[第十七回] 奇緣無限
“做咩無端端做花比我呀？傻左呀？”她將接在手驚奇的問道
“無呀，見你尋晚幫左我嘛，我都唔好意思要你抹地方，又唔知點多謝你，咪買束花俾你囉，唔鍾意呀？”我解釋道
“唔係，束花好靚呀﹗我咁大個女都係第一次收花吧﹗”她嘻嘻的笑了出來
這刻的她玉頰霞燒，我想她是第一次收花因此面也害羞得紅了。尋晚或許自己醉意太濃，根本無暇看清楚她的容貌，現在才發覺這常常帶著笑意的她須不能說是美人的肧子，但她的眼睛真的很大，圓碌碌的極之可愛，我最欣賞是她開朗的聲線，爽快而活潑，與她交談頓感豁然開朗。
竟然讓我遇上阿欣之冷艷與這少女的開懷，雖然兩者大相徑廷，但這次來澳門也真可說是奇緣無限。
“唔知點解見到你成個人都好開心呢﹗”我說道
“係咩？係咪我靚女呀？唔好氹我喎…..﹗”她笑說
“你就好啦，日日見到你都咁開心………好似無憂無慮咁…..﹗”我嘆了一聲說
“唔係喎，今日心情靚先係咁之喎，你夜晚見到我唔係咁架喇﹗”她哈哈的說
“係喎，傾左咁耐都未問你叫咩名添？”我驚覺尷尬一問
“我叫Kathy呀，0的friend都會叫我KK﹗你呢？”她問道
我遲疑了三秒道: “我叫Kris呀，同你一樣個名都有個K字頭﹗”我說
大話說完良心過意不去，從口袋抽出Lucky Strikes，伸出一支說
“你食煙嗎？”我問
“梗係食啦，無煙食會死人架﹗”她笑笑並拿起著煙說，我為她點起，自己也拿了一根呷起來
煙從口中吐出，一絲一絲的如夢幻霧峰，昨天清早又如何會想到有現在的路，人生如夢，還是今天今朝有酒今朝醉，明天的事留待明天才想吧。
“今朝你同我講漏左0的咩0係車呀？好似咁緊張咁既﹗”她吐出一口煙好奇的問我
“無，之前有幾個澳門朋友叫我黎澳門打比佢，我抄左0係紙到之嘛，點知今朝想搵時又唔見喇，算啦，小事﹗”我求其作了一個藉口回應
“0我，我仲以為你又跌左0的咩添﹗係喎,,,,,,,乜你咁屎架，飲0個幾支Sub-Zero就訓低，點出黎wet呀？”她笑著的嘲諷我
“無呀，平日我都好少飲酒，不過尋晚咁岩先飲多左幾支，即時死左…….真係唔多掂，你好飲得架咩？”我問她
“哈哈!!!一定飲得多過你啦，無鬼用﹗”她說
“今晚再黎搵你飲過啦好唔好？”我問
“今晚我唔洗返工呀，去第二度飲就得…………你請既話………….﹗”
“無所謂啦邊個請，飲輸0個個請囉好唔好？”
“好呀好呀，又有免費酒飲喇，yeah!!!”她開懷大笑
我拿起餐牌點了一個二人High Tea Set，不是太貴，100蚊有找，我記得當年我來這裡時吃過﹗
“你日日都收工收咁夜唔辛苦咩？”我問她
“習慣左喇，做左兩年喇﹗無咩所謂﹗”她說
“不過我見你都幾寫意啦，自己睇住個鋪，好似幾開心咁﹗”我話
“平日真係無咩做，星期五六日就忙到嘔喇，所以我放假都要平日放呢，星期五六日都無假放羅。”她訴苦似的說
“平日有平日好既，起碼無咁多人啦，放假都開心0的﹗你放假多唔多去香港玩架？”我問她
“一時時啦，香港好貴呢0的野，不過好多野睇﹗兩三個月都會去一次既﹗”她說
“下次黎香港搵我，我請假陪你去玩啦﹗”我笑說
“係咪真架，成日口花花，都唔知邊句真﹗”
這時男待應捧著一盤食物過來，放在枱上，只見三層的食物架上放滿了雞翼、沙律、三文治、串燒及甜品等，賣相相當吸引
“食啦，唔洗客氣﹗”我說
“咁我唔客氣架喇﹗”她即伸叉拮起雞翼放在嘴裡
我喝著即磨咖啡，這裡的黑咖啡香濃無比，每次我來也必喝一杯，咖啡對我來說沒有什麼提神作用，但我鍾愛它那苦中帶著甘香的味覺!!!
下午茶的食物也很出色，一個大的high tea set兩個人都可吃得飽飽。
“咿，你呢兩日黎澳門做咩野架？”Kathy邊吃邊問我
“我放大假過澳門賭錢囉﹗”我吃著三文治回答說
“賭錢？你一個人專登過黎澳門賭幾日錢？”她面帶疑問的向我問道
“係呀，我成日都係咁，病態賭徒一名﹗你係澳門人應該唔會賭錢啦？”我問她
“唔係架，有時都會架，不過就玩好細，輸就走架喇，唔似得你地0的香港人咁博命，輸完又去襟輸完又去襟，好似開金礦咁﹗”她說
“嘩，乜你都會賭錢架？睇你個樣真係睇唔出喎，你個樣咁細路仔﹗”我猜疑的說
“咩細路仔呀﹗我好似同你差唔多之喎，Kris先生!!你就賭得我就唔賭得既…………..”她一句反串我
我用叉拮起一串串燒，放在她的碟上
“咁串，食埋舊串燒啦你﹗”我道
她格格嬌笑 “你都唔方係好人，夜媽媽就去睇波，訓醒就約女仔出街，之後又去賭錢，我打死唔信你過黎只係賭錢呀，一定有……………嘻嘻嘻!!!”她眼眉向上一嬈的說
“0下？ 呢0的野我又真係唔岩喎，賭我認就真係迷上癮，其他0個瓣就無掂過喇……….你係咪有好介紹先？係咪有得平？係我就唔駒呀，一定要試下………….”我大笑說
“介紹你個死人頭呀﹗你地0的男人，十個有九個都去滾架啦，唔好扮野喇，不過睇你個樣呀…………似係0的姑爺仔扼女仔多0的囉﹗”她抹抹嘴說
“唔係呀嘛，我咁斯文邊到似……………..係喎，尋晚場波幾比幾，我差0的唔記得自己買左波添，睇睇下訓著左無理到﹗”我轉一轉話題說
“你唔係訓左，你係醉左，攤左0係地下﹗哈哈!!!幾比幾呀…….我真係唔知喎，我都無留意，執緊野呀0個時﹗”她微帶笑意的說
“唔緊要啦，一陣去問下咪知囉﹗”我說
快樂的說說笑笑，想不到一會已有一個多小時了，和她交談雖然談東談西，不著痕跡，但感覺很自由和舒泰，也許她性格爽朗，你串串我，我又串串你，最快樂的便是如此，說什麼也可和她談上半句天，我喜愛這種性格，笑容可掬，活像沒有憂愁，不用思索，真的想如她這般開開心心的活過。
“咁你一陣去邊呀？”她問我
“周圍行下囉，頭先先去完賭錢，輸左千幾蚊﹗都係唔賭喇，賭錢扼人﹗”我回答
“真係唔賭？”她面容有點奇特的說
“你想去賭？”我說
“唔係喎，我見你竟然話唔賭咁問之嘛﹗”她說
“你呢？放假諗住去邊架你？”我打探的問一問她
“今晚約0的朋友落D呀，你有冇興趣？”她說
“落D？？？ 唔喇，我年紀大，呢0的活動唔多岩我，耍太極呀、舞劍晨運0個0的我就黎﹗”我笑說
“哈哈，唔係呀嘛，咪成個阿伯咁啦，講真單身來澳門賭錢我覺得大部份都係阿伯阿叔吧，真係估唔到連你廿幾歲人既都有﹗來啦，一齊玩，介紹我0的朋友你識啦﹗”她說
“有冇好女仔介紹我識先？”我點了一口煙呷著再打探問她
她想一想，遲疑地答 “唔………好女仔唔洗介紹你都識啦，咪我KK囉!!!哈哈哈”
“咁我唔來喇﹗”我打趣的笑說轉過身
她一手伸過來捉著我的耳仔，大大的扭了一下，我冷不防她會向我動手，避也避不了
“嘩………………好痛呀靚女，放手呀﹗”我說
“鬼叫你玩我呀﹗”她喵起小嘴投訴
我伸手摸摸已經開始發紅的耳朵，說
“講笑之嘛，你梗係好啦，唔係我又點會一起身就諗起你打比你約你食下午茶呀﹗好痛呀……﹗”
“咁你而家去唔去？”你看似怒怒的差起腰向我說
“去﹗去﹗去﹗大恩人咁有誠意，一定去，去邊間呀？我只係知澳門得一間Disco叫DD之喎，新麗華對面﹗”我說
“咪就係0個間囉，得呢間之嘛澳門。哈，你對澳門又真係幾熟喎，我講咩你都好似知0係邊咁既，你成日來架？”她問
“都唔係成日，一星期兩次，一個月十次，一年百幾次左右啦﹗”我開玩笑說
“唔係呀嘛，有冇咁爛賭呀﹗唔信……………..﹗”她說
“信不信由你﹗我無打算扼你喎………….﹗”我回應道
“食飽飽喇………..不如去賭場行下囉﹗你陪我啦﹗”她開心的說
“去賭錢？邊到賭呀？”我問她
“去金沙啦，金沙靚呀，又大又近，有個幸福輪好好玩呀，我試過中五十倍0個個小丑呀，贏左幾千蚊呢，我地可以行過去﹗不過我要去襟錢先，無錢0係身” 她興奮的說
“哎呀!!我以為你有錢吧，我無帶錢埋單喎……………..﹗”我扮作懵然不知的說
“唔係嘛…….﹗”她像有點驚訝說，左望右望
“講笑吧，埋單啦，哈哈!!!”我笑道
“一早知你玩野啦死仔﹗”她作勢又要扭我耳
“唔好呀，我請啦最多﹗”我付錢結帳，與她一起離開
原來café外面已有提款機，她自顧自的襟錢，我站在一旁等她
“得喇得喇，行喇行喇﹗”她跑過來說
“咪咁心急啦，好早吧﹗你那著束花點去賭錢呀？洗唔洗搵地方放低佢或者掉左佢呀”我回應說
“乜你咁架，送野比人叫人掉左佢﹗”她不高興的說
“唔係呢個意思，我即係想話有咩地方放低佢，方便0的行，拿著束花麻煩吧﹗”
“我都唔覺麻煩，你咪理我咁多啦﹗我鍾意拿住佢行街呀﹗又唔係你羅，咪理﹗”她開心的笑說
我心道 “女人愛面，男人愛錢﹗真係無講錯﹗”
金沙娛樂場開業其實沒有兩個月，我上個月初來過，人頭踴踴，想賭都無地方比你賭。內裡裝修確實真的有如踏著拉斯維加斯的感覺，樓底高，熱鬧而不焗束，很美輪美奐，裝修十分豪華，聽說之後這裡會興建渡假樂園，不過將來又會是一番什麼光境。
路上看到旅遊塔，心裡又記掛著昨晚的她，為何還未有再致電給我呢？很想再望到她，很想再見到她﹗心情又忍不住沉了一點…………….
“到喇到喇，行快0的啦﹗”她崩崩跳高興地說，說完伸手捉著我………..似拖帶拉我快步向金沙步去……..(待續)
[ 本帖最後由 小連 於 2006-7-16 12:53 AM 編輯 ]
