第二十四回 [能否進一步?]
他是誰…………………………………..?便是我來澳門時在船上見到問他借生果日報一看的阿伯,真的估不到在這裡又見到他﹗世界真的大,但緣份卻停不了﹗依稀記得他在船上說過自己五十來歲,看到他不少頭髮早已白了脫落,臉上皺紋色斑很多,看上去真的不似五十來歲,似是六十有矣。但直覺上他幾nice,成日都滿面笑容,又好傾。
“你又係今日過黎呀?”我問他
“呵呵,係呀﹗今日兩點過到黎,去左法老王賭場﹗三個鐘贏左千幾蚊呀﹗你知唔知呀,係扣左船飛錢喇﹗哈哈!!”他笑說
我心想,以為你贏大錢,原來只是一千幾百元,仲要用左三個鐘黎贏,平日我手風好兩鋪都已有這價錢了,但看他的快樂,又不似是裝出來的,難道賭博……………..應是如此?
“咁你而家去邊呀?唔返香港呀?”我問
“無,諗住去葡京睇下有冇靚枱,如果有就再跟下,無就去下第二度囉﹗”
“葡京邊好賭架?又臭又焗﹗”我笑說
“賭錢最緊要多人呀後生仔,理得佢臭唔臭,無人就算香既你都唔好去啦﹗九成九唔好路嘛﹗”他慢慢一字一字的說
“你賭百家樂架阿叔?”我問他
“咩都賭下既,老人家無用喇,咩都唔識,係識去賭錢,字都唔識多隻,邊似得你地0的後生,講句野都唔同0的。”
後生未必可畏,有時遇著如我這般的,更是可憐兼可悲。
“唔喇,我約左朋友食飯呢﹗等緊佢呀﹗”
“哦,咁好啦,你賭唔賭錢架?” 阿伯滿臉好奇的問
“………都賭架,你有咩方法肯教我就仲好喇﹗”我笑說
“哈哈!!!!賭錢好易上癮架﹗後生仔不要學﹗我係咁都唔想見你係咁…….”他大笑說
我心想,唔洗你教都上左癮好多年啦。
“哈,唔會掛,玩下吧,夜0的有機會搵你啦?睇下你仲係咪玩緊﹗”我拿出電話
“我夜0的去桑拿訓喎,老人家唔訓唔得架﹗”他說完將電話說給我聽,我也將自己的電話號碼給他。
“阿伯點稱呼你呀?”我問他
“人人都叫我華叔,葡京好多人都識我架﹗”阿伯說
我點頭以示明白,“我叫阿連,多多指教﹗不過今日無帶公司咭片,唔好意思﹗”我伸出手與他一握
“哈哈,後生仔,唔洗咁見外喎,講真,今日大家見面,有冇下一次機會都唔知,唔洗做埋0的客套野喇,你返到香港都唔會搵我啦,咪傻啦﹗”他說
我心想 “華叔又說對,自己也真的太門面了……...”
“哈哈!!!sorry﹗哦﹗尋晚去左桑拿?我尋日都有去喎﹗”我轉轉話題帶點淫淫的笑著問他
他年紀比我大一倍有多,我也不用做什麼掩飾吧,做番自己應該好過一點﹗橫掂都係一日朋友﹗
“嘻,睇唔出喎呀﹗你斯斯文文,咁後生就出黎玩﹗………..去邊間玩呀?”他面上流露出不太相信的表情說
“哈哈!!!過黎澳門唔係嫖就係賭架啦﹗有咩咁出奇?﹗我去左帝濠呀﹗”我答
“帝濠呀?好似係新開架喎,我未去過﹗”他答我
“實不相瞞,尋日我第一次去呢0的地方玩吧﹗”我說了給他聽
“哈哈!!細路,嫖賭男人大害呀,小心為妙,阿叔以前都試過比呢兩樣野玩死呀﹗”
我心道 “賭與嫖,我玩佢就有,點會比佢玩死呀?阿伯未免太過誇張……”
“有冇咁嚴重呀?”我笑問
“唉,你仲細,你唔會明,我地出生0係兩個世界,不過我都唔希望你明,到你明既時候,著實太遲了…………﹗” 他有點稀虛的說,在他的大膠袋中帶出一個橙
“食唔食呀?食完飯食個橙消化呀,幾靚架,岩岩買﹗”他將橙子放在我手
“多謝,等我一陣食先﹗”我接過來說
“好呀,後生仔又睇唔出你同我地呢0的老野都岩傾。你有0的似我細個,廿幾三十年前,都係自己一個走黎澳門,唔願返屋企,唔願返工﹗”
“我過黎搵朋友,邊係唔返工………….”我心裡有點戚戚然
“好啦,唔講咁耐喇,如你有興趣今晚來葡京搵我啦﹗”
“好呀﹗我夜0的打比你﹗”我回答
阿伯說完笑著與我揮手道別,我望一望拿著手中的橘子,心裡有著詩詩暖意,人情還在。看著他一步一步的離去,我心裡又湧起了船上的感覺
“將來,我會否如他這樣呢?”
這時一個身影向我走近,我知她來了………看一看她,與今早所見沒有大分別,她化了一個比較濃的妝
“喂﹗Kris,行得未呀﹗”她笑著的走近我
“行得啦,等你等到頸都長埋﹗乜咁鬼死耐架﹗”我作狀伸長頸部引她發笑
“哈哈﹗你成日都咁誇架﹗”她捧腹大笑
“你就誇,你個妝就真係化得誇呀,陪我食飯唔洗搞到咁呀?”我笑說
“乜好誇咩?真架?”她扁起小嘴說,並即時在手袋拿出鏡子一照,臉上露出點點不快笑容
“講笑吧,你似去飲多過似去食飯囉﹗哈哈!!”我笑說
“唔係呀,幾好呀,你唔鍾意呀?”她拿著鏡子照著問我
“唔係唔係,鍾意鍾意,都不知幾鍾意﹗”我答
“車,都唔知係唔係真既…………..﹗我話你知呀,女仔同男仔出街肯去化妝係代表一種專重呀,你識唔識架?”她將鏡子放回手袋
我心想: “我只係覺得化妝太濃有0的似出黎撈吧﹗”不過當然沒有和她說
“我知我知,多謝你,咁比面﹗”她坐在剛才華叔所坐的地方說
“咿,頭先0個個邊個黎架?你爸爸呀?”她好奇的問我
“梗係唔係啦,前兩日識架,香港人來的﹗”我回答
“嘩,你都好勁喎,黎澳門幾日都比你識到人,仲識到埋我添,最叻係呢樣﹗”她哈哈笑說
“嘻嘻,好傾咪傾多句囉,無所謂架,吹水傾計之嘛……………﹗”我望著她笑說
望著她,又令我不奇然的想起阿欣
“望咩呀望?眼定定……..咩事,快0的講﹗”她伸手在我頸上一緊說
靈神回轉,KK大大的眸子水汪汪的流轉,看著我,她五觀整齊而恰當的放於俏俏的瓜子臉上,及肩的頭髮散出陣陣的少女情懷,用美與不美來描寫她根本不適當,她的氣質是少女無牽無掛的快樂,細看下她可愛極了。
“呀,呀,唔好呀,我就黎死喇﹗”我叫道
她鬆開雙手說 “咁你頭先做咩望住我眼定定?”
“我想講……………你個樣好得意﹗”我向她認真的說
“嘩,你講野都好直接喎……………”她嘴角泛出點點笑意的說
“再直接0的都有,其實我想問,你有冇拍拖呀?”我大著膽子的一問
“……………..唔答你﹗”她喵起小嘴說
“送俾你架﹗”我將手中的橘子交在她手
“你無野嘛,今朝送花,夜晚送橙,今次好似行貨左0的喎﹗”她笑笑的拿著橘子對我說
“頭先聽你話食完飯嘛。等你成個鐘見無野做咪行去前面生果店買個橙比你囉,食個橙好消化呀﹗”我說
“你呀……….專門做埋0的懶係細心既野,可惜你太口甜舌滑,我係唔會信你既﹗”她口雖如此說,但我知她心裡是甜
我拿回橘子拆著,將一半交給她,與她在長櫈吃起橙來。
“我都有野送比你,多謝你今日送比我既花﹗” 她在手袋拿出一個包了花紙的小小四方型禮物放在我手
“嘩,聖誕交換禮物咩﹗”我說
“咁你要唔要呀﹗﹗﹗”她樣子扮怒的伸手想搶回禮物
“多謝,多謝,梗係要啦,咩黎架,而家拆唔拆得呀?”我拿著這輕輕的盒子搖了搖
她微笑望著我說 “梗係得啦,頭先返屋企時買架,送比你,你想幾時拆咪幾時拆囉﹗”
我慢慢的拆開花紙,是一個小小黑色盒子,我打開,看到…………………….(待續)
小連 31/12/2005 (新年快樂,狗馬亨通)