Mark無咁專心,成日偷偷望吓對方,互相越貼越近。
「陪唔陪我去食糖水?」
我諗番起上次三個人睇完戲,又去食糖水。
囡囡已經同佢嫲嫲講咗去樂園,要夜返,我哋奉旨可以放肆。
「去食潮式綠豆爽?」
阿Mark提議。
「唔制,我要食雙皮奶!」
我專登同佢唱反調,要佢遷就我。
「好啦,好啦,陪你食嘞!」
我知阿Mark一定會讓我。
「唔係喇喎,都係去食綠豆爽喎,哈哈⋯⋯」
「你玩嘢!」
阿Mark再次露出天真嘅笑容。
我同阿Mark喺度玩,囡囡唔知咩事,喺我兩個人中間,抬起晒頭,望吓我,又望吓阿Mark,個樣好可愛,我同阿Mark不約而同一齊踎低,一個錫左,一個錫右,錫落佢兩邊面珠。
「而加住喺邊?」
食完糖水,玩足一日,諗住同阿Mark分別。
「返阿媽度住,你呢?」
「咪屋企囉,仲有邊度呀!」
「我以為你同老闆⋯⋯」
「唔係囉,Mark,我老公仲喺度,我同老閶,唔係你想像中咁,唉!」
我想解釋,但係都忍番住。
[ 本帖最後由 Jindaoonline 於 2022-12-16 22:22 編輯 ]