我同阿Mark都珍惜難得嘅相處機會,盡情享受陽光同海水。
「記唔記得之前同囡囡三個人去完主題樂園,你一手抱住囡囡,一手拖住我,跑步趕入場睇戲?」
喺沙灘玩咗半日,休息嘅時候,我回憶番起舊事。
「係咩?」
阿Mark似乎忘記咗,我向佢講睇完戲,仲傻氣到去食糖水,攪到好遲先送囡囡返佢嫲嫲度,希望提番起佢同囡囡嘅融洽關係。
「乜嗰時我咁幼稚,哈哈!」
「一啲都唔幼稚呀,你嗰時好有陽光氣息,反而我覺得你而加太過老成!」
呢個係我真心感覺,阿Mark今時已經唔同往日,無晒以前嘅頑皮跳脫,對我好大男人,但係照顧有加。
換轉幾年前,佢一落到海灘,定必大笑大叫之餘,仲會諗啲嘢出嚟整蠱我。
今次我哋唔使忘命狂跑去睇戲,而係足夠時間慢條斯理,買埋爆谷先入場。
游水、睇戲,大家都好開心,喺海灘上水一刻開始,全程阿Mark都拖住我隻手,幾乎無放開過。