Gina
7.
攬住阿星攬得咁實，阿星人非草木，俾阿Gina咁樣攬住，點都會有感覺嘅，而且阿Gina又咁樣望住阿星，你唔好咁樣星星眼咁啦，阿星唔可以俾星星眼望㗎。各位，大家知唔知咩係星星眼呢？星星眼，就係果啲淚眼汪汪嘅眼，通常喊完前後嘅雙眼就會出現好似星星咁嘅眼喇。阿星望住Gina，而Gina又靜靜咁望住阿星，時間過得好慢，好慢。阿星已經唔知過咗幾耐，Gina嘅雙手越攬越實，阿星望到佢咁，唯有袋番好條手巾仔，然後將隻手遞上去Gina嘅額頭附近，伸出隻食指，然後同佢講：「阿星依家………會慢慢將隻手指…………放上你雙眉………嘅眉心………呢個動作………會好慢………好慢………好慢………請你盡量集中精神………望住隻手指…………佢會慢慢…………慢慢………慢慢………接近…………而你嘅雙眼…………會變得好沉重…………而慢慢…………合上…………」Gina慢慢合上雙眼，企咗喺街度俾阿星催眠咗，然後阿星用上漸進式放鬆法嘅技巧，令Gina嘅情緒放鬆落嚟。
如果阿星冇睇錯，Gina應該有情緒問題，而且需要藥物去輔助。阿星終於明白Cassy話Gina需要人幫助係講緊乜。好，既然Cassy咁信阿星，為咗你，點都要幫下Gina。
喺街頭做催眠，阿星好少喺香港做，以前做假鬼佬喺英國就有，而且揾人拍嚟做網站宣傳，喺榴槤之國阿星唔係為咗玩催眠而嚟，所以就冇喺度玩過。查實要催眠一個人並唔係咁容易，最起碼對方要相信你，願意交出意識，讓你去撫摸佢嘅潛意識。Gina可能從Cassy度聽過唔少有關阿星嘅嘢，對阿星可能好早就已經有啲信任，所以阿星先咁容易將佢催眠。夜晚一點，條街已經唔多人，阿星企喺架車旁邊同Gina做催眠，都並唔係做得咁自在，始終呢個環境並唔係一個合適嘅環境，唯有做一啲緊急措施，幫Gina解決咗佢呢刻嘅情緒先。呢一刻，阿星幫Gina抒解咗情緒上面嘅不安，令佢放鬆心情，亦都放鬆佢用34B緊緊攬實嘅阿星嘅雙手。完成嘅時候，Gina打開雙眼，望下四周圍，然後望住阿星，有啲迷惑。阿星摸摸佢嘅短髮，然後問佢：「你有抑鬱症幾耐？」
8.
Gina望住阿星，然後話：「都年幾啦。食咗藥好啲囉，Cassy話你醫呢啲好勁，叫我同你講。」阿星明白，阿星嘅催眠治療同身心語言程式技巧冇錯係可以治療情緒問題，但都唔係萬能，而且如果需要用藥物治療嘅情況，催眠治療最多只能夠作為輔助性質咁用。
Cassy可能真係太信阿星，覺得阿星咩問題都可以解決，上次應付Erieann都已經差啲搞死阿星，家下又嚟多個Gina，阿Cassy，查實你中唔中意阿星嘅呢？俾咁多麻煩嘢阿星搞嘅？阿星同Gina講：「阿星送你返去先啦，聽日阿星要返工，呢幾晚幫你唔到啦。遲下你得閒過嚟揾阿星幫你催眠執一次好冇？」
Gina聽完即刻笑住點頭，衰妹，笑得咁燦爛。
送阿Gina返屋企真係好鬼快，二十分鐘已經到，原來你住得咁近阿星屋企。阿星送佢落車，佢硬係好似唔多捨得入屋咁，係咁同阿星吹水，咩打碟呀，啲熟客約佢出街想滾佢上床呀，然後終於講到男朋友三年前著草，壓力由果度開始。阿星一路聽，一路喺度釣魚，阿Gina，你講完未？就嚟四點啦，阿星同你坐咗喺車喺你屋企門口都有成兩個鐘啦，你係咪應該俾阿星返屋企瞓覺呢？
終於，阿Gina喺阿星不停喺佢面前捽眼捽到眼都就嚟甩嘅時候話會落車喇，不過都仲要阿星陪佢行過去等佢入埋屋先好走。夜麻麻又真係危嘅，好，送你一程。喺門口都要嚟多個親吻要攬下，阿小姐，阿星未係同你好熟，攬下都還可以，錫就真係咪。最後阿星抵受唔住佢嘅星星眼，蜻蜓點水咁錫咗一啖佢個咀。Gina個樣真係唔似就嚟40，雖然行為大胆作風豪爽，睇佢都係唔開心。有人講過：幸福嘅人，全部都係一個樣；而不幸嘅人，就有千百萬種不幸嘅樣。阿星喺度諗，係咪要照顧下Gina ，幫佢執執啲情緒問題呢？
終於可以返屋企冲個涼休息下。斟咗杯紅酒，阿星想用15分鐘整理一下呢一刻為止阿星知道Gina嘅事，寫低佢，萬一真係要做治療就靠呢啲資料幫手。寫寫下部爛舊手機響起，Gina打電話嚟：「你瞓未呀？」
「都未嘅，不過就瞓，有咩事？」
「冇呀，睇下你瞓未啫，有嘢俾你睇。」
「睇咩？」
「你睇完唔準delete嫁。」
「咩嚟嘅先得㗎？」
「總之唔準delete啦！」
阿星真係冇咁好氣：「好啦。」
「你應承我嫁，早唞！」
咁究竟你俾啲咩阿星睇㗎？
然後阿星就收到個短訊，一張Gina嘅自拍，應該係啱啱影嘅，相入面嘅Gina仍然著住對黑皮長靴，牛仔短裙，揸住個手機對住個鏡影哂佢身上面所有嘅紋身俾阿星睇，下面留言話：「靚唔靚？」
望住Gina有線條嘅手瓜，34B上面隻蜘蛛紋身同埋佢有馬甲線小腹嘅健美身體，你叫阿星點答你？
9.
今朝阿星真係攰到甩轆，臨瞓仲收到一張Gina 嘅健美胴體嘅相令到阿星異常興奮……………係小星星興奮先真。俾小星星折磨咗一輪先瞓得著，認真攞阿星老命。喺公司出車嘅時候阿Cassy 問阿星尋晚係咪玩到好夜，阿星望住佢，問佢做乜又介紹個怪人俾阿星識。點知阿Cassy 竟然話：「我話介紹個香港人朋友你識，你話好嫁。」
阿星搲哂頭：「係啫，阿星冇諗過係bipolar disorder（雙極性情感性精神病，或簡稱燥鬱症）吖嘛，麻煩嘢，唔搞少麻煩。」
Cassy隻手摸下阿星放喺波棍度嘅手話：「你咪幫下佢囉，佢好慘㗎。」阿星知道佢慘，都決定幫佢，老實講，唔係有少少因為佢張相，就呃人嘅。
星期六同Cassy，Miss Tang地去學打拳，查實阿星對呢啲周身郁嘅運動真係麻麻地，一嚟搞到週身汗；二嚟呢啲地方其實好大陣汗味同好重男人嘅體温，令到阿星有窒息嘅感覺，不過Cassy同Miss Tang話要嚟打泰拳，咁唯有跟住嚟睇下啦。間健身中心係Cassy去開嘅，Miss Tang以試堂身份嚟上堂，話學下打泰拳，聽聞榴槤之國都有好多泰拳師傅，而且都係師承大家，有信心保證。
阿星本住嚟觀摩阿Cassy同Miss Tang對打嘅美景，點都要睇下嘅。泰拳導師係正宗泰國人，kap koon kap，拳霸咁嘅樣全身冇多餘嘅脂肪，應該都真係又打得又睇得。阿Cassy同阿Miss Tang都係頭套背心拳套短褲仔咁，非常之養眼，導師一路教，佢兩個一路揮拳踢腿，然後又走多一個女學生過嚟跟住喺度練。三個女仔背心短褲仔，真係好有節奏咁跳動…………冇冇冇，阿星講緊佢哋泰拳嘅節奏啫。
阿師傅要三個女仔互相對打sparring，咁Cassy同Miss Tang互相對打，仲有一個女仔落單冇得對打，個女仔望下阿星，跟住行埋嚟阿星面前企咗喺度，查實阿星冇留意佢，剩係望住Miss Tang同Cassy兩個練習就夠啦，仲邊樹得閒望第二個呢？朋友們，俾係你，相信你嘅一雙眼除咗望住Cassy同Miss Tang健美嘅身體做出有節奏嘅運動之外，都唔得閒再四圍望啦，啱唔啱先？
個女仔見阿星冇理佢然後就行開咗喇。冇幾耐佢又行返嚟，將啲嘢好用力咁掉落阿星度，嚴格嚟講，係掉落小星星度先啱！嘩！阿小姐呀！阿星同你無怨無仇，整乜鬼你打小星星呀？無可奈何之下，阿星唯有望下呢個唔知點解同阿星有仇嘅女仔係乜水。
唔望猶自可，一望，哼！乖乖不得了！你知唔知掉個拳套頭套腳套落小星星度果個係乜水？
（待續）😬
[
本帖最後由 star_platina 於 2023-11-8 16:35 編輯 ]
