[第十六回] 再上征途
電話接通了
"喂"一把爽朗的女聲接聽應道
"hello!係我呀!!"
“你係？”她帶著點點疑惑的說
“尋晚你幫我執番條酒店鎖匙呀，記唔記得呀？”我說
“哦﹗原來係你個傻仔，估唔到你真係打比我喎，做咩咁早搵我呀？嘔完喇？哈哈哈!!!”她大笑的問道
“0下，唔洗咁串嘛，人地好心真係打比你，你唔記得我話過今日請你食飯咩？所以而家咪好有誠意咁打比你囉﹗仲未起身？”我說
“都唔可以話未既，不過係醒0左之後又再訓番囉﹗”她輕快的說
“0我，無，睇下你賞唔賞面出黎食餐飯呀？如果尋晚唔係多得你，我真係要訓街架喇，可能而家都仲0係酒吧門口未起身呢﹗哈哈!”我笑笑的問道
“唔……………而家呀？岩岩起身之喎，邊有咁快出到黎呀？”她遲疑的說
“你得唔得閒先？好似好勉強你咁喎……如果真係勉強就唔好喇，費事你以為我打劫你呀﹗”我見她有點疑惑，所以再詢問多一次，如她拒絕我便不再追問了。
“好啦好啦，怕你食左我咩，比下面你啦，哈哈!!!!去邊到食呀？”她快樂地問
“唔………而家都一點喇，一係約你食tea好唔好呀？八佰伴Pokka Cafe如何？”
“好啦，兩點半八佰伴Pokka等啦﹗好唔好？”她應承說
“好呀﹗我想問多少少野呀，你尋晚除左執到我條 room key之外仲有冇見到有其他野0係車呀？”我問道
“無喎，我只係見到你條key之喎﹗你仲有野唔見0左？”她好奇地問
“唔係，好似仲跌左0的野0係車之嘛，不過唔係重要野，唔見都唔緊要啦，一陣見﹗”我說
“拜拜﹗一陣見啦”她說完便掛了線
她總是給人快樂的感覺，我的心情也受到她的感染，剛才不見了咭片的憂慮也變得有點安慰，心諗: “如果佢真係有心打比我又點會唔再打多次黎喎……﹗最多今晚8:00pm就一就睇下可唔可以接佢收工都好﹗比個驚喜佢﹗”
在口袋掏出一根煙，點起了，呷著一口又一口，做了退房手續，離開這破舊的京都酒店。
出了酒店門口，心想現在首要工作是找新的落腳點，如要背著這沉重的背嚢走真的著實不好受。
離開酒店才發覺今天街上的人明顯比昨天多了﹗果真是公眾假期。
往賭場的方向走著，對面馬路竟有一間香港的 “康泰旅行社”，於是走進去看看有沒有酒店房間。
“先生有咩幫到你？”服務員說
“我想問今晚新麗華有冇房呀？”我問
“新麗華有，不過只剩下大房，$850一晚﹗”
“嘩，咁鬼貴既，我以前黎住都係三四百蚊一晚之喎﹗仲有冇0的平0的既酒店呀？”我驚奇的道
“唔……平0的呀!!!……今晚一係就新世紀啦﹗$300一晚﹗”
“氹仔0個間？”我問
“係呀，五星級，三百蚊一晚﹗”她說
心諗 “有五星級酒店住仲要300蚊一晚真係好鬼死抵，都係費事再去其他地方格價啦，300蚊是旦啦﹗”
“咁就呢間啦﹗”說完我從銀包拿出錢及身份證作登記
取回收據我便乘的士向氹仔的新世紀酒店進發。
每次來澳門，最愛獨個兒乘巴士於澳門半島及氹仔穿梭﹔車子緩緩的從氹仔橋上行走，回望葡京漸遠，感覺就像離開繁華城市轉到鄉郊一樣。
氹仔與澳門半島雖然只是一橋相隔，但這邊的澳門並沒有半島那樣的繁華明媚，賭場夜場甚少，只是某一兩間酒店有如此消費。但她有著不少出名的葡國飯店如木偶、公雞、好運、大利來豬扒包等。因此每到夜晚食飯時間這裡便會迫得水洩不通，出名的街道“官也街”更滿滿都是香港人，相信有來過澳門的讀者都會知曉。
新世紀賭場酒店就是座落於氹仔海邊，的士未到達從橋上已遠遠可見，雖然時日的沖刷令酒店的外觀有著風霜的感覺，但單看門面已是給人有五星級的feel。走進大堂，寬敞而高格調，與昨天的三星級京都酒店真有天淵之別。服務員工作也很快手，我交出單據及身份證，不消五分鐘已可上房了
房間很大，設備一應俱全，真想不到$300會有如斯優美的環境，房內對出全是落地玻璃，可看到氹仔海岸的景色，我站著遠佻良久，只感心曠神怡。
卸下行裝發現已是下午一時四十五分，於是便離房出發回半島的八佰伴
走到酒店大堂，原來新世紀酒店的賭場的入口就在此處，相當方便，心癮一起，見仲有幾個字未夠鐘，決定入去睇下玩個轉
賭場不是很大，人也很少，也許不會有人山長水遠從碼頭走去氹仔去賭錢吧，賭客應該都是以酒店住客為主。入口的大細枱兩張只有三四個大陸遊客在旁觀下注，下注都只是一百二百咁買，中年荷官開都開得無心機，很靜局。
我走到大細枱對了一千籌碼，握於手，心想速戰速決贏個tea錢走人。又要快又要穩，於是決定用三色欖睇燈買對面。
我所講的: “看燈三式欖” 方法是在賭場內不隨自己心水下注，卻找一個自己認為沒有運氣的人下他對家，我通常都搵0的蛇頭鼠眼，縮身縮勢左望右望的賭仔跟注。
大家如有到賭場應會明白，自己下注，真的沒有邊幾次會連中三口，連輸三口就真的經常出現，自己是如此，別人也正是如此，我就是用呢個睇法，用$100跟我認為係燈既人對家，如第一局輸了便於下一口再買他對家$200，再輸便再買$400，最大押注三次，就算三次全輸都只是$700，每次收錢就再由$100開始，我的目標是贏$500離場。
經選擇後還是大細枱比較好，因為一百元便可下注，而且開彩的時間亦只是一分鐘左右，夠快夠爽。
我坐在大細枱，看到下注的其中一個大陸中年男子，粗聲粗氣，坐在椅上連鞋也除掉，局局也下注，這般樣子真的一點也不覺得他會贏錢，於是我扮作自顧自下的押他對面。
經過七八鋪後，他有贏有輸，我已有微利，因為我並非平注而是欖上，三式欖亦未斷，他開始望著我，也許留意到是押他對面，我當然也不怕望他報以微笑。
“喂，細路，當我係燈呀﹗”他大聲的說
“唔係呀，我賭自己心水吧﹗”我牽強的微笑說
“仆街，明明睇到你用三式欖打我對面，屌你老尾怪唔得知咁耐都無錢贏，原來係你條仆街咒鳩我係燈﹗”他開始有點怒氣沖沖，站起來一手大大力的打在枱上
“喂，唔好咁大聲啦﹗” 在旁有個站在他後的中年女仕說，我想是她的內子
“咩唔大聲呀，有冇搞撚錯呀你，幾百蚊你搵人做燈，你識唔撚識賭錢架﹗”他向我大聲說，作勢走向我方。
“我賭錢關你咩事呀﹗你要贏就贏架啦，我自己買自己心水又唔撚係嘈住你，你理撚得我呀﹗”我理直氣壯的站起向他說
這時已有位西裝筆挺的主任走來，欄在我倆中間
“兩位唔好嘈，大家黎賭場贏錢唔係激氣，比個面我，唔好嘈﹗”他笑笑的說
其實我一點也不想和別人嘈交，所以我向那男主任笑一笑的再坐回座位
而那大陸男人的太太也從後拉著丈夫，我想他也知沒有理由與人在這裡大打出手，用很厲的眼神望一望我，再轉身與妻子離去。
我沒有理他，心想 “搞咩野咁黑呢兩日0係賭場都同人嘈，我又無去撩人，唉，痴撚線﹗”
自顧自的押大細，剛才打欖所贏的四百元沒兩局已輸掉，心急唔服氣，五百五百下注，最後連自己之前對的一千元也敗走，賭錢就係咁，黑起上黎有條路，看一看銀包，得番2千蚊，都係唔賭喇。
腦海電光一閃，看一看錶，已是二時二十分
“仆街，賭到唔記得約左人添﹗”我心道
我即飛身離開賭場，出了大堂，截了的士便上。
八佰伴在回力賭場旁，碼頭行過去都只不過是五分鐘腳程，極之方便，以前來澳門渡假總愛先到八佰伴買零食小吃。
不消十分鐘我已到達目的地，在八佰伴留下見到花店，有現成花束
“呢幾束花幾多錢呀？”我問
“$250啦呢一束百合花，好靚架，岩岩束起的﹗”老闆娘說完拿出來給我看
“就呢束啦﹗”我拿出銀包俾錢
於是我便拿著這束百合花直奔上Café
Pokka Cafe在八佰伴的二樓，一路上各人都以奇異的目光投向我這個拿著花束的少年。
一走進去，已看到她坐在窗邊的位置。
今天的她頭髮束起在後，穿上白色花邊T-Shirt，襯上牛仔短裙及尖頭黑色平底鞋，修長的美腿極吸引我的注意，感覺比昨天成熟了不少。
“乜你咁架，約人自己遲到﹗”她咪起小嘴投訴的說
“Sorry呀，送比你架﹗”我向她遞上花束再說:
“諗住你尋晚幫左我，咪走去買束花送比你囉，不過又包得鬼死咁慢，所以來遲0左囉，唔好意思呀﹗”
她伸手接過花束，一臉茫然的望著我，面上有點點遲疑的說……………………(待續)
小連 23/11/05
[ 本帖最後由 小連 於 2006-7-16 12:50 AM 編輯 ]
